Mataio 2
2
Ko nā Tino Malaga mai Hahae
1Na fānau mai ia Iehu i te kakai ko Peteleema i Iutea, i nā aho o te nofoakiga a te tupu ko Helota. E hēki mataloa talu te fānau mai o Iehu, kae taunuku ifo ki Ieluhalema ni tāulelea hukehuke ki nā fetū, na ōmamai i he fenua i Hahae 2ma na fehili vē kilātou, “Tēfea te pepe kua fānau mai ke fai ma tupu o tagata Iutaia? Na kitea e kimātou tona fetū i te oho akega i hahae, oi ko kimātou kua ōmamai ke ifo kia te ia.”
3I te lagonaga e Helota o te tala tēnei, oi na tupu ai tona popole lahi, ma na vēnā foki ia tagata uma o Ieluhalema. 4Na fakapotopoto ai e ia nā ohitāulaga pule ma nā faiākoga o te Tūlāfono oi fehili atu ai ki ei, “Ko fea nei te koga ka fānau mai ai te Mehia?”
5Kua tali mai kilātou, “I te kakai ko Peteleema i Iutea, auā na tūhia e te pelofeta:
6‘Peteleema i te fenua o Iuta,
ko koe ko hētahi o kakai pito tāua o Iuta;
auā mai ia te koe, ka hau ai he takitaki
ka ia takitakia oku tagata Ihalaelu.’ ”#Mik 5.2
7Na fekau ai loa e Helota nā tino malaga mai Hahae, oi na iloa ai e ia i te lātou fono na fai munimuni, te taimi tonu na tū mai ai te fetū. 8Oi na uga ai e Helota nā tino malaga ki Peteleema ma te fakatonuga e vēnei, “Olo oi hakili fakalelei te mea e iei ai te tamaiti; kāfai e maua e koutou, oi taku mai ai kia te au kae ke fanatu foki au oi ifo kia te ia.”
9Oi na olo ai nā tino malaga, kae kua toe kitea foki e kilātou te fetū na kilātou kitea i Hahae, e muamua atu ia te kilātou ma kua tū tonu mai i luga o te mea nae iei ai te tamaiti. 10I te kiteaga e kilātou o te fetū, na fiafia lahi lele ai kilātou. 11Kua ulu atu kilātou ki loto o te fale, oi na kitea ai e kilātou te tamaiti ma tona mātua ko Malia. Na tōtutuli ai loa kilātou ki lalo ma ifo atu kia te ia. Kua tōake foki ki luga a lātou meālofa ko te aulo, ko te pulu lipano ma te pulu mulo, ma tuku atu kia te ia.
12Oi na toe foki ai ki to lātou nuku kui atu i hētahi auala, auā na fakailoa e te Atua kia te kilātou i he miti, ke nahe toe olo kia Helota.
Ko te Hōholaga ki Aikupito
13Kua olo kehe nā tino malaga, oi na kitea ai e Iohefa he āgelu a te Atua i he miti, e lea vē ake, “Ka hakili e Helota te tamaiti ke tāmate. Ko te mea ia, tū loa ki luga kave te tamaiti ma tona mātua oi hōhola ki Aikupito. Nonofo pea i kinā ke toe lea atu au.”
14I te pō lava tēnā, na tū ai ki luga ia Iohefa oi kave te tamaiti ma tona mātua, kua olo ki Aikupito, 15ma na nonofo ai lava i kinā ke pa ki te taimi na mate ai ia Helota. Ko te mea tēnei na taunuku ai te vāgana a te Aliki na kui mai i te pelofeta, “Na kalaga au ki toku ataliki ke hau mai Aikupito.” #Hoh 11.1
Ko te Tāmatega o nā Tamaiti
16I te iloaga e Helota ko ia kua pelogia e nā tino malaga mai Hahae, oi na ita lahi lele ai. Na fakatonu ai loa e ia ke tāmate nā tamaiti tāne uma mai te lua tauhaga āgai ki lalo te mātutua, i Peteleema ma nā nuku e tuākoi ki ei. Ko te tonu tēnei na fai fuafua fakatatau ki nā mea na iloa e ia mai nā tino malaga, e uiga ki te taimi na kitea ai te fetū.
17Oi na taunuku ai te kupu a te pelofeta ko Ielemia:
18“Ko he leo e lagona i Lama,
ko te leo o te tagi auē.
Ko Lahela e tagi mo tana fānau;
kua hē ia talia lele ni fakamāfanafanaga,
auā kua mamate kilātou.” #Iel 31.15
Ko te Toe Foki Ifoga mai Aikupito
19Kae i te otiga o Helota, na fakaali ai he āgelu a te Atua kia Iohefa i he miti i Aikupito, 20ma kua lea vē atu te āgelu kia te ia, “Tū ki luga, kave te tamaiti ma tona mātua oi toe foki ki te fenua o Ihalaelu, auā ko nā tino nae taumafai ke tāmate te tamaiti kua feoti.” 21Oi na tū ai ki luga ia Iohefa kua kave te tamaiti ma tona mātua, ma toe liliu ki Ihalaelu.
22Kae i te lagonaga e Iohefa ko Akilao kua hui ki tona tamana ko Helota ma kua kavea ma tupu o Iutea, oi na mataku ai ke toe foki. Na toe maua iētahi fakatonuga o ia i he miti, ma na fano ai loa ki te itūmālō ko Kalilaia, 23ma nofo i te kakai e igoa ko Nahaleta. Ma na taunuku ai te kupu a nā pelofeta: “Ka fakaigoa ia ko he ha-Nahaletā.”#Mlk 1.24; Luk 2.39; Ioa 1.45
Àwon tá yàn lọ́wọ́lọ́wọ́ báyìí:
Mataio 2: TOKU
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Society New Zealand Charitable Trust
