Nlb 28
28
Biyoñ bi ne ntelan asu metuna'a
(Ez 46:13-15,4-7; 1 Minkte 23:31; Nlb 10:10)
1Ane Nti a nga kobô Môze na: 2Jô'ô bone b'Israél na: Mia ye bômbô évevé ya ve Nti mimvean mi ne émiam éyoñ ja yian; mimvean mite mi too bidi bia di'ibane nduan, bi too mbamba menyum e be Nti. 3Wo ye jô be na: Mvean wo di'ibane nduan mia ye liti Nti ñwô wu: *môs ôse, bitoñe mintômba bibaé, bi ntoo mbu wua bi too teke ayeñ asu mimveane ya nnôm éto mi ne ngumba. 4Wo ye ve étoñe ntômba jia mametyé, a ji évok e zañe ngô'é ébaé, 5nalé fe kili avut éla mfu'an a lita mbone jia a étun. 6Mveane ya *môs ôse te wo ye bo avale da ane wu ô nga veban e be Nti e nkôle sinayi, mvean wo di'ibane nduan ô too mbamba menyum. 7Etoñe ntômba ya mametyé ja ye veban a mveane lita woone jia a étun ba ye liti Nti e vôm a n'étyi. 8Etoñe ntômba baa, ja ye veban e be Nti mamengô'é baa be mimvean mi ne fe aval'ane mi ya mametyé; mveane te ô too wu wo di'ibane nduan a mbamba menyum e be Nti.
9E môse Sabat, mia ye ve bitoñe mintômba bibaé bi ne mbu wua teke ayeñ a kili avut ésaman, mfu'an a mbon, nalé fe mveane woon. 10Sabat ase mvean ô ne ngumba te wo ye lat a wu ya *môs ôse mfula'an a mveane woone wé.
11E *môs ôsu ya ngon ése, mia ye ve Nti mimvean mi ne ngumba, mi too avale di: beyôm benya'a bebaé, nnôme ntômba a bitoñ mintômba zamgbwa, bi ne mbu wua a *mvo'é ne selem. 12Mvean avut mfu'an a mbon wo ye lat a wu tit ése: ba ye ve nnôme nya'a ase a kili avut ébu, nnôme ntômba a kili avut ésaman. 13A kili avut éla asu étoñe ntômba ése. Nti Emien a ye yene mvaé ya ôtita ya mimveane mite. 14Mveane woon wo ye bo lita éla asu nnôme nyak ase, lita ébaé asu nnôm ntômba, a lita jia a étun asu étoñe ntômba ése. Mimvean mia yiane veban e metata'a me ngon ése ya mbu. 15Mia ye fe ve Nti nnôm ékela asu metuna'a ya nyoñe *njaman, te lañe mvean ô ne ngumba ya *môs ôse a mveane woone wé.
E mam ma fombô abô'ô Pak
(Nk 12:1-28; Lv 23:5-14; Dt 16:1-8; Yo 2:13; 13:1)
16Ngon ôsu ya mbu é too melu awôm a menyin, mia ye jem abô'ô Pak asu Nti. 17Abô'ô ya melu zamgbwa da ye taté ngon éte é too melu awôm a metan. Eyoñe te mia ye di belet é too teke mvusan. 18Mia ye sulan e *môs ôsu asu ya kañe Nti, te k'ésaé éziñ mia ye bo *môs ôte. 19Mia ye ve Nti mimvean mia di'ibane ngumba: beyôm benya'a bebaé, nnôme ntômba wua, a bitoñe mintômba bi ne mbu wua zamgbwa, bese *mvo'é ne selem. 20Tit ése ja ye veban a mvean avut, mfu'an a mbon, mvean avut kili ébu asu nnôme nya'a ase, kili ésaman asu nnôm ntômba a 21Kili éla asu étoñe ntômba ése. 22Mia ye ve nnôm ékela asu *njaman abé, nalé ate mia ye bulu e nseme wônan. 23Mia ye ve metuna'a mete, te lañe mvean ô ne ngumba ya mametyé, ñwô ô ne mveane ya nnôm éto. 24Mia ye ve me *môs ôse tañe melu zamgbwa ane bidi ya mimvean mia di'ibane nduan, mi too mbamba ényum e be Nti. Mia ye ve bie, te lañe mimvean mi ne ngumba ya melu mese a mveane woon. 25E môse zamgbwale, mia ye beta sulan asu ya kañe Nti a mia ye bo teke bo ésaé éziñ é ne ngu.
Abô'ô Pantekôt abô'ô bembômô
(Lv 23:15-21; Dt 16:9-12)
26E môse pantekôt, éyoñe mia ye zu ve Nti fôn a nlisi mi ndôme mane kôan, mia ye sulan asu ya kañe Nti a mia ye bo te bo ésaé éziñe ya bisaé mi wô'ô bo éyoñ ése. 27Mia ye ve Nti mimvean mi ne ngumba, mi too mbamba menyum e be nye: beyôm benya'a bebaé, nnôme ntômba wua a bitoñ mintômba bi ne mbu wua zamgbwa. 28Tit ése ba ye ve je a mvean avut, mfu'an a mbon: avut kili ébu asu nnôm nya'a ase, kili ésaman asu nnôme ntômba, 29a kili éla asu étoñ ése ya bitoñ mintômba zamgbwa. 30Mia ye fe ve nnôm ékela asu ya bulu nsem. 31Mimvean mite mise mia ye bebe e mvean ô ne ngumba ya *môs ôse yôp, a mveane ya mefup. Betit mia ye ve, ba ye bo *mvo'é ne selem a mimvean mi woon y'été.
Àwon tá yàn lọ́wọ́lọ́wọ́ báyìí:
Nlb 28: BDCB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible en langue Bulu © L'Alliance Biblique du Cameroun, 2007, 2015.