Nlb 27
27
Nguleya nyoñ élik e be binga
(Nlb 36; Yas 17:3-4)
1Mala, Nôa, Ogla, Milka a Tirsa be mbe bobebinga be Sélôfad, e mone Efer, e mone Galad, e mone Makir, e mone Manasé, e mone Yôsep. 2Binga bete betan be nga zu tebe asu Môze, Eléazar *ntuni, benya bôtô a ngum ékôane bôt ôse, anyiine *nda éndelé bendôba'ane a jô na: 3Ésaa wongan a nga wu e nkôte si; a nji ke bo e nsamba ya ba be nga tebe Nti e ngame yat, ve a nji ke biaé monafam. 4Amu jé jôé ésaa wongan da ye jañ abume bôte dé été, amu na a nji ke biaé monafam? Ajô te va'a bia ngap e bobenyañ b'ésaa wongan été.
5Ane Môze a nga kee ajô dap e be Nti. 6Nde Nti a nga jô Môze na: 7Bobebinga be Selôfad ba bele. Wo ye ve be *ngab élik ézezañe ya bobenyañ b'ésaa wop, a mbe ba ye nyoñ éli'i ésaa wop. 8Wo ye kobô bone b'Israél na: Nge môt a wu te li'i bobefam, ngo jé ja ye nyoñ éli'i jé. 9Nge a nji li'i monaminga, bobenyañ ba ye nyoñ éli'i je. 10Nge a nji bi bobenyañ, bobenyañ b'ésaa ba ye nyoñ éli'i jé. 11Nge a nji bi bobenyañ b'ésaa, môt a dañe nye bebé abume bôte dé nye a ye nyoñ éli'i jé, a nye a ye nyoñe je. Bone b'Israél ba ye bi njôane te ane *atiñ aval'ane Nti a nga bendé Môze.
Yasua a tobane ntyendé Môze
(Dt 32:48-52; 34:1-9; 31:7-8,14-15,23)
12Ane Nti a nga jô Môze na: Betek e nkôl Abarime wuna a yene si ma ve bone b'Israél. 13Wo ye yene je; ve mvuse valé wo ye wu avale monyoñ Arone fe a nga wu, 14amu mi nga biasé abendé dam e *nkôte si ya sin, éyoñ ékôane bôt é nga kobô ma *abé a mia, teke telé ma étyi e mise map éyoñe ya ajô mendim. Mendime ya nkobô ébiasé, e Kadés, e *nkôte si ya Sin.
15Nde Môze a nga kobô Nti a Jô na: 16Nti Emien, Zambe minsisime ya minsône mise, a telé'é ékôane bôte ji môt, 17nyô a kui ôsu viap, a nyô a nyiin ôsu viap, nyô a bo na be kui a bo fe na be nyiin, nalé ékôane bôte Nti ja ye bo te bo aval'ane mintômba mi nji bi mba'ale.
18Ane Nti a nga jô Môze na: Nyoñe Yasua e mone Nun, e môt *nsisim ô too be nye; a wo ye beté wo wôé e be nye. 19Wo ye telé nye asu be Eléazar *ntuni a asu be bôte bese, a wo ye ve nye mebendé mise map me lôô. 20Wo ye kalane nye ngab éziñ ya ngule jôé, nalé bone b'Israél bese ba ye wô'ô nye. 21V'émien a yiane yen Eléazar ntuni; a *ntuni nye a ye sili nkômbane wom a zene ya Urim a tumim. Yasua a bôte bese ba ye wulu biyoñe bise aval'ane mebendé mé me né. 22Ane Môze a nga bo avale Nti a nga bendé nye. A nga nyoñe Yasua a telé nye ôsu be Eléazar *ntuni, a ôsu ékôane bôt ése. 23Nde a nga beté mo mé e be nye, a ve nye mebendé, avale Nti a nga jô Môze.
Àwon tá yàn lọ́wọ́lọ́wọ́ báyìí:
Nlb 27: BDCB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible en langue Bulu © L'Alliance Biblique du Cameroun, 2007, 2015.