2 Ịsamụwẹrị 6
6
 sị Apoti oto Ohomorihi vẹ Ijerusarẹmị
(1 Ịtọ 13.1-14; 15.25—16.6,43)
1Ụmẹ ọnya di Idevidi rẹ nyị Anisirẹrị ẹnị akawụrakahị dị ọ kụ́ wa gụ nị. 2#Kụra 25.22Dị ọnịrị aza anị ẹnẹẹ ene hi ịzị aā hị́ Ibaara ịnị ẹtẹ Ijuda hụrẹ ịzọọ ka ẹnị aa naa sị apoti oto Ohomorihi vẹ nị. Ini oze apoti ọnọọ Ẹnẹyịmavara sị sị ụkata anị ọnịrị ụbanyị zụ̀ nị. Ịzị Ẹnẹyịmavaraā yà vị ana yà ịnị akakana ịzị aā hị́ Ikerubimi nịnị ana yà ịrẹsụ apoti oto Ohomorihi ọnọọ. 3#1 Ịsa 7.1,2É mè tù ịzị Apoti ọnọọ yà, dị ẹ sị ọ tụra ịkẹkẹ ọwọọwa ana a mẹ oni imaaru tura nị. Ẹ́ mẹ̀ raà sị tụ́ ịnị ịkẹkẹ ọnọọ, dị ẹ sị ọ hụụnị eehi Abinadabi ana yà ịnị ataba dị ẹ yaa vẹ nị. Di Uza ọnịrị Ahiyo ezi Abinadabi ẹnị aa zụ̀ ịkẹkẹ ọwọọwa ọnọọ, oze nị. 4Apoti Ohomorihi yà ịnị ịkẹkẹ ọnọọ, dị ahịka Ahiyo ọ yà ọvịdị anị nị. 5Di Idevidi ọnịrị avaba Anisirẹrị ana vọ aa sị avaba ẹngụ ẹnịnịị nyị ẹzẹ, dị ẹ yaa mẹ aahẹ, dị ẹ yaa jị ahẹ dị ẹ yaa sịị sị ụbanyịị yị Ẹnẹyịmavara nị. Ẹ́ mẹ̀ vavọọ aa mẹ aahẹ, di eyee hú ágidibo irenyi-irenyi ọnịrị ịchacha anaā sụ́ ịrẹyị ne beri enyusẹ anaā sụ́ ịrẹyị nị.
6Ẹ́ màa vẹ, ẹ va sị ngụ ịzị eē tụ́ ịsa ịnị aarẹ Inakoni, di imaaru ene ee tura ịkẹkẹ ọnọọ tụ́ ahụ dị aa hyẹdụụ na nị. Di Uza wụsẹ tana ụvọ dị ọ sị za apoti oto Ohomorihi nị. 7Ebira ọnị Uza mẹ ọ sị kụ́ Ẹnẹyịmavara ayị, agụvị ka ọ yị sị ụbanyị yị Apoti ọnọọ. Dị Ohomorihi wụ Uza, di o sú pè Apoti Ohomorihi nị. 8Ayị Idevidi ô du ẹtẹẹtẹrẹ agụvị ka Ẹnẹyịmavara ọ vavọọ kụ́ ayị hi Uza. Hụrẹ ịhị ọnọọ a vana hụrẹ aā hị́ ịzọọ Ịpẹrẹzị Uza (Ịzị a yà kụ́ ayị hi Uza) nị.
9Ịhị ọnọọ angwa Ẹnẹyịmavara ô hị́ Idevidi. Dị ọ ka, “Apoti Ohomorihi ọnọnị, máá zụ sị ọ tụ́ ịda amị aanị?” 10O yi si ka ọnị ọ̀ sị Apoti Ẹnẹyịmavara ne pè ẹngụ tụ́ ịda anị ịnị Ẹkụra Idevidi. Di Idevidi sị Apoti ọnọọ, dị ọ sị ọ há zi oze ini eehi ọnọrụ ana aā hị́ Ọbẹdị Edomi ana vi Anigati, dị ọ sị́ ọ na tụ́ ịzọọ nị. 11#1 Ịtọ 26.4,5Apoti Ẹnẹyịmavara ộ yà ini eehi Ọbẹdị Edomi mẹ ụhwẹ ẹẹta. Dị Ẹnẹyịmavara mẹ ka ò zee yi Ọbẹdị Edomi ọnịrị avaba aneehi anị nị.
12Dị a va kà a yi Idevidi ohinọyị ka Ẹnẹyịmavara aa mẹ ka ò zee yi aneehi Ọbẹdị Edomi ọnịrị avaba ịsa ọnị ọ nyị agụvị apoti oto Ohomorihi ana yà ịda anị! Di Idevidi va na sị apoti oto Ohomorihi hụụ ịda Ọbẹdị Edomi, dị ọ sị ọ va tụ́ ịda anị ịnị Ẹkụra Idevidi nị. Ọ́ mẹ̀ sị ọ aa vẹ, dị aa jẹ nị. 13Aza ana na sị apoti ọnọọ aa vẹ mè ree hu ahụ ịhịnọnyị, dị ọ ka ẹ̀ jẹẹ, dị ọ sị akụ imaaru ọnịrị imaaru ana a pá ka ọ̀ banyị, dị ọ wụ̀ wa dị ọ sị mẹ̀ ịsọvọ yị Ẹnẹyịmavara nị. 14Di Idevidi chire ịharamịra ana a si owu ozoza hi ịta anị, dị aa sị avaba ẹngụ anịị nyị ẹzẹ, dị a sịị sị ụbanyịị yị Ẹnẹyịmavara nị. 15Avọọ ọ maà nyị ẹzẹ dị ọnịrị avaba Anisirẹrị ana vọ sị apoti Ẹnẹyịmavara hịrẹ nọ ịda anị nị. Ẹ́ màa vẹ, di eyee nowu, di eyee hu ọpanyị nị.
16Ápoti Ẹnẹyịmavara màa ngụ ịnị Ẹkụra Idevidi, di Imikari ozi Ịsọọrụ ana vị ọnẹẹ dà eyi gẹ ini ozokete, di ee re ẹtẹ nị. Di o re ka Idevidi ee ji iriga, aa nyị ẹzẹ ọ màa sị ụbanyịị yị Ẹnẹyịmavara nị. Di Imikari ee ro o ịnị ayị anị ka ọnịyẹyẹ Idevidi vị nị.
17Aza ệ sị apoti Ẹnẹyịmavara vẹ, dị ẹ sị ọ tụ́ ịnị ajẹngụ oni Idevidi jị yọ nị. Di Idevidi mẹ̀ ịsọvọ ana aā rị ịra ọnịrị ịsọvọ ana aa gàa rị yị Ẹnẹyịmavara nị. 18Ịjị Idevidi vavọọ sị ịsọvọ ẹnẹẹ mẹ, dị ọ ka Ẹnẹyịmavara Ochẹtẹẹngụ ọ̀ navọ ò zee yị aza ẹnẹẹ nị. 19#1 Ịtọ 16.43Di Idevidi gà ịsọyịrị yị avaba ọkọnị aza ẹnẹẹ nị. Ọnọrụ ọnịrị anẹẹ vị ọnị ọ gà ịsa yị. Ịbụrẹẹdị ọnịrị akara ana a sị ẹtụtụ ịvayịnị jị ne beri Ịbụrẹẹdị ana a sị ẹtụtụ agịga tụ́ ịnị anị ọ vavọọ gà yị wa nị. Ịjị ẹ sị mẹ ta, dị ọzọza aa nọ eehi anị nị.
20Idevidi ọnị ọ rẹ nọ eehi ka ọnị ọ̀ na mẹ̀ aduwa yị aneehi anị. Ọ́ màa na, di Imikari ozi Ịsọọrụ ana vị ọnẹẹ va gẹrị ọ nị. Di Imikari ka, “O! ohinọyị Anisirẹrị, wâ dà mẹ ajịnị kẹnẹ. Aanị ụ mẹ ngwa awuru hi ẹtẹ di ezi anẹẹ ana vị ezi ahụ ezida awụ ee re wu nị. Dị waa mẹ anka ọza kẹnẹ-kẹnẹ avọọ nị.”
21Di Idevidi tụ́ o ohi dị ọ ka, “Ẹnẹyịmavara ộ jị ada awụ tịtẹ dị ọ sị mị rị ohinọyị nị. Ẹ yị nyị ọza ọnị ọ sị ịnị aneehi awụ nịnị, dị ahịka ẹmị ọ si ka ma vị ohinọyị Anisirẹrị ana vị aza anị nị. Ẹnẹyịmavara ọnọọ m maa si ụbanyịị yị nị. Ẹzẹ vị ọnị maa nyị dị maa sịị sị ụbanyịị yọ. 22Mị hyakụ aa sị ẹngụ amịị mẹ ịyẹyẹẹ hu aanị, dị ẹmị ụvọta mẹ ẹngụ amị ka ẹ yị nyị ịsị mị vị. Ama ezi anẹẹ ana vi ezida ezi ahụ amị ọnị wáā kà aanị, ẹnị vị ana vaa sị ụbanyịị yị mị.”
23Avọọ Imikari ozi Ịsọọrụ ọnọọ o yi re ozi ma pooro di o sú.
Àwon tá yàn lọ́wọ́lọ́wọ́ báyìí:
2 Ịsamụwẹrị 6: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.