2 Ịsamụwẹrị 5
5
 sị Idevidi rị ohinọyị avaba Anisirẹrị
(1 Ịtọ 11.1-9; 14.1-7)
1Ẹkụhị ọnya dị avaba Anisirẹrị ve tù Idevidi Íhebirọnị nị. Ẹ́ mẹ̀ vẹ dị ẹ ka, “Wâ yẹ ka anda awụ ị vị nị. 2Ịyẹẹyẹ Ịsọọrụ mẹ̀ vịdị vị ohinọyị ayị, ẹwaā kụ́ Anisirẹrị nọ ịrẹkụ nị. Ẹnẹyịmavara ọ sị ọ kà ka ẹwa vaa tẹsị aza anị ana vị Anisirẹrị nị. Ọ rẹ ka ẹwa vaa vị ohinọyị ẹnịnị nị.”
3Dị ọdọvịdị Anisirẹrị ne tù Idevidi ohinọyị Íhebirọnị ịzọọ, dị ẹnịrị Idevidi hị́ eku yị ẹngụ éyi Ẹnẹyịmavara ịzọọ nị. Dị ẹnịnị sị Idevidi dị ẹ sị ọ rị ohinọyị avaba Anisirẹrị nị.
4 #
1 Ohi 2.11; 1 Ịtọ 3.4; 29.27 Idevidi vị ozi ịrayị ohurẹẹwụ dị a sị ọ rị ohinọyị. Ộ mẹ ohinọyị mẹ ịrayị ẹbẹẹva. 5Ọ mẹ́ yà Ihebirọnị, ộ mẹ̀ ohinọyị Anijuda ịrayị ịhịmba tụra ụhwẹ ịhịnọnyị. Ọ mẹ̀ va na yà Ijerusarẹmị, ọ rẹ mẹ ohinọyị avaba Anisirẹrị ẹnịrị Ijuda ịrayị ohurẹẹwụ tụra ẹẹta.
Idevidi ộ kụ́ ịrẹkụ na rị Ijerusarẹmị
6 #
Ijos 15.63; Ọdọ 1.21 Ẹkụhị ọnya ohinọyị ẹnịrị aza anị ệ nọ Ijerusarẹmị, dị ẹ kụ́ ịrẹkụ ne tù Anijebusi ana ra ịzọọ nị. Anijebusi ene hi ịzọọ vi ene ro ka Idevidi ọ yị va zụụ rị ẹkụra ọnọọ. Dị ẹ kà yị Idevidi ka, “Wẹ yị va zụụ ngụ ịzẹnị. Ogu eyi ọnịrị oswahụ ayị, ệ hyakụ zụ dụ wụ varẹma.” 7Ama Idevidi ọ va sị ịzị isojaā tẹ̀ rị. Ịzọọ aā hị́ Ẹkụra Idevidi nị.
8Ịhị oni Idevidi maanị kụ́ ịrẹkụ na rị aanị, dị ọ ka ọza ana àa wụ Anijebusi, ọ̀ tụ́ wa ụvọ wọrọ ọba ịzị enyi eē zii sìi hi ẹtẹ. Ọ kà ẹẹmẹ ẹnẹẹ ana sị mẹẹ ogu eyi ọnịrị oswahụ avọọ vị ọnị ọnị Idevidi nyị ịhyẹrẹ anị. Agụvị avọọ a sịị̄ kà a ka, “Ogu eyi ọnịrị oswahụ ẹ yị vaa ngụ ini irehi Ẹnẹyịmavara.”
9Idevidi mẹ̀ raà sị ịrẹkụ rị aha oni isoja tẹ, di ọ kụkụ ra ịzọọ, dị ọ hị́ ịzọọ “Ẹkụra Idevidi.” Dị Idevidi jị ọvọ kara ẹkụra ọnọọ dị ọ dà irehi ịzị isojaā tẹ̀ hi ịnị anị nị. 10Idevidi vị ana a yịị nyị ụkataa hu avọọ agụvị ka Ẹnẹyịmavara ana vị Ohomorihi Ochẹtẹẹngụ vị ana jẹẹ ịrẹma anị.
11Ẹkụhị ọnya á nyị ohinọyị Ịtaya ọnya aanị ana aā hị́ Ihirami. Ộ tụ́ ezi ahụ anị dị ọ ka ẹ̀ kụ́ ọchị ẹbanyị, ẹbanyị ne beri ikahunta ọnịrị aza anaā sịị ịrẹtaa dà irehi nọ ịda Idevidi nị. E mè tù ịzọọ dị ẹ sị dà irehi ohinọyị yị Idevidi nị. 12Idevidi ọ sị yẹ ịjọnọọ ka Ẹnẹ ẹ yị mā vara ọ raà sị ọnị jẹẹ anka ohinọyị Anisirẹrị. Ộ yẹ ka Ẹnẹyịmavara ọ raà hụ agụvị Anisirẹrị mẹ ka ohinọyị ọnị ọnị aa mẹ ọ̀ nyị ụbanyị.
13Ộ dà kụ di Idevidi hụrẹ Ihebirọnị nị. Ọ́ mẹ̀ sị hụụ ịzọọ, dị ọ rẹ varẹma nyị onyeehi ọnịrị ọnẹẹ hu avọọ ọ́ mẹ̀ yà Ijerusarẹmị nị. Anẹẹ ẹnẹẹ ẹ vana ma ezi anọrụ ọnịrị anẹẹ tụ́ ini ezi anịị yọ. 14Ịrẹha ezi ana a ma yọ ịzọọ yị: Isamuwa, ọnịrị Isobabi ne beri Inatanị ọnịrị Isoromọnị. 15Dị ọsa ẹnị rị Ibihari ọnịrị Eriyada ne beri Erisuwa ọnịrị Ihepegi nị. 16Ana vọ ẹ rị Erisama ọnịrị Eriyada ne beri Eripereti nị.
Idevidi ô hu Anamarẹkị ẹtẹ éyi ịrẹkụ
(1 Ịtọ 14.8-17)
17Anihwirisiti mẹ̀ wụ́ ka a raà si Idevidi rị ohinọyị Anisirẹrị, dị ẹ nyayịnẹ hara ẹnya ịrẹkụ di e si hu ee nee sì ọ nị. Idevidi ộ wụ́ ka ẹ yaa vẹ, dị ọ na tẹ̀ ịzị isoja naa tẹ nị. 18Anihwirisiti mè tụ́ ịzọọ, dị ẹ̀ chaka hi ini ozi Irehwayimi nị. 19Di Idevidi va họ̀ Ẹnẹyịmavara use ka ọnị ọ́ọ́ kụ́ ịrẹkụ na dụ Anihwirisiti nịnị? Dị ọ rẹ họ̀ ọ ka ọ́ọ́ vaa sị waa yị ọnị ka oni ò huna wa. Dị Ẹnẹyịmavara kà ọ̀ọ na ka Anihwirisiti vị ọnị ọnị aa sị yọọ hú ẹtẹ.
20Di Idevidi ne tù Anihwirisiti Ịbaarị-Iperazimi nị. Di o hú Anihwirisiti nịnị ẹtẹ éyi ịrẹkụ ịzọọ nị. Di Idevidi ka éyi mẹ̀ẹ chakaa kú aha avọọ, avọọ Ẹnẹyịmavara mẹ̀ ya eyi anị chaka kú ọnịvị anị nị. Agụvị avọọ dị a kụkụ aa hị́ ịzọọ “ọga ộ chaka kú wa” nị. 21Di Anihwirisiti navọ ori ẹnịnị hi ịzọọ, di Idevidi ọnịrị aza anị kụ́ wa aa na nị.
22Ẹkụhị ọnya di Anihwirisiti nịnị rẹ vẹ, dị ẹ rẹ chaka hi ini ozi Irehwayimi nị. 23Di Idevidi rẹ họ̀ Ẹnẹyịmavara kà ọnị ọ́ọ́ kụ́ ịrẹkụ ne tù wa nị. Dị Ẹnẹyịmavara kà asị ọ vavọọ ne tù wa ọvịdị-ọvịdị ama ọ̀ kụ́ aza anị di è jesi kara wa, dị ahịka oze ọvịdị ọchị ịbarịsamị ẹ zị nyima ịrẹkụ nị. 24Dị Ẹnẹyịmavara kà ẹ̀ẹ maanị wụ́ kẹnẹ ka aa nyị ịsaa zị ụsẹ ịrẹsụ ọchị ịbarịsamị ọnọọ, ẹ wụsẹ hu ahụ hụrẹ ẹtẹ ka Ẹnẹyịmavara ọ raà dọ ọvịdị ẹnịnị aa na wụ̀ isoja Anihwirisiti nịnị. 25Dị ahịka Ẹnẹyịmavara mẹ̀ kà Ídevidi rẹ mẹ nị. Dị ọ vavọọ wụ̀ Anihwirisiti nịnị huu hụrẹ Ịgẹba na ngụ Ịgẹzẹrị nị.
Àwon tá yàn lọ́wọ́lọ́wọ́ báyìí:
2 Ịsamụwẹrị 5: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.