1 Ịsamụwẹrị 31
31
Usu Ịsọọrụ ọnịrị ezi anị
(1 Ịtọ 10.1-12)
1Anihwirisiti ẹ raà gẹ Anisirẹrị ịrẹkụ. Anisirẹrị ee zwe, dị a wụ̀ aza ẹnyị ẹnịnị hi ẹtẹ ịrẹsụ ataba Igiribowa nị. 2Ụvọ Anihwirisiti nịnị ee huna Ịsọọrụ ọnịrị ezi anị. Dị ẹ za Ijonatani ọnịrị Abinadabi ne beri Imarikisuwa ezi Ịsọọrụ dị ẹ wụ̀ wa nị. 3Ịrẹkụ o si nyị anyị kara Ịsọọrụ, dị aza eneē ne ọpa sị kara Ịsọọrụ, dị ẹ tụ̀ ọ ụnava odivi nị.
4Dị Ịsọọrụ hị́ ọza anaā za ẹnya ịrẹkụụ gụ ọ dị ọ ka ọ̀ tụ̀ ụhwọ anị dị ọ̀ sị wụ ọnị nị. Ịsọọrụ ka à yị vị avọọ ẹẹmẹ ẹnẹ ẹ̀ yị ma jị ụvẹvẹnẹ aanị va wụ ọnị, dị ẹ yaa sị ọnịị mẹ ịyẹyẹ. Ama angwa ee hi ọza ọnọọ anaā za ẹnya ịrẹkụụ gụ Ịsọọrụ, ọ yị nyayịnẹ mẹ ịsị Ịsọọrụ ka ọ̀ mẹ. Dị Ịsọọrụ ọnị ụvọta tụ̀ ụhwọ anị, dị ọ sị wụ ẹngụ anị nị. 5Ịjị ọza ọnọọ anaā za ẹnya ịrẹkụ gụ Ịsọọrụ aanị re ka Ịsọọrụ ô wusu, dị ọnị rẹ tụ̀ ụhwọ anị dị ọ sị wụ ẹngụ anị nị. 6Avọọ Ịsọọrụ ọnịrị ezi anị ne beri ọza anaā za ẹnya ịrẹkụụ gụ ọ ọnịrị avaba aza anị mè su ịnị ẹkụhị ọnya nị.
7Â nyị Anisirẹrị ene hi ini ozi ịzọọ, dị ẹnyị hi akẹnẹ Okuha Ịjọdanị nị. Ê re ka isoja Anisirẹrị ẹ kụ́ zwe, di Ịsọọrụ ọnịrị ezi anị ẹnị re wusu nị. Ẹ mẹ̀ vavọọ re e, dị ẹ hụụnị ẹkụra ẹnịnị di e si zwe nị. Di Anihwirisiti kụkụ ne hi ịzọọ nị. 8Eyinẹhẹ anị, dị Anihwirisiti na ka ẹnị ẹ̀ na ngwa awuru isoja ene su nị. Ẹ mẹ̀ na, di e ne tù ka Ịsọọrụ ọnịrị ezi anị ẹyịta ê wusu va hi ịnị ataba Igiribowa nị. 9Dị ẹ za Ịsọọrụ, dị ẹ jị ọ ịrẹsụ, dị ẹ ngwa a awuru ọnọọ tụ́ ngụ avaba ẹtẹ Anihwirisiti zị, ka à na kà a ini eehi ori ẹnịnị, dị ẹ̀ rẹ kà a yị aza ẹnịnị nị. 10Dị ẹ sị awuru ịrẹkụ Ịsọọrụ ọnọọ, dị ẹ sị na tụ́ ini eehi ori ẹnịnị ana aā hị́ Asịtọrẹtị nị. Dị ẹ si oku Ịsọọrụ, dị ẹ sụ́ ọ gẹ ọvọ ana yà Ịbẹtị-Isani nị. 11Anijabesi-Igiriyadi ệ wụ́ ịsị Anihwirisiti nịnị mẹ Ịsọọrụ. 12Dị ọmụha ẹnịnị ana nyị ayị ngụ ịrahụ nọ Ịbẹtị-Isani nị. Dị ẹ na sị oku Ịsọọrụ ọnịrị ezi anị hụụnị ọvọ ana yà Ịbẹtịsani, dị ẹ nọ, dị ẹ nọ Ijabesi-Igiriyadi, dị ẹ na rị wa ịra ịzọọ nị. 13Dị ẹ varẹma kụ́ ẹchụkụ ẹnịnị, di e ne e tụ́ iruvo ọchị itamarisiki ana yà Ijabesi nị. Dị ẹ jị òrèrè ẹnịnị dị ẹ̀ yị rị ịsa mẹ ẹkụhị ịhịmba nị.
Àwon tá yàn lọ́wọ́lọ́wọ́ báyìí:
1 Ịsamụwẹrị 31: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.