Romains 16
16
Ijaam
1M dū ti-niisal Fooyibee un tūǹ ditundi Kriisitoo nikitil din bí Saŋkireeyee#16.1 Saŋkireeyee: kpèè Atuun 18.18. kansikinee ki ŋá ni-ŋaan. 2Fōōmaan-u ti-Dindaan pu kii Unimbɔti nib nín máaǹ kí nīn fòol̄ tɔb puee. Ní ajan ŋin kɔkɔ poon an bàlifī yii ní tūtuǹ-uee, ní tūtum̀maan-u. Míǹ ní u mun jòoń binib tikpil, ki kpáaǹ man m-ba.
3Ní jāam̀ Priisiil nì Akiilasi#16.3 Priisiil nì Akiilasi: kpèè Atuun 18.2., m-tɔntɔnjutiibi Yeesu Kriisitoo tundin. 4Bi kíí kí dū bi-ba kí tīī ŋkúm man ŋmátí. An kaa sá man baba di làá jāam̀-bi an pu, Kriisitoo nikitiŋ ŋin kaa sá Juuda yabee kɔkɔ mun làá jāam̀-bi. 5Ní jāam̀ Kriisitoo nikitil din kpáfí bi-dumpuee mun. Ní jāam̀ Eepayineeti, m-bɔɔ un m néeńee, un péé péé ki fōō ki kíí Asii tiŋkinee. 6Ní jāam̀ Maarii un túń ditundi tikpil ki tīī-nee. 7Ní jāam̀ Androonikuusi nì Juniyaasi, man nì bin pēē kubaabinaatoou ki pēē sarka muee. Yeesu kpambaliŋ kansikinee, bi tɔ́-bi tikpil. Bíǹ péeǹ man ki fōō Kriisitoo ki kíí.
8Ní jāam̀ Ampiliyatuu, m-bɔɔ un pu maa mɔ̄ ti-Dindaan puee. 9Ní jāam̀ Urbeen, ti nì un kpáfí ki tūǹ ditundi Kriisitoo puee, kí jāam̀ m-bɔɔmɔnti Sitaku mun. 10Ní jāam̀ Apeeleesi, un jíń falaa Kriisitoo pu, kaa lítèe. Ní jāam̀ Ariistoobul dicaŋkun yab. 11Ní jāam̀ Eeroodiyoon, man nì un pēēyee. Ní jāam̀ Naasiisi dicaŋkun yab bin sá ti-Dindaan yabee. 12Ní jāam̀ Triifeeni nì Triifoosi, bin tūǹ ditummɔntiil ki tìì ti-Dindaanee, kí jāam̀maan ti-niisamɔnti Peersiidi un túń atummɔnti tikpil ki tīī ti-Dindaanee. 13Ní jāam̀ Rufusi#16.13 Rufusi : kpèè Maar 15.21. un ti-Dindaan lútì ú tɔ̄ u-tundee, kí kpáàa jāam̀ u-na un kpántì ma mun nee. 14Ní jāam̀ Asiŋkiltu nì Fileegɔn nì Eermeesi nì Patrooba nì Eermaasi, nì ti-nabiyaamu mun bí bi-ceeyee. 15Ní jāam̀ Filooloogu nì Julii nì Neeree nì u-niisal Oolimpa nì Unimbɔti yab bin kɔkɔ bí bi-ceeyee.
16Ni-kɔkɔ ń jāam̀maan tɔb tiŋan kii nnabiyaamuee. Kriisitoo nikitiŋ kɔkɔ jáamiń-ni.
Tibɔkpaafikaal tijoolkaal
17Nnabiyaamu, m kpáafí-ni ní nīn nyí nì ni-ba nì bin fá tibɔmɔntiil tin bi dàkā-nee ki cāabìń diyakatil, ki yàntī binib lítée. Sútí kí wàatīmaan bidambi. 18An nibee kaa nóó ti-Dindaan Kriisitoo. Bi nyàab̀ bi-ba jim ní#16.18Dūú ŋmàntī nì Fiil 3.19., ní ki sòoǹ anyɔɔbummɔɔn ki kíiĺ binib, ki yàntī bin nyil kaa náaǹee lítí. 19Báà ŋma nyí ni nín tɔ́ ti-Dindaanee, an puee, m-pɔbil sɔ̀m̀ ni-pu. Ama m là ní nīn sá bin nyí ki ŋáań tiŋanee, kí nīn sá bin bí circir, kaa là ikpitee. 20An kaa làá yúntí, Unimbɔti un tìì ŋgbansɔŋfee làá yàntī ní tāā kí mátí Sitaan.
Ti-Dindaan Yeesu ŋanti ń nīn bí ni-pu!
21M-tɔntɔnjuti Tiimootee#16.21 Kpèè Atuun 16.1-3. jáamiń-ni. Lusiyusi nì Jasɔn nì Soospatee, man nì bin pēēyee, mun jáamiń-ni.
22Man Teertiyusi un ŋmàn̄ kugbɔŋu neeyee mun jáamiń-ni ti-Dindaan pu.
23Gaayusi un dumpu m kóòyee, nì un dumpu Kriisitoo nikitil kɔkɔ kpáfée, jáamiń-ni. Eelasitu un ŋúb́ bi-tiŋki nimbiliŋee, nì ti-nabiki Kaartusi jáamiń-ni#16.23 Gaayusi : kpèè Atuun 19.29, 1 Kɔra 1.14. - Eeraasitee : kpèè 2 Tiim 4.20..
[ 24Ti-Dindaan Yeesu Kriisitoo ŋanti ń nīn bí ni-kɔkɔ pu. Ameeni#16.24 Uyakatikaa nee kaa bí tigbɔŋkpikil tikpil poon..]
Tí pàkàmaan Unimbɔti!
25Tí nyɔ̄ŋkìmaan Unimbɔti! Nì tibɔmɔntiil tin m sòoǹ Yeesu Kriisitoo puee, Unimbɔti cáá mpɔn kí báań-ni inyaan nnimbɔtisan poon. Doooo ŋyuntikpikee, tibɔtee nìn bí dibalin, Unimbɔti kaa nìn dáá bīitì ti-pu, 26ama kɔŋkɔnnee u nyántì-tì mpaampiin pu. U dī tigbɔn tin u-bɔnaatiliibi ŋmàn̄ ki nāatì u-bɔtee pu ki yāntì atimbun kamaa nib béè ti-pu án nín làá ŋá pu bí fōō kí kíí kí nīn kíǹ ki tɔ́ Unimbɔtee. Jaanjaan Nimbɔtiu nín là puee dee.
27Míǹ puee, Unimbɔti un baba sá uciŋfitee ń ká tinyool Yeesu Kriisitoo pu kí nīn pée cá jaanjaan! Ameeni.
Àwon tá yàn lọ́wọ́lọ́wọ́ báyìí:
Romains 16: BASSARDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
BIBLE EN N'TCHAM (Bassar) © Alliance Biblique du Togo, 2013.