Romains 15
15
Ŋá tin làá fáatiǹ a-jutee
1Timbi bin ká mpɔn Unimbɔti saŋŋu poonee, ti máaǹ kí tūtuǹ bin kaa láá ká mpɔnee kí jī kimɔtii bi-pu, kí taa nín̄ nyàab̀ min làá nīn fáatiǹ-tee. 2Báà ŋma ń nyàab̀ min làá tūtuǹ u-jutee mmɔntiim ú báań inyaan. 3Di sá yii Kriisitoo kaa nìn nyàab̀ kí ŋá min fáatì-uee, ama, kii an nín ŋmàn̄ puee yii: «Asiibil ŋin bi nìn sìí sii Unimbɔtee, lítì man pu#15.3 Kpèè Ilan 69.10..» 4Di sá yii tin kɔkɔ bi nìn ŋmàn̄ Unimbɔti gbɔŋku poon dooooyee sá kí dàkà-ti tí nīn cáá kimɔtii nì kunyannyaau, kí nīn máká Unimbɔti pu. 5Unimbɔti un di tìì kimɔtii nì kunyannyaauee ń tūtuǹ-ni ní ŋá ubaanti kii Yeesu Kriisitoo nín là puee. 6Ni-kɔkɔ ń ŋmā kí kpāfì kinyɔɔbaantii kí nyɔ̄ŋkì Unimbɔti un sá ti-Dindaan Yeesu Kriisitoo Baayee.
Tibɔmɔntiil sá ki tīī anibul kɔkɔ
7Míǹ puee, kii Kriisitoo nín fōō-ni puee, ní nīn fòol̄maan tɔb án tīī Unimbɔti tinyool. 8An taapu sá yii Kriisitoo dɔ́miń Juuda yab kansikin ki túń ditundi ki ŋá min Unimbɔti nìn pōoǹ ki tīī bi-naanjabee ki dàkā yii Unimbɔti sá deedeedaan, 9ní ki dɔ́miń bin kaa sá Juuda yabee mun ń nyɔ̄ŋkì Unimbɔti u-saasɔl pu, kii an nín ŋmàn̄ puee, yii:
«An pu ní m làá nyɔ̄ŋkì-si atimbun kansikin,
kí gāā ilan kí pàkà a-yindi.»
10An gíti ŋmàn̄ yii:
«Atimbun, fàal̀maan nì dinibul din Unimbɔti lútèe!»
11An gíti tí ŋmàn̄ yii:
«Nimbi atimbun kɔkɔ ń nyɔ̄ŋkì ti-Dindaan,
ní anibul kɔkɔ ń pàkà-u!»
12Yeesaya mun nìn lī yii:
«Jeesee naantiiu ubɔ làá dāan̄,
u làá dāá yīkì kí jī atimbun kɔkɔ pu dibeel,
ní atimbunee kɔkɔ làá dāá nīn máká u-pu#15.12 B. 9Ilan 18.50, 2 Sami 22.50. - B. 10: kpèè Ditee 32.43. - B. 11: Ilan 117.1. - B. 12: Yees 11.10..»
13Unimbɔti un tìì dimákalee ń gbéeǹ-ni dipɔɔpindi kí tīī-ni ŋgbansɔŋfi mmɔntiimin ni nín fōō u-bɔti ki kíí puee, án nín làá ŋá pu u-Fam pɔŋŋu ń yàntī ní nīn cɔ́tí u-pu tikpil tikpilee.
Pɔɔl bíi sòoǹ u-tundi bɔti
14M-nabiyaamu, man m-ba nyí yii ni sá binib bin tiŋan gbí ni-pɔbiliŋ, ki nyí tin kɔkɔ ni máaǹ kí nīn nyée, ki ŋūǹ kí nīn sáŋkí tɔb muee. 15Nì míǹ kɔkɔee, m ŋmàn̄ ki cántì ajan aba, kaa fāŋkì kí fàtīí téetí-ni tin ni nìn nyí dooooyee. M yaa ŋmàn̄-ni mimmee, an sá diyimɔɔl din Unimbɔti pú-mi 16ḿ nīn sá Yeesu Kriisitoo tɔntɔnliu bin kaa sá Juuda yabee ceeyee pu. Unimbɔti dū Tibɔmɔntiil disoondi ki ŋúbiǹ-mi, an ŋman kii bisaraaŋaliibi tundi ní m bíi tūǹee, ḿ ŋmā kí dū bin kaa sá Juuda yabee kí tīī Unimbɔti, u-Circir Fam ń yàntī bí nīn sá saraamɔnti un làá fáatí-uee. 17Man nì ti-Dindaan Yeesu Kriisitoo nín ŋá ubaantee puee ní m ŋūǹ kí nīn gàafī nì ditundi din m tūǹ ki tìì Unimbɔtee pu. 18Di sá yii maa làá wàan̄ kí lì tiba an yaa kaa sá tin Kriisitoo dī m-pu ki ŋá, ki cáań binib bin kaa sá Juuda yabee ń nīn tɔ́ Unimbɔtee. Kriisitooyee di yāntì m sòon̄ anyɔɔbun ki túń atuun 19ki ŋá tidaandi nì maamaacib, nì Unimbɔti Fam pɔŋŋu. Míǹ ní m sòon̄ Tibɔmɔntiil tin sá Kriisitoo yatee an kɔkɔ, ki yōoǹ Jeerusaleem ki dāa sāā Iliirii tiŋki. 20M pɔ̄ɔntí m-ba kí sòoǹ Tibɔmɔntiilee laakin binib kaa láá gbìl̄ Kriisitoo puee, án nín làá ŋá pu ḿ taa mā kí tɔ́kɔń laakin biba nìn kíĺee. 21Míǹ ní m ŋá kii an nín ŋmàn̄ puee yii:
«Binib bin cee baa sòon̄ u-puee
làá dāá ká-u,
bin bin kaa nìn gbìl̄ u-puee
làá dāá gbìl̄ taapu.»
Pɔɔl là kí cùú màntì Room yab pu
22Ditundi gbanti pu ní m mākafì miŋa nì miŋa kí dāan̄ ni-cee ní kaa ŋúń. 23Kɔŋkɔnnee, maa ti cáá ditundi diba ntimu gbanti poon. M baasii nyàab̄ kí dāan̄ ni-cee abin kupaau sèé. 24M yaa làá cù Eespaanyee, see ḿ dīń ni-cee, man nì ni ń kàl̄, ní kpáàa tūtuǹ-mi ḿ cù kitiŋ gbantin. Mimmee m làá ŋmā kí kàl̄ ni-cee ŋyunti ŋubɔ fiii an mɔ̄ɔkiǹ-mi. 25Kɔŋkɔnnee, m dá láá cá Jeerusaleem kí tɔ̄ ditundi diba kí tīī Unimbɔti yab bin bí niinee. 26Kun puee Kriisitoo yab bin bí Maseeduwaan nì Akayee kpáfì ki tɔ́ animbil kí tūtuǹ Kriisitoo yab bin bí Jeerusaleem ki sá bisoodambee. 27Bíǹ bi-ba di lēē yii bi làá ŋá míǹ, ní an lafun máaǹ bí ŋá-bi míǹ, kun puee Kriisitoo yab bin bí Jeerusaleemee dū Tibɔmɔntiil ki yākatì nì bi. Míǹ puee, an máaǹ bi mun ń dū bi-wanti kí tūtuǹ-bi#15.27 B. 25-27: dūú ŋmàntī nì 1 Kɔra 16.1-4, 9.11, 2 Kɔra 8-9.. 28M yaa dū inannakan in bi nākaǹní-mee ki dūu tīī-bi, ki kpēē tibɔti gbanti ki dóòyee, m làá dīń ni-cee, ní kí nín nìkī Eespaanyi. 29M nyí yii Kriisitoo làá bìin̄ m-dāantam ni-cee pu án nīn mɔ̄ tikpil.
30Ama, nnabiyaamu, m mèé-ni ti-Dindaan Yeesu Kriisitoo nì dineendi din Circir Fam tììyee pu, ni-nimbiliŋ ń nīn máǹ ŋwimmeem pu. Ní nīn mèé Unimbɔti ki tútúǹ-mi, 31ḿ ŋmā kí nyā Juudee yab bin kaa fōō ki kííyee ŋaan, ní Unimbɔti yab bin bí Jeerusaleemee mun ń fōō nì dipɔbil diba ditutundi din m cáǹ kí tīī-bee. 32Míǹ ní, Unimbɔti yaa kíí, m làá ŋmā kí bàń ni-cee nì dipɔɔpindi man nì ni ń kàl̄ ḿ ŋùŋfì. 33Unimbɔti un tìì ŋgbansɔŋfee ń nīn bí ni-kɔkɔ cee. Ameeni.
Àwon tá yàn lọ́wọ́lọ́wọ́ báyìí:
Romains 15: BASSARDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
BIBLE EN N'TCHAM (Bassar) © Alliance Biblique du Togo, 2013.