SAN MATEO 24

Tupao oyemboaita vae regua

(Mc 13.1-2; Lc 21.5-6)

1Jesús oë tupao güi. Jare jaema ojo yave jemimboe reta oyakatu jese oechauka vaerä chupe tupao jare opaete o reta joko pegua. 2Jare Jesús jei chupe reta:

—¿Peecha pa peï opaete kuae reta? Añete che jae peve, ngaraa opɨta metei ave ita ïru ita iárambo. Opaeteita ko oyemboai opɨta.

Kañɨmaa reta kañɨtei regua

(Mc 13.3-23; Lc 21.7-24)

3Jesús oguapɨ oï ramboeve ɨvɨtɨ Olivo pe, jemimboe reta oyakatu jese jae retaño ñogüɨnoi yave:

—Emombeu oreve, ¿kërai yave pa kuae oyeapota?, jare ¿këraita pa roikuaa reyu yeta ma vae regua jare kañɨtei regua?

4Jayave Jesús jei chupe reta:

—Peyeandu, agüɨye vaerä kia pembotavɨ. 5Echa yogüeruta jeta cheree re jei reve: “Che ko jae Cristo.” Jare jeta yae ko ombotavɨta vae. 6Peenduta jërakua ñeraro reta. Ërei agüɨye pekɨɨye. Kuae susere reta oyeapo ñotai ko. Ërei ngatu ndei vɨteri ko oväe kañɨtei 7Echa opüata oyoe tëtaguasu ïru tëtaguasu ndive jare mborookuaía ïru mborookuaía ndive, jare oimeta mbaerasɨ ovakatu vae, karuai reta jare ɨvɨkana oipota rupi. 8Ërei kuae tembiporara reta ko oyemboɨpɨ ramo oï.

9Jayave ïru vae reta pemeeta oiporaraukata peve vae reta ipo pe, peyeyukaukata jare peñemotareɨukata opaete vae reta pe chereko pegua.#Mt 10.22. 10Jare jeta vae oyerova yeta Tumpa güi, oñomee retata jare oñomotareɨta. 11Jare jeta ñeemombeuaraanga reta oñemopüata, jare jeta yae ko ombotavɨta vae. 12Ikavimbae vae jeiete yae jeko pegua, ngaraa ma oporoaɨu vae. 13Ërei ikueraimbae vae, oyemboasaukata ko.#Mt 10.22. 14Jare kuae ñee ikavi vae Tumpa iporookuaía pegua oñemoërakuata opaete ɨvɨ rupi, opaete ɨvɨ pegua reta oendu vaerä. Jayave outa kañɨtei.

15Jare peechata ikavimbae yae oyeapo vae ñemombeúa Daniel omoërakua vae#Dn 9.27; 11.31; 12.11. (omongeta vae toikuaa.) 16Jayave Judea pegua reta totekuarai ɨvɨtɨ guasu kotɨ. 17Jare o iárambo ipe kavía pe oï vae, agüɨye togüeyɨ jo pe güɨraja vaerä mbae ave. 18Jare iko pe oï vae, agüɨye toyerova ye güɨraja vaerä jemimonde iarambogua.#Lc 17.31. 19¡Paravete! Oiporara yaeta jókuae ara reta pe ipurúa vae reta jare imembɨ ndei raɨ vae reta. 20Peyerure Tumpa pe agüɨye vaerä petekuarai iroɨguasu iara pe ani ara mbutuu pe. 21Echa jókuae ara reta pe oimeta tembiporara guasu yavaetegüe ɨvɨ pegua reta pe. Mbaetɨi jókuae nunga iyɨpɨ güive#Dn 12.1; Ap 7.14. añave regua vae, jare ngaraai oime ye jókuae nunga. 22Jare yandeYa mbaetɨ omboapɨ jókuae ara reta yave, ngaraa etei oime oasayepe vae. Ërei jembiparavo reta jeko pegua omboapɨta jókuae ara reta.

23Güɨramoi jókuae ara reta pe kia jeita peve: “Mase, ko oï Cristo”, ani jeita “mase, pe oï Cristo.” Agüɨye perovia jese. 24Echa opüata jeta Cristo jaanga reta, jare ñeemombeúa jaanga reta. Jare jae reta oyapota jeta mɨakañɨ reta tuichagüe, oporombotavɨ vaerä, jare ipuereta vi ombotavɨ Tumpa jembiparavo reta ave. 25Mase, amombeu kavi voi ma ko aï peve kuae, ndei oyeapo mbove.

26Jayave ïru vae reta jei yave peve: “Mase, oime oï ñuu pe”, agüɨye pekua, ani jei yave peve: “Mase, oime ko kuae o pe oï”, agüɨye perovia. 27Echa ama overa vae oyekuaa opaete rupi. Jökoraita vi che Kuimbaerä ayeapo vae#Lc 17.23-24. ayekuaa ayu ye yave.

28Echa maerëogüe oïa pe oyemboatɨ uruapúa reta.#Lc 17.37.

Kuimbaerä oyeapo vae ou yeta vae regua

(Mc 13.24-37; Lc 17.26-36; 21.25-36)

29“Opa tembiporara guasu oasa güire, kuaraɨ oyembopɨtumimbita,#Is 13.10; Jl 2.10,31; 3.15; Ap 6.12. jare yasɨ ngaraa ma jembipe,#Is 13.10; Ez 32.7; Jl 2.10; 3.15. jare yasɨtata reta oata ara güi,#Is 34.4; Ap 6.13. jare opaete ara rupi ñogüɨnoi vae reta okanata.#Jl 2.10. 30Jare oyekuaata mbae ara re che Kuimbaerä ayeapo vae ayu ye chembaepuere reve jare cheyemboetea yae reve yave. Jare opaete ñemuña reta Israel pegua ipɨatɨtɨta chereecha ayu amapɨtu re yave.#Dn 7.13; Ap 1.7. 31Jare amondota chearaɨgua reta jemimbɨguasu omoñee reve güeru vaerä aiparavogüe reta opaete ketɨ ketɨ güi.

32Tambojaanga peve ɨva re. Ɨva omboɨpɨ ma jokɨ yave, peikuaa ko oyearo ma ama iara. 33Jökoraiño vi pe reta peecha yave opaete kuae mbaembae oasa, peikuaata che köi yae ma ko öke pe aï. 34Añete che jae peve, kuae ɨvɨ pe añave yogüɨreko vae reta, ngaraa opa omano ndei opaete kuae mbaembae oasa mbove. 35Ara jare ɨvɨ opata ko, ërei cheñee reta ngaraa opa.

36Ërei mbaetɨ kia ave oikuaa mbae ara pe ani mbae ora pe kuae oasata vae, araɨgua reta ave mbaetɨ oikuaa, jaeño cheRu oikuaa. 37Noé oiko yave ɨvɨ pegua reta ndive oasa rami.#Gn 6.5-8. Jökoraita che Kuimbaerä ayeapo vae ayu ye yave. 38Echa ndei ɨporu guasu ou mbove, ɨvɨ pegua reta iarete jare okau reteiño yogüɨreko, omenda reta jare oyomomenda reta Noé oike regua arca pe. 39Jare mbaetɨ oikuaa reta, oväe regua ɨporu guasu. Jare opa oyuka reta.#Gn 7.6-24. Jökoraita ko che Kuimbaerä ayeapo vae ayu ye yave. 40Jókuae ara mókoi kuimbae ñogüɨnoita ko pe. Metei oyererajaukata jare ïru oyeeyata. 41Mókoi kuña ombaesota ñogüɨnoi metei angúa pe. Metei oyererajaukata jare ïru oyeeyata.

42Jáeramo peäro avei. Echa mbaetɨ peikuaa mbae ora pe che peYa ayu yeta vae. 43Mase: Metei o iya oikuaa yave mona mbae ora pe outa imonda vae omaeñomi, oärota tëi ko jare ngaraa ko omaeño imonda vae omaeño oike jo pe. 44Jáeramo pe reta peñemokätɨro, echa che Kuimbaerä ayeapo vae ayu ye peparanoe.#Lc 12.39-40.

Tembiokuai reta jeko kavi vae jare jeko kavimbae

(Lc 12.41-48)

45Metei oyeokuai vae jeko kavi jare oyeandu katu reve vae pe iya oeya ipo pe omee vaerä ïru tembiokuai reta pe jembiurä iora pe kavi. 46Oyerovia ko jókuae tembiokuai, iya ou ye oväe yave, oparavɨkɨ oï vae. 47Añete che jae peve, iya omeeta ko chupe oyangareko vaerä opaete imbaembae re. 48Ërei jókuae tembiokuai jeko kavimbae jei yave iyeupe: ‘Cheya ngaraa ou ye jarembae.’ 49Jare omboɨpɨ oinupa iñeïru tembiokuai reta, okaru jare okau ikause vae reta ndive. 50Jare iya ou yeta oväe jókuae tembiokuai oäroä jare oyangarekoä etei oï yave. 51Iya oiporarauka yaeta chupe jare omondota oiko vaerä opaete ïru jova mókoi vae reta ndive. Joko pe oyaeota jare jäi ombokɨrɨrɨuta.

موجودہ انتخاب:

SAN MATEO 24: GUABD

سرخی

کاپی

موازنہ

شئیر