Yunus Uram 2
2
Yunus biryi Er Iya Erebdobnyi bisi uram sisikoka molonmou uram deyok
2:1-10
1Yunus bira a mekinaia mundu umbura mabmou ai aryi er Moloramunyi Er Iya Erebdobnyi bisi molobmou. Ara, ato eboka uram sisikoka molobdobmou,
2“Ni mambul weik kubmanou talak aryi,
niryi Er Iya Erebdobnyi bisi nabmakise.
Ba, Kanci nisi uram dekeiboka lebdeibmanoumwe.
Nira, din nang tukwi tukwe umbura dongoraming to kuboka weik me kwan umbura aryi uram dobmakise.
Niryi, ‘Nai Imtamnyi, nisi lebdeibnurum,’ eboka molobmakise
Uca, Kanci nisi kekeboka lebmanoumwe.
3Kanci nisi weik me kwan umbura dokdonokmanoumwe.
Ba, tukwe yangana kobdob ai asi maryurbinmase.
Ilila me kwan kuruningna lontik-lontik ena aryi borkingkaningmanouci, ni nong asi siklinmanou.
4Ba, niryi ato ebmakise, ‘Nira Kan urasintam aryi sirya yakdonoknoumwe,’ ebmakise.
‘Nira Kan urasin ara kum eibmakin bok, niryi Kan si weik en ai iya milil ai ara tubto ton eibkwantinyi do?’ ebmakise.
5Weik me kwan me umbura kunmase ura, ni ilil weik kuranou.
Weik me kwan aryi kurunikoka nisi iyanganmanou, ni nong nirya me aryi siklibmanou.
Me kwan deiamwe ara ni si banyok dam asi sungyanmanou.
Ilila me kwan deibwa umbura wengyurbinmase.
Ba, me kwan umbura asi mutuk kon bukwe amwetam asi maryurbinmase uca, mulonga aryi ni kisok kwatibmanou.
6‘A maryuryan ara sirya dibkwaman, dongtam kuboka bublan iya tirikdongobmanir,’ tenebmase.
‘Ninyi din nang wengbaraming ai asi wengyanman,’ tenebmase.
Asi, a talak aryi ni Nai Kan Iya Erebdobnyi biryi nisi leboka
tukwe ungna umbura dam ato ai aryi boweleyanmanoumwe.
Kanci nisi tubto kam bukeibmanoumwe.
7Ni kanya kum bonmasiryi,
Iya Erebdobnyi Kansi kanya teneibdeboka nabmakise.
Ni molona ara Kanda Kan si weik ekin ai kurumnyi bisi molobmakise.
8Sun talyi kwemdeina asi molon nang ara kansi kum namkunung.
Kanda a nang asi boukwe kiboka kisal dangdum bok,
sunci Kanda deibloboka luba kimkunung.
9Bok, nira Kan si asi weik ereboka mot semkwankin.
Nai Imtamnyi Kanci nisi lebdeibmanoumnyi.
Niryi Kanti ni dama deiboka
niryi uram eboka kunubdeibmase to kunubkwan.
Iya Erebdobnyi Kanda lemna deyoknyi kurum,” ato eboka Yunus biryi uram sisikoka molobmou.
10Yunus biryi Er Iya Erebdobnyi bisi ato eboka molobmou ura, Er Iya Erebdobnyi biryi mekinaia asi, “Yunus bisi me katum dam bobirum,” eboka arukmou. Ba, mekinaia aryi Yunus bisi me katum dam bobindoka dukdonokmou.
موجودہ انتخاب:
Yunus Uram 2: MTG
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@LAI 2007 (New Testament), @LAI2022 (Old and New Testament)