Yunus Uram 3
3
Yunus Niniwe atei binmou uram deyok
3:1-10
1Mekinaia aryi Yunus bisi me katum dam dukdonokmou ura, Er Iya Erebdobnyi biryi Yunus bisi liki bitinyi dinyi aryi tubto arukoka bokdonokmouci, “Niniwe atei birum,” ebdeibmou. 2Ara, ato eboka Yunus bisi arukmou, “Yunus, anabdobminyi ura, weik atei Niniwe bindokabminci, sun Niniwe atei nang asi Niryi kan dam ebdeibmase uram asi lak ebdum,” eboka arukmou. 3Ba, Yunus anabdobmouci, Er Iya Erebdobnyi biryi ebdeibmou to kunuboka Niniwe atei binmou. Niniwe atei ara iya weik atei nun doramnyi. Akatei doramnyi ati, dibde yibana ara uki winiryi yibindoka akatei nirya eiboka aknardongoramnyi. Akatei ara ninyi ilinto kuramnyi.
4Asi Yunus Niniwe atei binmou ura, uki tentok tum yibanmou ani, erci akatei nang asi ato eterebmou, “Sun Niniwe nang ara nisi kekenindarur. Uki 40 baryi mabmabyi ura, Er Iya Erebdobnyi biryi sun atei nirya dakoka ninyi nirya obkwansir,” ebmou. 5Ba, sun Niniwe atei nang aryi Er Imtamnyi bisi dib tenebmai. Ura, sunci, “Nun malyi dinyi takwayeb ati, kikliboka kwaning me yina si teboka bukwayeb,” ebdanmai. Ura, sun sien nang babyi sun ur yuk nang ababyi kwaning me kum yibmai. Ani, tonda sunci, “Se, nun malyi kunub,” teneboka malyi ongon aling ongobdobmai. 6Ato ebmai uram asi sun Niniwe atei nang asi taleamwe weik sienyi biryi kekebmou. Ura, erci, “Nun malyi dinyi takwayeb,” teneboka er erebdob sokon aryi yuryibinmou. Ura, erbabyi er malyi kun dinyi takmoua kikliboka er teleb ongon aling kwiribloboka malyi aling ongobdobmouci, tukwetam bukmou. 7Bukmou ura, erci sun Niniwe nang asi, “Ato kubdarur,” en uram ebdeibmou. A ebdeibmou uram ara er weik sienyi ab er amwetam bun nang Niniwe mutuk sien nang ab aryi ebdeibmai. “Nira weik sienyi sun kalingsununyi biryi, ‘Ato kubdarur,’ ebdeibkwinsin uram asi diboka kekebdarur. Nun malyi dinyi takwayeb ati, kikliboka ukuryok ara kwaning me si teboka bukwayeb. Ninyi babyi, ninyi winin dinyi babyi, bisam lembu ab sapi babyi, bisam kambing ab domba babyi sungsunga ab me ab yirdena mem. Eda, nirya yina si teboka bukwanub. 8Nun ninyi babyi winin dinyi babyi nirya ara, ‘Nun malyi kunub dinyi ara taklobkwayeb,’ tenen kiklin dinyi ara malyi kwilikdob aling ongobdobkwayeb. Ura, uram weik doboka nun Nai Imtamnyi bisi molobkwayeb. Ani, nun malyi kuramibyi dinyi ab, yu dinyi kuramibyi dinyi ab, yuk malyi dinyi ab nirya taklobibyi ura, danguboka Er Imtamnyi tam urasin deibkwayeb Ersi naboka molobkwayeb. 9Er Imtamnyi biryi nun malyi kun deyok ati, ‘Obkwan,’ tenebmasir to ara kum kunubsurura. Nun malyi kun dinyi takmabyi asi Erci asing eibsici ura, Erci nunsi boukwe kiboka lebkwansurura. Ati, nun malyi kun dinyi nirya takwayeb,” ebmou. 10Ato ebmou ba, sun Niniwe atei nang aryi sun malyi kun dinyi nirya taklobmai. Asi, Er Imtamnyi biryi sun ukubmai dinyi asing eibmou. Ara, sunci malyi kuramnyi dinyi ab, yu dinyi kuramnyi dinyi ab yuk malyi kun dinyi kuramnyi dinyi nirya ara taklobmaici, danguboka Er Imtamnyi tam urasin deibmai. Ura, Er Imtamnyi biryi sunsi obkwan tenen yu boramwe dinyi ara kum kunubmou. Eda, danguboka sunsi boukwe kibmouci, Niniwe atei kum dakmou.
موجودہ انتخاب:
Yunus Uram 3: MTG
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@LAI 2007 (New Testament), @LAI2022 (Old and New Testament)