Yunus Uram 1
1
Er Iya Erebdobnyi biryi Yunus bisi naboka arukmou to kum kunubmou uram deyok
1:1-17
1Uki tentok tum aryi Er Iya Erebdobnyi biryi ninyi si Amitai mi si Yunus bisi naboka arukmou. Ara, ato eboka arukmou, 2“Yunus, kanda weik atei si Niniwe asi biminyi ura, kanci akatei nang asi Niryi ebdeibkwaman uram asi sun dam lak erbirum. Ara, ato deyok ati Ni ebkwaman uram erbirum. Sunci yu dinyi ara mitik kum kunung ati, anabdobminyi ura, sunsi wenena uram erbirum,” eboka arukmou. 3Bok, Yunus biryi, “Nira Niniwe kum binkwaman. Eda, Er Iya Erebdobnyi biryi nisi kum eibkwanici to mutuk dam inirdarorbinkwan. Ara, kitingbantam kuboka Tarsis mutuk dam asi inirdarorbinkwan,” tenebmou. Ura, Yunus anaboka weik co ngun-ngun ilinto dararyangaramwe atei si Yafo binmou. Ura, a bindoka diramwe uca, weik co ngun-ngun tentok Tarsis mutuk tam binkouci, anarabwe asi eibmou. Ura, erci a co ngun-ngun welena dengna dekmou ura, sun a co ngun-ngun kalingna nang ab tonkwa weik me kwan bisik banmai. Ara, “Er Iya Erebdobnyi urasin dam iniboka Tarsis mutuk binkwan,” tenen ati ato kubmou.
4-5Sirya burbinmou ura, anabdobmaici, me kwan deici bisik noutam banmai. Ba, a talak ara Yunus bira co ngun-ngun amwetam ai yurbindoka wi mabmou. Asi, Er Iya Erebdobnyi biryi, “Yunus Niniwe atei kum binmar ati, Niryi ersi bisik sekwan,” tenebmou. Ura, Erci kumwe asi arukmou ba, ibalya weik dobmou.
Ibalya ilinto doboka weik me kwan kwatib-kwatib eboka im sungsungmou uca, co ngun-ngun tolobmanto kubmou. Ba, a co ngun-ngun kalingna nang nirya ara sun ilil weik kubmou ba, ato tenebmai. “Nai e, ibalya aryi co ngun-ngun dangublobkwamasir ba, me wekoka isin dakoka dibkwamab,” tenebmai. Ura, sunci sun kwemdeina yuk-yuk dib teneboka moloramnyi to asi, “Nai du o, nun lebdobsurum o,” eboka nabmai. Sunci ato eboka namai ai aryok, “Co ngun-ngun caknam kibdobibyi ba, kum tolobkwandura,” teneboka a co ngun-ngun umbura bobmai dinyi ikin dinyi ara nirya doboka-doboka me umbura dongobmai. 6Sirya dongobmai ura, sun co ngun-ngun kalingna nang arungnanyi amwetam ai asi yurbinmou. Ura, bindoka diramwe uca, Yunus bira wi mabmou asi eibmou ura, erci Yunus bisi ato eboka kamubmou. “Ni kwit se, kanda mabmarim do, bukokdum. Ibalya ilinto donmarci, obkwamasir anun e. Ola bukokminci, kanbabyi kan Molorumnyi bisi moloboka nabderum. Ba, kan Molorumnyi biryi nunsi boukwe kiboka lebkwansurura,” ebmou.
7Ura, Yunus ab anyi ab amwetam ai aryi kuboka alib ai ei welebinmarei. Ura, sun co ngun-ngun kalingna nang aryi, “Ibalya weik donmar ara malyi dinyi kubmaranyi ton a co ngun-ngun umbura welebmar aryi kunmar. Ati, manmalibmaranyi bikwayeb ati, sekna yamin deibkwayeb,” ebdanmai. Ura, sekna yamin deibdenmai uca, Yunus deyok aryi ibalya ilinto donmou asi bikmai.
8Ura, sunci Yunus bisi ato eboka asibdenmai, “A mi, ibalya ilinto donmar ara kanci malyi dinyi ton kubmarim deyok aryi nunsi obkwamasir do? Kanda dan mutuknyi do? Ani, kanda dan ateinyi do? Ani, a co ngun-ngun welebmarim ara unatoa ati welebarim do?” eboka asibmai. 9-10Uca, Yunus biryi sunsi ato ebmou, “Nira Ibraninyi. Nira Er Iya Erebdobnyi bira me kwan ab tukwe kib ab Kikniamounyi bisi molonunyi. Erci nisi, ‘Niniwe atei birum,’ eboka bokeibnou asi niryi kum kekeana ato kubokmonwe. Ura, niryi, ‘Er Iya Erebdobnyi bira ni kum eibkwanir mutuk asi inirdarorbinkwan,’ tenen ati, a co ngun-ngun dub weleboka inirdarorbanman. Niryi ato kuboka manmalibman deyok aryi Er Iya Erebdobnyi biryi niti bisik sekmanirci ibalya asi arukmar ba, ato kunmar,” ebmou. Ba, sun co ngun-ngun kalingna nang ilil weik kubmou. Ura, sunci Yunus bisi, “Kan manmalina deyok aryi nunsi ibalya aryi obkwamasir,” ebmai.
11Ura, ibalya weik dobtabakmou ba, sunci Yunus bisi, “Ibalya ilinto doboka dalunmasir dinyi ara kum dankwande ati, nunci kansi una kubkwankib do?” eboka asibmai. 12Uca, Yunus biryi sunsi ato ebmou, “A ibalya ilinto doboka sunsi obmanto kunmasir dinyi ara ni malyi kun deyok aryi kunmasir ni bikman. Ati, sunci nisi tomobtaleboka me kwan asok deici donoknindarur. Ba, ibalya donmara kum dandoka me kwan kwatiboka im sungmar ababyi kum dankwande,” ebmou. 13Ato ebmou bok, sunci ato kanya teneibmai, “Anyi bisi me kwan umbura dongona ara nun ilil. Me kwan umbura dongobibyi ura, Er Iya Erebdobnyi biryi nun wanok obsicei. Ati, co ngun-ngun asi ola bobindoka me kwan katum dam darardeirirbinkwayeb,” tenebmai. Ura, sunci mikib yaboka co ngun-ngun kilin co aryi me kwatib-kwatib eboknin banmai. Asi, ibalya ababyi yu yaboka me kwan kwatib-kwatib ebde im sungmou aryi me katum dam binman kum kubmou. 14Me katum dam bina kum kubmou ura, sunci Er Iya Erebdobnyi bisi ato eboka nabmai, “Yo, Kanda Iya Erebdobnyi biti, nunci Kansi molobmakib. Ibalya kum dandobci ba, nun lebdandobkwayeb ati, nunci anyi tomobtaleboka me dongobkwamab. Anyi bira erci nunsi malyito kum kibdongobmasir bok, me dongobkwamab. Ati, kanci tamuboka nun obsiminyei. Kanda, Kan kanya teneibmaminyi tok kunurandim ati, tamuboka nunsi obsiminyei ati molobmakib,” ebmai. 15Ura, sunci Yunus tomobtaleboka me kwan umbura donokmai. Ba, ibalya kum dandoka me kwan kwatib-kwatib eboka im sungmoua ababyi kum danmou. 16Ibalya kum danmou ba, sunci Er Iya Erebdobnyi bisi ilil kubmou. Ba, sunci sun dama deiboka Er Iya Erebdobnyi bisi karebmai. Ura, sunci Er Iya Erebdobnyi bisi uram eboka kunubdeibmai, “Kanci nunsi lebdeibmasirim ati, nunci kansi iya teneiboka nun dama deiboka karenkwankib,” ebmai.
17Ura, Er Iya Erebdobnyi biryi, “Yunus bira lebdeibkwan cok,” tenebmou. Ura, Erci weik mekinaia tentok arukmou ba, a mekinaia aryi Yunus bisi amkorokmou. Ba, Yunus bira mekinaia mundu umbura ara lukunda winiryi maamwe.#Mat. 12:40
موجودہ انتخاب:
Yunus Uram 1: MTG
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@LAI 2007 (New Testament), @LAI2022 (Old and New Testament)