Ichanohichuru 26
26
Colurujeeuruha Jorioocuru najaa lera biha curuaanaa Aquirifa rai Faborone
1Nii jaun jetaote, Faboro rai:
“Inae laen naineein, ii jabereco coreniha ereeinera”, naa reey Aquirifane jaun jetaote, acaauru rai ecuun biji sijitaain jetao:
2“Jataainna coroaejeeun, reey neeine acatiha, cau ererichaaunine jaunra, reey Aquirifa. Aihana jaun, atiin canu ere aonaauna, itolere que cacoluruecuruha Jorioocuru najaa que, erete aonaain coitucuhicha. 3Iite laen, jitariin itolere Jorionichaanune ichao coitucuhin, ita rerohecaain ita rai ereereecaanune jaanne maajeein coitucuhin neeicha curaanaa. Nii jaunna, atiin quere aonaaine jereeunra curuaanaa”, naain jetaote:
Jaiti Cana Coaunera coitucuhin, esenetaenihane bana, rai nichao biha Faborone
4“Satiin Jorioocurute, canu ichao coitucuure, acaauru aina ichaorejetocoaaunlu, canu atane, chaaen Jerosaleeun, naaonjoaihun, canu enamanacane caje coauneeina jaun. 5Chaaen techu, raotojoeein fariseeoneein nihanune coitucuhin, rauhijiriin benaa nainecure ii rai, jerecuruhane. Nii coitucuhichene rijijieeina, leeochaauru amuritoheriin jataain rauhijiriin, canaacha esenetai tonoraera neein nihacaanu. 6Cana inoaensihuru rai Cana Coaunera aitoonjoa nii niicha letoanaa jerei canaacha cohajei esenetaain tonoraanune corenihate, caa cacolurujueein, caa chaatiha canu turuaerateeurera. 7Canacaanu lechoonca coroata laurii Isaraele cocoaichacuru foeratenojoineein nihacaanunena, nii cana foerateeurera rai Cana Coaunera aitoonjoa cohajihacaanu enanetojoeein. Nii jaunte, Cana Coaunera coroajeein bajajeein, naitoonjoan niicha jerenohin ichacaaun, jiichoo, janotiin, naaonjoainchuru. Nii cana inoaensihuru rai Cana Coaunera aitoonjoa canaacha cohajei ere tonoraanune corenihate, caa cacoluruecure Joriocurura, reey Aquirifa. 8Chanuna onacaauru ichatiha Cana Coaunerane esenetaeneeiche inara”.
Jesocurisito ranojoihunru rerohecaain cairichaerichaaetohalune biha Faborone
9“Canuhetonainachu, jauriaa, ‘Caohacha jecha ichaaun’, naain, Nasarete cocoaicha Jesoso ere esenetaain tonoraeraauru rerohecaain, acaauru cairichaain, 10Jerosaleeun batirichuru curuaanaa letononeein caresero cuhanena maajeein arajiin Jesocurisito esenetaerauru teraterejetoonlu. Chaennechu, tabaauru sohin jaooruhane rautatiin coroaerejetoonlu. 11Inaaojoa saneein chaainti, acaauru casetecaraetoonlu, ‘Inae jian laaen, tonorarihaacaanuhinta’, naain, nii acaauruacha esenetai acaauruacha ere tonorai Jesoso ere tonoraauruhane jianecuruhane coina. Jataainna, nechu ansaineein mijiaaineein, acaauru rerohecaeraaetoonlu, naain coriaae nejelau atane nenacaauru neseeurune maajeein cuhinchurura.
Coaiteen, “Naaonjoaaine, nunuheteein, Jesocurisito coitucuhin esenetaain tonorana nunuheteeunlura”, naain biha Faborone
(Ich 9.1-19; 22.6-16)
12Nitohaneein, Damasoco neseu nenacaauru mucuhin raanune coina coaucuhin cuhanu, batirichuru curuaanaa letononeeine janate, 13bero cuhane cuujihanu, turuelalajeeine jana, enoto chujutaain, luhecotariin, canu, nii canu aina unacaauru, naaonjoainihacaanune rohan enoto cono amurijiriin conotiin, luhantiin lanaanete dede cajera, reey Aquirifa. Nii jaunne, saain jiniiquiin, 14atane ichoae nemarotihacaanune janate, carai Ebereeo ere cuhane cuaain: ‘Saoro, Saoro, chanuna jataain caniha nejerateein carerojoecaai. Nechu jataain ichaajenihanete, baaso ichaain, ijiabereeon cairichaain, cunaitaa nii aaicha’, naain canu caje bajaane jana ne: 15‘Chaneeinaate curuaanaa’, naanune janate: ‘Canune nii iichaa cairichaaeriin Jesoso neeunra’, naainte: 16‘Chajaain nimichuune, ichei erete aonaaicha. Cauna ecocoon, ichei irihanune, canu letononeein neeine coinara, chaaen ena, caa iicha coarai beein, ii que caa baiha quiicha coaaratenenine maajeein beein, canuneein nihanune coitucuerateeine coinara. 17Canune, Jorioniheichuru, Jorioocuru, naaonjoaihunri caje, ii ichoteratiha cureeunicha. Acaauru renena caa ena elotoareeunnicha. 18Coanaanihute, acaauru nota jirichaeranuque, acaauru rai canu ere beebejeite, Acaauru Coaunera nichaanune coitucuhin, quere tonoraain, canune maajeein coitucuuruhine, nabana taeneein cuaajeein, moconajaaera ere tonoraain sacuelanaala, canu, nosa caje cacha mitaeranichaaunne coitucuuruhane, nosa coreniha caseteconeein neeuruhane rai neeuru caje nichoteein, Acaauru Coaunera nichaanune rene tacanaa nainecuruhane coina, leeochaauru Jesocurisito ranojoihunru aina jiniiquiin neeuruhane coinara’, naainte caletoae Cana Coaunera Calaohi Jesosora”, naain jetao:
Rai ereein letoaa Jesocurisitone tonoraa Faborone
19“Nii jaunna, dede caje ecocohin caletoaera lacoelanaala, 20jauriaanejeein Damasoco neseu nenacaauru rene turuhin, acaauru rai Jesocurisito ere beebejeeun, Reey Aquirifa. Nii caje cuaaine, Jerosaleeun nenacaauru rai beebejiha cuun, itolereneein Jodea batane sacutaain nenacaauru raine maajeeinchuru, chaaen Jorioniheichuru raine maajeeine beebejeeun, baaso ichajeein, neosatihajeein ichaooruhane jianeein, Cana Coaunera esenetaain, niicha jerenohi rijijieein ichaohin, inae esinae rauhijiriin Cana Coaunera esenetaeraneein ichaooruhane coaarateeuruhane coinara. 21Nii corenihate, ita taojiananaja Teenforo asaae canu eruuruhane jaun, canu mucuhin, casohin, cajaonaa jerecure Joriocurura. 22Nete atiin, cacorataaniha Cana Coaunerane jaun, enanetojoeein jaiti ichaaojoeein, Cana Coaunera ere beebejeein sacuunra, satiin cairicheihuru rai, saain cocoainanacaihuri raine maajeeincha. Coatiha chaaelai janonaa bana, Cana Coaunera ere bera inoaensihuru Moisesa, naaonjoaihunri aitoonjoa jojohin, rerohin irihaaunta. Jerichanetojoeeine, rauhijiriin, ‘Naaonjoanrichaain jetao’, narejetocuruhalune rijitojoeein: 23‘Ohanete ne nii Cana Coaunera letononeein unaa Mesihasicha. Nete, nitohaneein ohane baiha, aca niicha ranojoihunru ajiinchateraniha, oo caje ichanananeein niha cureeincha. Nii baihate, itolere sacutaain, beebejenojoineein niha cureein, satiin cacha nota jirichaeraaunu quera, nii aina, Cana Coaunera coitucuuruha, satiin cana araaichuru necoina, chaaen nejelau atane nenacaauru niha natiinine coinara’, naain aitoroaetooruhalune rijitojoeeine aitoonra”, naain Aquirifa rai beebeje Faboro.
Jesocurisito esenetaain, tonoraa curuaanaa Aquirifane jereein, rai ereerejiha Faborone
24Niritiin, ereerejiha jabereco coreniha Faborone jana jetaote, rai nujuae soaisoaain:
“Mainajeriin nerelaacha neeine jaunna, nesooneeonjoaain joaereein ereite, Faboro”, naa rai Fesetone jana jetaote:
25“Coatiana nesooneeonjoaain joaereein irihaaunte, caohati coberenadoro Feseto. Caa aitocoaunne jaante, esinae rauhijiriin erenaane. 26Caute ne, caa curuaanaa reey Aquirifa itolere niriinanai coitucuera. Nii jaunna, chaque tonajelanaala, nacatiha caa ereerejeeun, acaentonai niriinanai coitucuhin nihane jaun. Coatiha chaaelai asinojoineein nenaa que caitono nihei. 27Cana Coaunera ere beracuru profetacuru inoaesihuru aitoonjoa esenetaaina, Reey Aquirifa. Rauhijiriine, iitonai esenetaaine coitucuunra”, naa Faborone jana jetaote:
28“Basijiin lanajeje, caque jererateeine jaun, canuhetonai Jesocurisito raineein nihanunera”, naa curuaanaa reey Aquirifane jana jetaote:
29“Coatiha jerihane, iicha aiheeita, curuaanaa. Satiin cau neein aonajeeurera raina, Cana Coaunera bajaaun, esenetana nainecuruhane, caa aihanune tocohaneein cadena que coositenojoineein nelanaala esenetaauruhane coinara”, nae jetao Faboro.
30Nii jaun jetaote, nimichuhin, naain jelai cuure coberenadoro aina curuaanaa Reey Aquirifa, chaaen, Berenisi, chaaen, nii leeochaauru cuu acaauru aina nelauriaain nenacaauru, naaonjoaihunri aina, cuu jelai teein, 31nii que ereeuruha nejesinajeein, ita raine coina. Cuu jetaote, ita rai nejesinajeein:
“Coatiha chatoanai baaso ichaai caa cachata. Cha corenihate, sohin joaerareta. Nainiheinchu, caresero cuhane nihanatiin caseteconeein nihaneta”, naaure jetao ita rai nejesinajeein. 32Niritiin, ita rai ereeuru baiha jetaote, Feseto rai:
“Raajenihane rucuheca satiin curuaanaaneein nenaa eenferadorone coina, aitoha caa cachane colanete, jianena naaineeicha”, nae jetao Reey Aquirifa, coberenadoro Feseto rai.
Поточний вибір:
Ichanohichuru 26: URA
Позначайте
Поділитись
Порівняти
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2005, 2024, Wycliffe Bible Translators, Inc.
