Ichanohichuru 24
24
Coberenadoro Ferisi acatiha ereejiha Faborone
1Saoqui janohi baiha neeoriin jetaote, turuha uhe nii batirichuru curuaanaacuru curuaanaa Ananihasi, acaauru bichauhenaauru tabaauru, ita colurujeeurera coroatajanera Teeorotorosi neei curuajai abogado, naaonjoainuri uhaain turuha uhe. Acaauru jetaote, nii coberenadoro acatiha nichaauraaure, Faboro colurujueeuruhane coina. 2Inae nitohaneein, Faboro mitaain, turuaauruhane jaun jetaote, nii coberenadoro rai ere jetao nii abogado Teeorotorosi:
“Jataain narihara, curuaanaa Coberenadoro. Ii corenihate, raotojoeein nihacache. Narihara, itolere coitucuhin, caohachaain cana atane rucuheca, nitohaneein ichaaine coreniha. 3Itolere sacutaain, nitohaneein ichaaine coitucuhacaanu, inetono janonaa bana. Jataainte, caohati coberenadoro neein neeicha, Ferisi. Jataaine, ii coroaaejihacaanu banejelanaalara”, naain irihane baiha jetaote, inae Faboro colurujuenaa nunuheteein jetao:
4“Nabana, ii rai caeneenejihacaanune coataa, atiin canacaanu aonaauna irihacaanu. 5Caa cachate, itolere baaso uhai nejesina ne. Acate itolere, cana rai chauratane sacutaain amuhemujueein, Jorioocuru lerurucoai nejesina ne. Acate le laurii cacha nasarenoneein curuajaihuri curuaanaa neein nenaa nera. 6-7Chaentechu, rautaenihacaanune saijieein, nejelau cachaauru enoae Jorionichaanune rai Teenforo asae. Nii corenihane, mucuhacaanulu. 8Caje nachuhinti bajaaute, esinae rauhijiriin, itolere ichaane coreniha caa colurujihacaanune coitucuhi”, naain jetao, nii Faboro coulurujue nii ita colurujeeuruha joricocurune, acaauru coroatajanera abogado Teeorotorosi, coberenadoro Ferisi rai.
9Nii jana jetaote, jerichanetojoeein cuaain colurujueeure nii cuu nenacaauru leeochaauru Jorioocuru netonai. 10Nii ainate, Faboro rai, biji lalari jetao nii coberenadoro, iriha Faborone coina. Nii jaun jetaote:
“Nihei chaque tonajelanaalane, ichei erereeunni cajabereeo coreniha, ii cana atane rai itolere rucuheraanu que nenaaneein, bajaanacaain, inoaelu caje coaauneeine coitucuhanune jaunra. 11Lechoonca coroata janoheca, Jerosaleeun turuhin, Cana Coaunera bajaebajaecaaunera. Ichaajenihanete bajanaa naineeicha. 12Coatiha chunei cacha aina, ita cotaihajihaanune jana caurucuruhi, chaaelai janonaa banata. Niheichu chaaen, ita taojiananaja Teenforo asae nihanatiin, chunei cachaauru rerohecahaunta. Niheichu, ita taojiaauruhane jaacuru sinacocaauru asae nihanatiin. Niheichu, cuu netiin chunijiun cachaauru rerohecahaun. 13Nii jaun, nihei, chunijiun cuain tonaain cacoluruecuruha caa cachaaurune jaanuta. 14Nena caraajenihane, canu ichao bereeunicha, rauhijiriin. Canune cana inoaesihuru coauneraneein nenaa Cana Coaunera rai niicha jerei icharaneein neeunra. Nii Ena Ecoona Ichaonaa Caohacha Jesocurisito tenojoine, canu, esenetaain tonoraaun, Cana Coaunera ere bera inoaesihuruhacha laenanohineein nenaa nihana jaun. Nete, nii canacaanuhacha esenetai que, ‘Chaqueje nelatihei’, naaure, caa canu colurujueracuru. 15Aihuruhane rijijieeina, canu netonai inae cuu tihane bana, satiin onacaauru ichaterichaain Cana Coaunerana jaun, ichanacururichaain nechu aansaineein onacaauru, caohacha cachaneein naaonjoainurine esenetaaun. 16Nii jaaune, caohachaain rauhijiriin, jeriha Cana Coaunerane rijijieein, casuujua coaraain neeun, Cana Coaunera notaracae, satiin cachaauru notaracaene maajeein. 17Itolere sacutaain, cajihaneein amuhemuhecaaun bajaanacaaine baihane, coriqui uhaain, jelaiha canu atane caaun, itolere que necairichajeein ichaonacaauru rai teein acaauru coroatajanichaaunne coina, chaaen, Cana Coaunera bajanaanaja coloheri Teenforo asae, Cana Coaunera rai, itolere lenonecuru sohin tihanune coinara. 18-19Nii ina ichaaun, neculocohin, canu couturi loroaloroariin joaeratihanune baiha, aitoha cana Quiricha Inoaesi cuhanene rijijieein. Coatiha arajiin cacha codoriaain, ichahaaunluta. Niheichu chunei cacha rerohecaenihanune janate, nii ita taojiananaja Teenforo asae canu coaracurelu Asia batane caje unacaauru tabaauru Joriocurura. Acaaurutejian uhin, cacoluruecuruhane laaen caohachae, esinae rauhijiriin chatoanai baaso ichacaaunne coaracuruhane. 20Nete uurene. Caa cau turunacaauru Jerosaleen caje unacaaurute, Jorioocuru curuaanaacuru, batirichuru curuaanaacuru, naaonjoaain acatiha teein, acaauru rai, cacoluruecuruhane jana, ecu neeunlura. Acaaurute aihane jaun naine, chatohaneein baaso ichacaaunne coitucuhin cacoluruecuruhane caohachae, nete nainecurenera. 21Acaihaniji, nii cacoluruecuruhane banaachane, satiin codohaquiin aonajeeuruhane jana, tonijiaain: ‘Ichana nainiha onaane esenetaanune corenihacha nachura, cacolurujueein, canasina coauquichete’, naaunlura”, naain jetao be Faboro.
22Nii jaun jetaote, inae raotojoeein, Nii Ena Ecoona Ichaonaa coitucuha, nii coberenadoro Ferisine jaun jetao, nirijieein nii ratiriin:
“Inae turuha comaandaanti Lisihasine banana, inara cotiaratereeuni nacoauneein, nii neruujue coina”, nae jetao, Ferisi.
23Niritiin jetaote, nirijieein mucuhineein Faboro sirichuruhane coina, cafitaan rai aite Ferisi. Chaaen raotojoeein Faboro rene turuhin, rai niicha latei teein naaonjoaain, aina erenaa nainecuruha belaichaaurune coina jetao aite. 24Nii cojoanoo jetaote, nacoauneein turuha uhe Ferisi, rai comasai Dorosila aina. Nii comasai jetaote, Jorioocuru bene ne. Nitohaneein turuhin Faboro cotiharatiha Ferisine jaun jetaote, turuhin acaauru rai Jesocurisito esenetaain, tonoraane que, acaauru rai ereerejiha Faborone jaun jetao, cuu rautatiin aonajeeure, itolere que, acaauru rai ereerejihane jaun. 25Ne jetaote, “Caohacha nejesina ichaaechajeein ichaoinete caohachae. Jana baasohacha ichajeein ichaohine caohachaai, inae cuu tihane bana, satiin colurujiha curichaain Cana Coaunerana jaunra”, naain rai biha Faborone jaun jetaote laen nesoonete, nii Ferisi. Nesoonetiin jetaote:
“Inae, chajaain caunihu. Inae nainichaaune banana, coaiteen ii cotiharatereeunicha”, nae jetao, Faboro rai, Ferisi.
26Niritiin jetaote, coriqui que, coretiha Faborone jeriha, jianihane coinana jaun jetao, araai saain nihane cotijiae, rai irihane coina Ferisi. 27Nirijieein, coroata jaanacaain ichaane baiha jetaote, coberenadoro nihane caje jetao mitue Ferisi. Inae mituha Ferisine jana jetaote, coreenraniha enoe Forisio Fesetoneein curuajai. Ne jetaote, jerecuruha Jorioocurune rijijieein ichaane coina jetao, caseteconeein Faboro ratiriin jetao, mitue Ferisi, nabana baasoneein cotaairiin coaracuruha Jorioocurune coataa.
Поточний вибір:
Ichanohichuru 24: URA
Позначайте
Поділитись
Порівняти
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2005, 2024, Wycliffe Bible Translators, Inc.
