Ichanohichuru 22
22
1“Canu ere aonacuche, canejeraauru, ichauhenaauru, naaonjoaihunrine, canu jabereco coreniha caa que ere inara raite, aonaquichera”, 2naain jetaote, acaauru ere Ebereeo cuhane cuaain, acaauru rai aitohane aonaain jetao, curuatoroaain, ninauhene curuaaequiin aonajeeure. Nii jana jetaote, ninauhene curuaaequiin, aonajeeuruhane jana jetao:
3“Canuhetonoaina Joriooneeun. Silisia batane que nenaa Tarosone, nejanoanaaneein neeun. Nena laaen cau, Jerosaleeun fojianohineein nenaaneeun. Jataain itolere coitucuhin nenaa Camalieli relanojoineeina, rauhijiriin cana inoaesihuru jerenohi rijijieein nerelaain neeunlu. Nii jaunna, itolere bana, cacoichana aina cutaain, Cana Coaunera jerenohin ichana jereeun, nii ena netojoeein ichaquichene rijijieein. 4Canuhetonainachu, caa Ena Nenaa Ichaonaa Caohacha esenetaain tonoraain sacuurera rerohecaain, atinanacaneeinchuru, tabaauru mucuhin caresero cuhaneeuru, teratenajarejetoonlu, satiin quichaauru, enecuru, naaonjoaihunru aina curuaecaain. 5Satiin batirichuru curuaanaa, satiin Jorionichaachene coaaraneein nenacaauru ichauhenaauru, naaonjoaihunrite, rai nota que nii coaaraneein neeure. Acaaurute, nii Damasoco nenacaauru cana araaichuru Jorioocuru rai, quiricha letoaaure, jerecuruha acaauru netonaine, Jesocurisito esenetaerauru ariin mucunajaain, cau Jerosaleeun uhanajaanune, caseteco coaracuruhane coina”, naain jetaote:
Jesocurisito coitucuhin, esenetaane nunuhetihane beebejiha Faborone
(Ich 9.1-19; 26.12-18)
6“Nete mucunajaanune coina, Jorionichaachene coaaraneein nenacaauru ichauhenaauru caje erenaa rocohin, aina Damasoco cuhanune jana, enoto chujutaain turuhelalajeein, bero cuhane cuujihanune jana, luhantiin, dede caje conotiin, luhecotariin canu que jilenete. 7Nii jaunne, coasiha nuluna caaun, nii canu cunaja caje nalatoon atane ichoae. Nii janate, canu curuaa que, cacurujuateein: ‘Saoro, Saoro, chanuna, jataain, caniha nejerateein cacairichaeriin, carerojoecaaita’, 8naain tonihane janane:
‘Chaneein naate Curuaanaa’, naain, bajaanune janate:
‘Canune, nii iicha cairichaerii Nasarete cocoaicha Jesoso neeunra’, naain catoonrae nii erenaa. 9Nii canu corihaniha cunacaauru netonaite, nii cono coaraain, acaauru netonai nesoonetoore. Nete laaen, nii carai irihane aonacurene. 10Nii jaunna:
‘Chatohanaina ichareeunte, Curuaanaa’, naain bajaanune janate:
‘Chajaain nimichuhin, nii cuujueeine jaaun Damasoco neseu cunihute, cuu, ichei, iicha chanenu beeuruhinera’, naain, catoonrae Cana Curuaanaa.
11Nii jana, maosaneein caratiriiha nii conone jaunte, canu biji que canu mucuhin, canu tarataracaain, camaaure nii canu corihaneraauru, Damasoco neseu tiaaincha.
12Nii janate, cuu nelu, leinjiin cacha Ananihasineein curuajaain, nii Damasoco neseu. Nii jetaote, jeriha Cana Coaunerane rijijieein, rauhijiriin caohacha ichaain, Moisesaacha laenailu tonoraeraneein ne. ‘Acate, caohacha cachaneein nera’, naauruha que, satiin Damasoco nenacaauru Jorioocuru. 13Nii Ananihasite, turuhin cacoharaain: ‘Ichaso Saoro, coaiteen, nacoauneein conohine inotara’, naane rijieeoritiinte, inae nacoauneein conoha canotane jaun, nii Ananihasi coaraaun.
14Nii baihate, carai:
‘Cana inoaesihuru Coaunera- Cana Coaunerate, ii coaraain, ichotijiae, niicha jerenohi coitucuhin, esinae rauhijiriin caohacha nejesina icharaneein nenaa coitucuhin, chaaen raaje nujuae caje ichei irihane aonaaine coinara. 15Iite, ichaajenihane, nii iicha coarai coaaraneein, aoharaneein, beebejiha curiquiin, itolereneein chauratane que nenacaauru sacutaaincha. 16Chajaain, caeneeneje lanaala cuhin, Cana Curuaanaa Jesocurisito bajaain nebaotisaerateeute, ii colucomiincha’, naain caletoae nii Ananihasicha”, naain jetaote:
“Naaonjoaainte, Jorioniheichuru rene caletoae Cana Curuaanaara”, naain beebejiha Faborone
17“Inae Damasoco caje cauhin, Jerosaleeun turuhin, cuu nenaa Teenforo asae enohin, Cana Coaunera bajaanune janate, carai ecocoe Cana Curuaanaara. 18Carai ecocohinte: ‘Chajaain luhecotariin caa Jerosaleen caje amuura. Cauhacha neein canu ere beebejeeine, coatiha chesenetaaururihaainta’, naane janane:
19‘Canu Curuaanaa, acaaurute, raotojoeein, satiin sinacocaauru naineein ii ere tonoraeraauru mucuhinchuru raanu, caseteconeeuruhane coinane coitucuurera. Chaentechu, tabaauru faoharatihanune coitucuure raotojoeeincha. 20Chaaen, ii ere beebejera Eseteba sohin jaooruhane coina, mucuhin, ajeri que bodoosihuruhane janane, cuu neeunlu canuhetonai, sohin jaooruhane coarajihanune coinara. Chaennechu, canu, nii soeraauru cachaauru- cajione beraichaneein neeunlura’, naanune saijieeinte:
21‘Chajaain cuhachanihura. Canune eletohaaun, coriajai ataneeuru nenacaauru rai, canu ere beebejiha cuhine coinara’, naain caletoae, Cana Curuaanaara”, naain jetaote, acaauru rai, beebeje Faboro.
Comaandaanti bijihu niha Faborone
22Nii jaun jetaote, ninauhene aonajeeonrihuruhane baiha jetao, nujuae soaijiin jetao:
“Ichaonaa nainihein caa cachata. Letonoaneein, caa cana rai chauratane caje betacaainera”, naauruha 23nujuae soaijiin, cajionene maajeein romasiinchuru, cajihaneein ecuun cuaainchuru, utuuneneenanain riajaainne jaun jetaote, 24soondarooru loreri asae, Faboro joaerateein jetao, bisichate niqui soondarooru curuaanaa comaandaanti, “Naaonjoain ichacaaunne corenihate, caniha obajeein caque nejerateeurera”, naain biha Faborone coina niqui.
25Nejetaote, inae bisihuruhane coina, ichohacuruhane jana jetao:
“Roma rai sioraranooru nihanatiin, bisiichene coina nootejian cocoainanojoineein neeicheta”, naain bajaain jetaote: “Nii ichoae tacaain, niheichu, ‘Naaonjoaain corenihate, ai caa cachara’, naain coitucueraelanaala, Roma rai siorarano casetecana nainiheeiche”, naa nii comaandaanti que jaurii cafitaan rai Faborone jaun jetaote, 26nii comaandaanti coineteein jetao:
“Coaraain aihu, taa cacha ainara, Roma rai siorarano jetaora”, naain jetao be nii cafitaan.
27Nii jaun jetaote, Faboro rohan nichuuntaain jetao:
“Esinae chachu rauhijiriin, Roma rai siorarano neei”, naain bajaa nii comaandaantine jana jetaote:
“Esinae rauhijiriine aca neeunra”, naa Faborone jaun jetaote:
28“Caraite, banejelanaala core coriqui que, Roma rai siorarano nihanune coinara”, naa nii comaandaantine jana jetaote:
“Canu nejanoha caje coauneeina aca neein neeunra”, naain jetao, tonorae Faboro.
29Niritoha Faborone aonaain jetaote, caje amuhacoaaure nii bisinaa jereraauru. Nii comaandaanti netonoain jetaote, coasiha nesoonete, Roma rai siorarano nihane saijieein, cadena que Faboro ichoharatihane jaun.
Jorioocuru curuaanaacuru, acatiha niha Faborone
30Nii cojoanoo jetaote, caohachaain rauhijiriin, Faboro colurujueeuruhane jaan leranu coitucuha rauhijiriine coina jetao, jauriaanejeein Faboro caje cadena batuhichateein, jitariin Jorioocuru curuaanaacuru, batirichuru curuaanaacuru, naaonjoaihunri taojiaerate comaandaanti. Nitohaneein, taojianaarateein jetaote, nii baiha Faboro raerateein, acaauru acatiha te jetao, cuu irihane aonajeeuruhane coina.
Поточний вибір:
Ichanohichuru 22: URA
Позначайте
Поділитись
Порівняти
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2005, 2024, Wycliffe Bible Translators, Inc.
