Njéga̰g-Rəwtaje 18
18
Danje saŋg ɓee-si dee
1Mee ndəaje gən lé mbai godo mee ɓee gə́ Israɛl. Ndá ginkoji lə Danje saŋg ɓee mba si keneŋ mbata saar teḛ mee ndəa’g neelé deḛ d’iŋga dɔ naŋg gə́ né ka̰ dee-deḛ mbuna ginkoji Israɛlje’g el. 2Danje lé d’ɔr dəwje mi gə́ to bao-rɔje mbuna gel-bɔje’g lə deḛ lai gə́ d’ḭ Sorea gə Estaol d’ar dee d’aw tən ɓee lé gə mba koo. Tɔɓəi d’ula dee pana: Awje tenje ɓee lé ooje. Deḛ d’aw saar teḛ dɔ mbal’d gə́ Eprayim njal teḛ kəi lə Mika ndá dee to keneŋ. 3Loo gə́ deḛ teḛ takəi’g lə Mika dəb lé deḛ d’oo ndu basa gə́ to Ləbi lé gər ndá d’aw pər gə́ rəa’g dəjee pana: See na̰ ɓa ree səi loo gə́ nee’g wa. See ɗi ɓa i aw ra loo gə́ nee’g wa. See ɗi ɓa i iŋga loo gə́ nee’g wa.
4Yeḛ tel ila dee keneŋ pana: Mika ra néje ɓəd-ɓəd am ləm, yeḛ am nékoga-dɔ-jim ləma, am m’to njekinjanéməs ləa ləm tɔ.
5Deḛ d’ulá pana: Maji kari dəji Ala mba kar sí j’oo see mbá kaw lə sí lé a kwa sí maji ya wa.
6Ndá njekinjanéməs lé tel ila dee keneŋ pana: Awje gə meelɔm, mbá kaw lə sí lé Njesigənea̰ orè sə sí rəw na̰’d més ya.
7Dəwje gə́ mi neelé d’ɔd d’aw ndá deḛ teḛ Layis. Deḛ d’oo dəwje gə́ d’isi gə́ majee to gə́ Sido̰je gə́ d’isi ne lɔm lal meekaarkərm bèe. Mee ɓee’g neelé dəw kára kara gə́ njera né gə́ kədərə gə́ tḛ́ bèe ɓa o̰ ne dɔ dee lé godo. Deḛ d’isi əw gə Sido̰je ləm, d’ɔm na̰’d gə dəwje gə́ raŋg el ləm tɔ. 8Deḛ tel ree rɔ ŋgako̰ deeje’g Sorea gə Estaol ndá ŋgako̰ deeje lé dəji dee pana: See ta ɗi ɓa reeje ne wa. 9Deḛ d’ila keneŋ pana: Ar sí j’aw n’rɔje sə dee mbata jeḛ j’ooje ɓee lé ndá to ɓee gə́ maji yaa̰. Kwa! Ban ɓa seḭ raje né kára kara el ləm bèe wa! Ɔsje rɔ sí ɓad awje mba taaje ɓee neelé. 10Loo gə́ seḭ a teḛje keneŋ ndá seḭ a teḛje rɔ dəwje gə́ d’isi gə́ majee’g. Ɓee lé tad rəg-rəg ləm, Ala ya̰ ji sí’g ləm tɔ, to loo gə́ né gə́ rara gə́ dɔ naŋg nee lal keneŋ el.
11Dəwje tɔl-misa̰ (600) gə́ to gə́ mbuna gel-bɔje’g lə Dan lé d’ḭ Sorea gə Estaol d’odo nérɔje lə dee ji dee’g. 12Deḛ d’ɔd d’aw ndá d’wa loo-si dee Kirjat-Yearim gə́ to dɔ naŋg lə Judaje, gelee gə́ nee ɓa loo gə́ to gir Kirjat-Yearim gə́ gogo lé deḛ ɓaree Mahané-Dan saar teḛ ne mee ndəa gən tɔ. 13Deḛ d’ḭ lée’g neelé dəs dɔ mbal’d gə́ Eprayim ndá d’aw saar teḛ kəi lə Mika. 14Yen ŋga dəwje mi gə́ d’aw gə mba tən ɓee gə́ Layis koo lé d’un ta dəji ŋgako̰ deeje pana: See seḭ gərje to gə́ mee kəije’g neelé loo-kwa-Ala-mee’g to keneŋ ləm, néndaji magəje to keneŋ ləma, néndaji gə́ tɔl gə́ tɔl gə yeḛ gə́ léḛ gə́ léḛ to keneŋ ləm tɔ wa. Ɓasinè maji kar sí ooje né gə́ kəm ra ɓa.
15Deḛ d’aw pər gə́ lée’g neelé ndá deḛ d’andə mee kəi’g lə basa gə́ to gə́ Ləbi gə́ to mee kəi’g lə Mika dəjee gə mba koo see yeḛ si gə́ majee ya wa. 16Dəwje tɔl-misa̰ (600) gə́ to gə́ mbuna Danje’g lé d’wa nérɔje lə dee ji dee’g d’aar ne tarəwkəi’g béréré tɔ. 17Dəwje mi gə́ d’aw gə mba tən ɓee koo kédé lé d’andə mee kəi’g d’odo néndaji gə́ tɔl gə́ tɔl ləm, gə loo-kwa-Ala-mee’g ləm, gə néndaji magəje ləma, gə néndaji gə́ léḛ gə́ léḛ ləm tɔ, nɛ njekinjanéməs lé aar tarəwkəi’g na̰’d gə dəwje tɔl-misa̰ (600) gə́ d’wa nérɔje lə dee ji dee’g lé tɔ. 18Loo gə́ d’andə mee kəi’g lə Mika ɓa d’odo néndaji gə́ tɔl gə́ tɔl ləm, gə loo-kwa-Ala-mee’g ləm, gə néndaji magəje ləma, gə néndaji gə́ léḛ gə́ léḛ ləm tɔ ndá njekinjanéməs lé dəji dee pana: See ɗi ɓa seḭ aw raje bèe wa.
19Deḛ d’ilá keneŋ pana: Wa tai, ila ji tai’g ndá ree ya ree sə sí, i a tel to asəna gə bɔ síje bèe ləm, gə njekinjanéməs lə sí ləm tɔ. See ɗi ɓa i oo gə́ né gə́ maji unda maree wa. See ra kula kḭjanémes mee kəi’g lə dəw kára ba ɓa maji əsé ra kula kḭjanémes kar ginkoji gə́ doŋgɔ gə́ to gel-bɔje lə Israɛl lé ɓa maji wa.
20Mee njekinjanéməs lé lelee aree odo loo-kwa-Ala-mee’g ləm, gə néndaji ləma, gə néndaji gə́ tɔl gə́ tɔl ləm tɔ ndá yeḛ ur ne mbuna njérɔje’g.
21Deḛ d’ɔm na̰ rəbə d’aw ndá d’ar ŋganje, gə nékulje, gə njékodo néje d’aw no̰ dee’g. 22Loo gə́ deḛ d’ya̰ kəi lə Mika gə kuree əw mba̰ ndá dəwje gə́ d’isi boa takəi’g lə Mika lé mbo̰ dɔ na̰ d’aw tuba goo Danje. 23Deḛ ɓar goo Danje ndá deḛ tel dɔ dee dəji Mika pana: See ɗi ɓa rai wa, əsé see ɗi ɓa gə́ gel mbo̰ ne koso-dəwje nee dɔ na̰’d wa.
24Yeḛ tel ila dee keneŋ pana: Magəje ləm gə́ m’ra dee lé seḭ tɔr deeje gə njekinjanéməs na̰’d awje ne: ŋga see ɗi ɓa nai am wa. See ban ɓa seḭ dəjimje gel né gə́ ram ɓəi wa.
25Danje d’ulá pana: Ar ndui ɓar dɔ sí’g el, ɓó lé bèe el ndá dəwje gə́ to njéo̰gje d’a kḭ kɔm na̰ dɔ sí’g karee to gin tuji ləi-i ləm, gə ka̰ njémeekəije ləi ləm tɔ.
26Bèe ɓa Danje d’aw ne kəm dee gə́ kédé. Mika oo to gə́ siŋga dee ur dəa’g ndá yeḛ ɔs tel aw mee kəi’g ləa.
Danje taa ɓee gə́ Layis d’isi keneŋ
27Togə́bè ɓa d’ɔr ne né gə́ Mika ra ləm, gə njekinjanéməs ləa ləm tɔ d’aw ne sə dee ndá deḛ d’ur dɔ dəwje gə́ d’isi Layis gə́ to koso-dəwje gə́ d’isi gə́ majee lé. Deḛ tɔl dee gə kiambas ləm, roo ɓee-boo lé ləm tɔ. 28Dəw kára kara taa dɔ dee el mbata deḛ d’isi əw gə Sido̰ ləm, njéɓeeje gə́ keneŋ kara d’ɔm na̰’d gə dəwje gə́ raŋg el ləm tɔ: deḛ d’isi mee wəl-loo’d gə́ aw saar teḛ Bet-Reob. Danje tel gɔl ɓee-boo lé gogo d’isi keneŋ. 29Deḛ ɓaree Dan gə goo ri Dan gə́ to bɔ deeje gə́ Israɛl ɓa ojee lé ya, nɛ ɓee-boo lé kédé deḛ ɓaree Layis. 30Néndaji gə́ tɔl gə́ tɔl lé deḛ d’un d’unda tar mbata lə dee, ndá Jonatan, ŋgolə Gersɔm, gə́ to ŋgolə Manasə, yeḛ gə ŋganeeje lé tel to njékinjanéməsje mbata ginkoji Danje saar teḛ ne mee ndəa gə́ d’wa dee d’aw sə dee ɓee ɓər’g lé. 31Néndaji gə́ tɔl gə́ tɔl gə́ Mika ra lé deḛ d’unda tar mbata lə dee gə ndəaje lai gə́ kəi-Ala to ne mee loo gə́ Silo’g lé tɔ.
Поточний вибір:
Njéga̰g-Rəwtaje 18: SBA2015
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Ngambai Bible © Alliance Biblique du Tchad 1989, 2015.