TƏ́DA 31
31
Ngán Israel gə̄ rɔ̄ɔ̄n̄ de gə̄ kə́ Madian
1Kɔ́ɔ̄ɓē əda Moijə na:
2Āw̄ ī-dal ba̰ā̰ yá̰á̰ kə́ majaĺ ń de kə́ Madian gə̄ rāān̄ kə ngán Israel gēé ní. Gō tə́ anī ā óy yā kaw̄ gō kaaí gə̄ tə́. 3Moijə əda gír de gə̄ na:
Ādī deē kógə̄ḿ gə̄ dansí tə́ ɔyn̄ yá̰a̰ rɔ̄ɔ̄ yādə́ gə̄ ba aw̄ ənīn̄ Madian gə̄ rɔ̄ɔ̄ dalnə̄ń ba̰ā̰ yā Kɔ́ɔ̄ɓē dɔdə́ tə́. 4Ɔ̄rī deē dūbú kógə̄ḿ kə dɔ gír ɓē gēé yā ngán Israel gēé kógə̄ḿ kógə̄ḿ ādə̄ aw̄n̄ rɔ̄ɔ̄ tə́.
5Dan ngán Israel gə̄ tə́ ní gə̄rān̄ de gə̄ dūbú kógə̄ḿ kə dɔ gír ɓē gēé, adə̄ de gə̄ malang ń ɔyn̄ yá̰a̰ yā kaw̄ ta rɔ̄ɔ̄ tə́ ní i de gə̄ dūbú kutə gidə i jōó. 6Moijə əladə́ ta rɔ̄ɔ̄ tə́ ba adə̄ Pinas kə́ ngōn̄ Eleajar ń i nge tun̄ yá̰á̰ ní dān̄də́. Pinas ɔy yá̰á̰ kə́ táĺ gə̄ ō, bərúnjə kə́ yā kɔ̄ŕ gə̄ ō jīn tə́. 7Nin̄ aw̄ rɔ̄ɔ̄n̄ de kə́ Madian gə̄ tītə̄ ń Kɔ́ɔ̄ɓē ədań Moijə ní, ba tɔ̄lə̄n̄ de kə́ dəngam gə̄ malang. 8Nin̄ tɔ̄lə̄n̄ mban̄g kə́ mí gə̄ kə́ Madian ō. Rī mban̄g gə̄ ní n toó: Ebi ō, Rekem ō, Sur ō, Hur ō, Reba ō. Nin̄ tɔ̄lə̄n̄ Balam ngōn̄ Beor kə kəyā kaskaraá ō. 9Ngán Israel gə̄ əhɔn̄ dəyá̰ gə̄ kə́ Madian kə ngáńdə́ gēé ɓəlo tə́. Əhɔn̄ dā̰ yādə́ gə̄ ń a ətōnəń yá̰á̰ ní kɔ̄ɔ́ malang ō, ɔyn̄ yá̰a̰ kul̄ yādə́ gə̄ malang ō, yá̰a̰ kənge yādə́ gə̄ malang ō. 10Ngán Israel gə̄ tə́lan̄ hor dɔ ɓē yā Madian gə̄ tə́ ō, gérger yādə́ gə̄ tə́ ō kɔ̄ɔ́ malang. 11Nin̄ ɔyn̄ yá̰a̰ kənge yā Madian gə̄ malang ō, əhɔn̄ de gə̄ ō, dā̰ gə̄ ō, ba aw̄n̄. 12Nin̄ aw̄n̄ kə yá̰a̰ gə̄ ń noō malang loo ndidə́ tə́ ndágə loo gə̄ kə́ Moab tə́, kadə bā Jurdḛ ń ra sɔɔ̄n̄ ta naā kə ɓē kə́ Jeriko ní tə́, ba ɔjən̄ Moijə ō, Eleajar nge tun̄ yá̰a̰ ō, ngán Israel gə̄ malang ō.
13Moijə ō, Eleajar ō, ngār gə̄ malang yā ngán Israel gə̄ ō, teē tə́nīn̄ tadə́ gidə ɓē tə́ ndágá. 14Wōn̄g rāā Moijə kə ngol áskar kə́ dūbú gə̄ ō, kə́ ɓú gə̄ ō, nin̄ ń unən̄ dɔ madə̄də́ gə̄ aw̄nəń ta rɔ̄ɔ̄ tə́ ba télən̄ ní, adə̄ ni ədadə́ na:
15Ə́ya̰ī dəyá̰ gə̄ kə kumuú a? 16Ī-gerī majə kadə̄ i dəyá̰ gə̄ ń noō n taān̄ kɔjə̄ yā Balam gól̄nəń ngán Israel gə̄ adə̄ rāān̄ yá̰á̰ kə́ gōtə́ aĺ kə Kɔ́ɔ̄ɓēé tū najə̄ yā Peor tə́ á yá̰á̰ kə́ tōr̄ əsōń dɔ de gə̄ yā Kɔ́ɔ̄ɓē tə́ ní aĺ a? 17Ngɔlaā ní ī-tɔ̄lī ngáń kə́ dəngam gə̄ ō, dəyá̰ gə̄ ń gerə̄n̄ dəngam ɓá ní ō, kɔ̄ɔ́ malang, 18ba ī-ngɔ̄mī ngán kə́ dəyá̰ gə̄ ń gerə̄n̄ dəngam aĺ ɓáý ní tām̄ yāsí tə́. 19Banī sḭḭ̄ malang ń ī-tɔ̄lī deē, aké ɔ́diī rɔ̄ nīń deē ní, ī-ndiī gidə ɓē tə́ ndágá ndɔ̄ sīrí sḭḭ̄ gə̄gē ɓəlo yāsí kə́ dəyá̰ gə̄ gə̄gē. Ā ī-tə́goī rɔ̄sí kə ndɔ̄ kə́ nge ko̰ mətá ō, kə ndɔ̄ kə́ nge ko̰ sīrí ō, kadə̄ ī-téliīń de gə̄ kə́ majaĺ tákə̄də́ alé gə̄. 20Ā ī-tə́goī kūbə̄ gə̄ malang ō, yá̰a̰ malang kə́ rāā kə ndāŕ ō, kə bḭḭ̄ bə̄yā̰á̰ ō, kə́ rāā kə kāgāá ō, kadə̄ télnə̄ń yá̰á̰ kə́ majaĺ tákə̄ alé gə̄.
21Gō tə́ anī Eleajar nge tun̄ yá̰a̰ əda de gə̄ ń aw̄n̄ ta rɔ̄ɔ̄ tə́ ní na:
Ndū najə̄ gə̄ ń Kɔ́ɔ̄ɓē adə̄ Moijə ní n toó: 22Yá̰a̰ gə̄ ń rāān̄də́ kə lɔ́r, aké kə gində̄ arjā̰a̰, aké kə gində̄ nə̄ngá kasə, aké kə gində̄ kə́ karī, aké kə gində̄ etḛ̄ḛ, aké gində̄ pəlɔm#31.22 Gində̄ pəlɔm: I gində̄ kə́ ɔȳ ngá̰ý ō, ɓálən i kə́ ndul ō., tū mbal̄ tə́ kadə̄ to ngándáńg, 23adə̄ i yá̰a̰ malang ń hor a o̰o̰ aĺ ní, ā ə́laīdə́ horoó yā tə́gódə́ kadə̄ télnə̄ń yá̰á̰ kə́ majaĺ tákə̄ alé gə̄. Gō tə́ anī ā ə́laīdə́ kum man̄ tə́go rɔ̄ kə́ yā kɔrə̄ń majaĺ tə́. Ba yá̰a̰ malang ń hor a o̰o̰ ní, ā ī-tə́goī kə maná. 24Ré ī-tə́goī kūbə̄ yāsí gə̄ kə ndɔ̄ kə́ nge ko̰ sīrí oy anī, ā ī-téliī de kə́ unjə̄ njáý njáý gə̄ ō, ā ī-téliī yā reē kem ɓēé ō.
Loo kēgə̄ naā yá̰a̰ kənge kə́ kɔy ta rɔ̄ tə́
25Kɔ́ɔ̄ɓē əda Moijə na:
26Ḭ̄ ō, Eleajar nge tun̄ yá̰a̰ ō, ngār gə̄ kə́ dɔ gír kojə yā ngán Israel gə̄ tə́ ō, ī-tə́daī kutə yá̰a̰ malang kə́ kəhɔ ta rɔ̄ɔ̄ tə́, ī-tə́daī kutə de gə̄ ō, kutə dā̰ gə̄ ō. 27Ba gō tə́ anī ā ī-kēgī gír loo jōó kadə̄ asə naā. Gírən kə́ kógə̄ḿ i tām̄ yā de gə̄ ń aw̄n̄ ta rɔ̄ɔ̄ tə́ ní ō, gírən kə́rēý i tām̄ yā gotə ngán Israel gə̄ tə́ malang ō. 28De gə̄ ń aw̄n̄ ta rɔ̄ɔ̄ tə́ ní, ā ī-tīr̄ dɔ yá̰a̰ kənge kə́ ta rɔ̄ɔ̄ tə́ ń i kə́ yā kadə̄də́ ní: Ré ɓəlo yādə́ gə̄ i ɓú mí anī, ɔ̄r̄ kógə̄ḿ danaá tām̄ yā Kɔ́ɔ̄ɓē tə́ ō, ré man̄g yādə́ gə̄, aké kərō yādə́ gə̄, aké batə̄ yādə́ gə̄, aké bə̄yā̰ yādə́ gə̄ i ɓú mí anī, ā ɔ̄r̄ kógə̄ḿ danaá tām̄ yā Kɔ́ɔ̄ɓē tə́ ō. 29Dɔ yá̰a̰ kənge yādə́ ń a ɔ̄r̄ tām̄ yā Kɔ́ɔ̄ɓē tə́ ní, ā ī-téləń yā kadə̄ Eleajar nge tun̄ yá̰a̰. 30Ba núsə́ yá̰a̰ kənge kə́ tām̄ yā gotə ngán Israel gə̄ tə́ ní, ré ɓəlo gə̄, aké man̄g gə̄ aké kərō gə̄, aké batə̄ gə̄, aké bə̄yā̰ gə̄, aké gotə dā̰ kə́ rang gə̄ i kutə mí anī, ā ɔ̄r̄ kógə̄ḿ kógə̄ḿ danaá tām̄ yā Kɔ́ɔ̄ɓē tə́, ba ā ī-téləń yā kadə̄ ngán Lebi gə̄ ń a rāān̄ kəla tām̄ yā kújə yā Kɔ́ɔ̄ɓē tə́ ní.
31Moijə nin̄ kə Eleajar nge tun̄ yá̰a̰ rāān̄ yá̰á̰ ń Kɔ́ɔ̄ɓē əda Moijə ní. 32Yá̰á̰ ń əhɔn̄ ta rɔ̄ɔ̄ tə́ á nin̄ a nə̄ɓōn̄ naā ní n toó: Batə̄ gə̄ ō, bə̄yā̰ gə̄ ō, malang i 675 000 ō, 33man̄g gə̄ i 72 000 ō, 34kərō gə̄ i 61 000 ō, 35ngán kə́ dəyá̰ kə́ ger̄ dəngam aĺ ɓáý gə̄ i 32 000 ō. 36Núsə́ yá̰á̰ ń adə̄n̄ ngé kaw̄ ta rɔ̄ɔ̄ tə́ gə̄ ní batə̄ gə̄ ō, bə̄yā̰ gə̄ ō, malang i 337 500, 37ba ɔrə̄n̄ dɔ tām̄ yā Kɔ́ɔ̄ɓē tə́ i 675. 38Man̄g gə̄ i 36 000, ba ɔrə̄n̄ dɔ tām̄ yā Kɔ́ɔ̄ɓē tə́ i 72. 39Kərō gə̄ i 30 500, ba ɔrə̄n̄ dɔ tām̄ yā Kɔ́ɔ̄ɓē tə́ i 61. 40Ɓəlo gə̄ i deē 16 000 ba ɔrə̄n̄ dɔ tām̄ yā Kɔ́ɔ̄ɓē tə́ i 32. 41Moijə tél kə dɔ yá̰á̰ kə́ kɔr̄ tām̄ yā Kɔ́ɔ̄ɓē tə́ adə̄ Eleajar nge tun̄ yá̰a̰ tītə̄ ń Kɔ́ɔ̄ɓē ədanəń ní. 42-43Núsə́ yá̰á̰ ń adə̄n̄ gotə ngán Israel gə̄ ní asə naā kə yā de gə̄ ń aw̄n̄ ta rɔ̄ɔ̄ tə́ ní ō. Batə̄ gə̄ ō, bə̄yā̰ gə̄ ō, malang i 337 500 ō, 44man̄g gə̄ i 36 000 ō 45kərō gə̄ i 30 500 ō, 46ɓəlo gə̄ i deē 16 000 ō. 47Núsə́ yá̰a̰ kənge kə́ tām̄ yā gotə ngán Israel gə̄ tə́ ní, ré de gə̄ i kutə mí anī, Moijə ɔr̄ dɔ kógə̄ḿ ō, ré dā̰ gə̄ i kutə mí anī, Moijə ɔr̄ dɔ kógə̄ḿ ō, ba téləń adə̄ ngán Lebi gə̄ ń i ngé rāā kəla kə́ tām̄ yā kújə yā Kɔ́ɔ̄ɓē tə́ ní, tītə̄ ń Kɔ́ɔ̄ɓē ədanəń ní.
Yá̰á̰ kə́ kadə̄ Nə́ɓā kə gó kem ndigií
48Ngol gə̄ ń unən̄ dɔ de kə́ dūbú gə̄ ō, de kə́ ɓú gə̄ ō, aw̄nəń ta rɔ̄ɔ̄ tə́ ní, reēn̄ rɔ̄ Moijə tə́. 49ba ədanən̄ na:
Jə-tə́da kutə de gə̄ ń j-āw̄ sedə́ ta rɔ̄ɔ̄ tə́ ní ba deē kógə̄ḿ dandə́ tə́ tan tḭ̄ḭ̄ alé. 50I tām̄ najə̄ ń toō tə́ n jə-reē kə yá̰a̰ ndējə̄ gēé yā rāań yá̰á̰ kə́ yā kutə̄ń dɔ majaĺ yājí ta kum Kɔ́ɔ̄ɓē tə́ ní. Jə-reē i kə yá̰á̰ kə́ rāā kə lɔ́r gə̄ ń j-ənge ní, adə̄ i nə̄ngá gə̄ ō, kulūm̄ ta jī gə̄ ō, yá̰a̰ ta mbī gə̄ ō, yá̰á̰ súū rɔ̄ kə́ rang gə̄ ō.
51Moijə nin̄ kə Eleajar nge tun̄ yá̰a̰ taān̄ yá̰á̰ kə́ rāā kə lɔ́r gə̄ ń ngol ngé rɔ̄ɔ̄ gə̄ reēnəń ní. 52Yá̰a̰ malang ń ngol ngé rɔ̄ɔ̄ gə̄ ndējə̄n̄ Kɔ́ɔ̄ɓē ní, kɔyn asə kəlōo 176 gə̄ ń noō karī. 53Ba ngé gə̄ ń ngé rɔ̄ɔ̄ gə̄ ɔyn̄ ní tá i tām̄ yādə́ nin̄ kɔ́ gə̄ tə́. 54Moijə nin̄ kə Eleajar nge tun̄ yá̰a̰ taān̄ yá̰a̰ gə̄ kə rāān̄də́ kə lɔ́ŕ ń ngol ngé rɔ̄ɔ̄ gə̄ ndējə̄n̄ Kɔ́ɔ̄ɓē ní, ba aw̄ ɓōkə́n̄ kem kújə kəngə naā tə́ ta kum Kɔ́ɔ̄ɓē tə́ kadə̄ əgań kemən dɔ ngán Israel gə̄ tə́.
Поточний вибір:
TƏ́DA 31: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.