TƏ́DA 25
25
Ngán Israel gə̄ ndɔ̄ȳn̄ ɓesə̄ gə̄
1Ngán Israel gə̄ ndin̄ Sitim anī əlan̄ gír rāā kaya kə ngáń kə́ dəyá̰ kə́ Moab gə̄. 2Ngán kə́ dəyá̰ gə̄ ní ɓārə́n̄də́ loo tun̄ yá̰a̰ kadə̄ ɓesə̄ yādə́ gə̄ tə́, adə̄ əsan̄ yá̰a̰ tū tə́ ō, əsōn̄ kə̄ nang tə́ no ɓesə̄ gə̄ tə́ ndɔ̄ȳn̄də́ ō. 3Ngán Israel gə̄ əlan̄ dɔdə́ gír ɓesə̄ Baal kə́ Peor tə́, adə̄ wōn̄g rāā Kɔ́ɔ̄ɓē sedə́ ngá̰ý. 4Kɔ́ɔ̄ɓē əda Moijə na:
Ngār gə̄ yā ngán Israel gə̄ ní ə́hɔ́də́ malang, i tṵ́ṵ̄də́ dɔɔ́ tū kāgə̄ gə̄ tə́ ādə̄ ran̄ kumdə́ sɔɔ̄ mbang ta kum Kɔ́ɔ̄ɓē tə́ bátə́ kadə̄ oynə̄ń Loo ń noō tə́ wōn̄g ń rāām̄ sesí ngá̰ý ní a tetə. 5Moijə əda ngé gān̄g sarya gə̄ kə́ Israel tə́ na:
Sḭḭ̄ kógə̄ḿ kógə̄ḿ ī-tɔ̄lī de gə̄ yāsí gə̄ ń əlan̄ dɔdə́ gír Baal kə́ Peor tə́ ní.
6Kum mbang ngeé ń noō tə́ Israel kógə̄ḿ teē tū tə́ noō kə dəyá̰ kə́ Madian reē ugə̄ń dan ngákó̰o̰n gə̄ tə́. Moijə nin̄ kə ngán Israel gə̄ ń kánə̄n̄ naā ta kújə kənge naā tə́ ba ndi a nōōn̄ ní a̰a̰n̄də́. 7Dan ń Pinas ngōn̄ Eleajar kə́ ngōn̄ Aaro̰ ń ni i nge tun̄ yá̰á̰ ní a̰a̰də́ anī, ḭḭ dan ngé kán̄ naā gə̄ tə́ ba un nənga jīn tə́. 8Udə gō deē ní tə́ kem kújə tandā ń aw̄ kə dəyá̰ kə́ Madian kemeé ní tə́, ba ɔsədə́ jōó mbak kə nəngaá kemdə́ tə́ adə̄ oyn̄. Loo ń noō tə́ yá̰á̰ kə́ tōr̄ ń a rāā ngán Israel gə̄ ní dəba. 9De kə́ koy gə̄ asən̄ dūbú kutə jōó gidə i sɔ́ kɔ̄ɔ́ ɓá.
10Kɔ́ɔ̄ɓē əda Moijə na:
11Pinas ngōn̄ Eleajar kə́ ngōn̄ Aaro̰ ń ni i nge tun̄ yá̰á̰ ní un wōn̄g yāḿ kɔ̄ɔ́ dɔ ngán Israel gə̄ tə́. Tɔdɔ̄ jang rāān kum gotəḿ dan ngán Israel gə̄ tə́. I yá̰á̰ ń toō n m̄-tɔ̄l̄ Israel gə̄ adə̄ təgān̄ kɔ̄ɔ́ alé dan ń jang yāḿ ɔsəń seḿ ní. 12ngɔlaā ní ə́dan na m-ā m-ə́hɔ madə̄ naā seneé tām̄ yā kem sɔl̄ tə́. 13I madə̄ naā kə́ əndān kem kəla tun̄ yá̰á̰ tə́ kə ngánən gēé ō, ngán kaan gēé ō, kə́ njɔ́ḿ gə̄ tə́. Tɔdɔ̄ ni-rāā jang kum gotə Nə́ɓā yān ō, rāā yá̰a̰ kutə dɔ majaĺ yā ngán Israel gə̄ ō.
14Deē ń tɔ̄lə̄ndə́ naā tə́ kə dəyá̰ kə́ Madian ní i Jimri ngōn̄ Salu. Ni i ngār kə́ dɔ de gə̄ kə́ gír kojə kógə̄ḿ yā Simeo̰ tə́. 15Ba dəyá̰ kə́ Madian ní rīn na i Kosəbi. Rī bɔbə̄n na i Sur. Bɔbə̄n i ngār kə́ dɔ gír kaa kə́rēý tə́ dɔ nang kə́ Madian tə́. 16Anī Kɔ́ɔ̄ɓē əda Moijə na:
17Ī-rɔ̄ɔ̄ī de gə̄ kə́ Madian, ī-tɔ̄līdə́ kɔ̄ɔ́ malang. 18Tɔdɔ̄ nin̄ i madə̄ ba̰ā̰sí gə̄ kə́ lurən̄ ngá̰ý. Nin̄ lurən̄sí tū najə̄ kə́ Peor tə́ ō, kə najə̄ yā Kosəbi ō. Kosəbi i ngōn̄ ngār kə́ Madian ń tɔ̄l̄nən̄ ndɔ̄ ń yá̰á̰ kə́ tōr̄ rāań ngán Israel gə̄ tām̄ najə̄ kə́ Peor tə́ ní.
Поточний вибір:
TƏ́DA 25: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.