TƏ́DA 18
18
1Anī Kɔ́ɔ̄ɓē əda Aaro̰ na:
Yá̰á̰ kə́ rāā gōtə́ aĺ gə̄ kə́ kem loo kə́ táĺ yā Nə́ɓā tə́ ní, najə̄n a əsō i dɔí ḭ̄ tə́ ō, dɔ ngání gə̄ tə́ ō, dɔ ngán kaaí gə̄ tə́ ō, dɔ ngééí gə̄ tə́ ō. Ba yá̰á̰ kə́ gōtə́ aĺ gə̄ ń sḭḭ̄ kɔ́ gə̄ ī-rāāī kə ngání gə̄ loo kəla yāsí tə́ ní, najə̄n a əsō i dɔsí sḭḭ̄ kɔ́ gə̄ tə́. 2I ḭ̄ ō, ngání gə̄ ō n ā āwī ta kújə́ ń sandúkə ndū najə̄ i kemeé tə́ ní. Ba ādə̄ ngákó̰ó̰í gə̄ kə́ gír ɓē yā Lebi tə́ ń i gír ɓē yā bɔbí ní, aw̄n̄ seí loo kə́ táĺ tə́. I nin̄ n a utə̄n̄ gōí ō, a ɔsən̄ kílí ō ní. 3A rāān̄ kəla yāí ō, kəla kə́ tām̄ yā kújə́ ní tə́ ō, ba a ɔdən̄ rɔ̄ yá̰a̰ rāā kəla gə̄ kem loo kə́ táĺ tə́ aĺ ō, a aw̄n̄ ta loo tun̄ yá̰á̰ tə́ aĺ ō, na sōgə́ sḭḭ̄ gə̄gē nin̄ gə̄gē óyiī. 4Nin̄ i ngé kutə gōí gə̄ ō, a rāān̄ kəla malang kə́ tām̄ yā kújə kənge naā tə́ ō. De kə́ karī a ərōsí tə́ alé. 5I sḭḭ̄ n i ngé rāā kəla gə̄ kə́ kem loo kə́ táĺ tə́ ō, kə́ dɔ loo tun̄ yá̰á̰ tə́ ō, yā kadə̄ wōn̄g rāāməń kə ngán Israel gēé to̰ aĺ ní. 6Á̰a̰ā̰, ngákó̰ó̰sí kə́ ngán Lebi gə̄ ń adə̄mə̄n̄ sedə́ ní, m̄-tél sedə́ m-ādə̄sí kadə̄ rāān̄ kəla gə̄ kə́ tām̄ yā kújə kənge naā tə́. 7Ba ḭ̄ Aaro̰ sḭḭ̄ kə ngání, ā ī-rāāī kəla tun̄ yá̰a̰ kadə̄ Nə́ɓā dɔ loo tun̄ yá̰á̰ tə́ ō, kem loo kə́ táĺ ngá̰ý ń gāngə̄n̄ gír kə kūbūú tə́ ní ō. Kəla ń ā ī-rāāī ní n noó. I mā n m-ādə̄sí karī. De kə́ karī ń aw̄ kadə tə́ ní a tɔ̄l̄nən̄ kɔ̄ɔ́.
Yá̰a̰ kəndā nja ngé tun̄ yá̰a̰ gə̄
8Kɔ́ɔ̄ɓē əda Aaro̰ na:
Á̰a̰ā̰, m-ə̄ndāī dɔ kəla yá̰á̰ kə́ táĺ gə̄ ń ngán Israel gə̄ adə̄mə̄n̄ ní tə́ ō, yá̰a̰ gə̄ ní m̄táləń m-ādə̄sí kə ngání gə̄ ō, ngán kaaí gə̄ ō, kə ndū kə́ a to ngándáńg. 9Yá̰a̰ ndējə̄ kə́ táĺ ngá̰ý gə̄ ń róōn̄ núsən yāḿ horoó oy anī a tálnə̄ń yā kadə̄sí ní nin̄ n toó: Yá̰a̰ ndējə̄ gə̄ malang kə́ rāā kə ndujú ō, dā̰ kə́ tun̄ yā kutəń dɔ majaĺ ō, dā̰ kə́ tun̄ yā kəgāń kə̄rā yá̰á̰ kə́ rāā gōtə́ aĺ ō. Yá̰á̰ ndējə̄ kə́ táĺ ngá̰ý gə̄ ń noō a télnə̄ń yā kadə̄sí sḭḭ̄ kə ngání gə̄ ō, ngán kaaí gə̄ ō. 10Ā ə́saīdə́ i kem loo kógə̄ḿ kə́ táĺ tə́. Ba i dəngam gə̄ ngóy n a əsan̄, tɔdɔ̄ i yá̰a̰ kəsa kə́ yā ɓōĺ gidə. 11Yá̰a̰ malang ń ngán Israel gə̄ a ndējə̄n̄ Nə́ɓā ní, dɔn kə́ kɔr̄ i tām̄ yāsí tə́ ō. M-ādə̄sí kə ngáńsí kə́ dəngam gə̄ ō, kə́ dəyá̰ gə̄ ō, kə ndū kə́ a to ngándáńg. De gə̄ malang kə́ kem ndogə̄ yāsí tə́ ń majaĺ tákə̄də́ aĺ ní, a əsan̄. 12M-ādī yibə̄ ō, kasə nduú ō, kōō ō, kə́ majə ngá̰ý gə̄ ń i yá̰á̰ kə́ ta kəga dɔ gə̄ ń ngán Israel gə̄ ndējə̄mə̄n̄ ní. 13Kan̄ yá̰á̰ kə́ ta kəga dɔ gə̄ kə́ kem ndɔr̄ yādə́ tə́ ń a adə̄mə̄n̄ ní, i tām̄ yāí tə́. De gə̄ malang kə́ kem ndogə̄ yāí tə́ ń majaĺ tákə̄də́ aĺ ní a əsan̄. 14Yá̰a̰ malang ń ngán Israel gə̄ bāān̄ dɔ tām̄ yāḿ tə́ ní, i tām̄ yāí tə́ ō. 15Hágə́ yá̰a̰ malang, adə̄ i hágə de gə̄ aláa hágə dā̰ gə̄ ń a ndējə̄n̄ Kɔ́ɔ̄ɓē ní, i tām̄ yāí tə́ ō. Banī hágə deē ō, hágə dā̰ kə́ yḛr ō ní, ādə̄ gāngə̄n̄ dɔdə́. 16Ré ojən̄də́ rāā nāā kógə̄ḿ anī, ādə̄ gāngə̄n̄ dɔdə́ kə gō gātə̄ ń ā ī-gān̄g ní. A ī-gān̄g i sə́lē arjā̰a̰ mí, sə́lē ń a əsan̄ kem loo kə́ táĺ tə́ ní, adə̄ sə́lē kógə̄ḿ kɔȳn i ngán kəlōo gə̄ kutə. 17Banī hágə man̄g ō, batə̄ ō, bə̄yā̰ ō ní, ā ādī deē ta róbə gān̄g dɔ alé. Nin̄ i dā̰ kə́ yā ɓōĺ gidə gə̄. Ā ī-bōkíī mósə́də́ dɔ loo tun̄ yá̰á̰ tə́ ō, ā ī-róōī yibə̄də́ horoó kadə̄ sēēn nel̄ Kɔ́ɔ̄ɓē ō. 18Gō tə́ anī dā̰də́ i tām̄ yāsí tə́ tītə̄ ń nganjə dā̰ kə́ ndējə̄ Nə́ɓā ō, ɓúr dā̰ kə́ ndējə̄ Nə́ɓā ō, i tām̄ yāsí tə́ ní. 19Adə̄ dɔ yá̰á̰ kə́ táĺ gə̄ malang ń ngán Israel gə̄ ɔr̄ adə̄mə̄n̄ ní, m̄-téləń m-ādī ḭ̄ ō, ngání kə́ dəngam gə̄ ō, kə́ dəyá̰ gə̄ ō, kə ndū kə́ a to ngándáńg. Nge ń noō i madə̄ naā kə́ rāā kə katāá ō, kə́ a to ngándáńg tām̄ yāí tə́ ō, tām̄ yā ngání gə̄ tə́ ō, ngán kaaí gə̄ tə́ ō, ta kum Kɔ́ɔ̄ɓē tə́.
20Kɔ́ɔ̄ɓē əda Aaro̰ ɓáý to̰ na:
Dɔ nang ń m-ā m-ādə̄ ngán Israel gə̄ kadə̄ kēgə̄n̄ naā tə́ ní, ḭ̄ ā ə́nge yāí tū tə́ alé. I mā n i núsən yāí ń kadə̄ ə́nge ní ō, i mā n i yá̰a̰ kənge yāí kə́ dan ngán Israel gə̄ tə́ ō ní.
Yá̰a̰ kəndā nja ngán Lebi gə̄
21Ba kəgā yā ngán Lebi gə̄ n toó: Yá̰a̰ malang kə́ nge ko̰ kutə ń ngán Israel gə̄ a ɔrə̄n̄ tām̄ yā Kɔ́ɔ̄ɓē tə́ ní#18.21 Yá̰á̰ kə́ nge ko̰ kutə: Á̰a̰ī Leb 27.30-33; Ndū 14.22-29 m-ādə̄ ngán Lebi gə̄ gír kəla ń a rāān̄ tām̄ yā kújə kənge naā tə́ ní. 22Gotə ngán Israel gə̄ a reēn̄ rɔ̄ kújə kənge naā tə́ ngɔr alé, tɔdɔ̄ ni ń noō i majaĺ kə́ asə yo deē. 23I ngán Lebi gə̄ ngóy n i ngé rāā kəla gə̄ kə́ kem kújə kənge naā tə́ ní. Yá̰á̰ kə́ gōtə́ aĺ gə̄ ń nin̄ a rāān̄ ní, najə̄n a əsō i dɔdə́ nin̄ kɔ́ gə̄ tə́. Ndū najə̄ ń toō a to ngándáńg tām̄ yā ngáńsí gə̄ tə́ ō, ngán kaasí gə̄ tə́ ō. Ngán Lebi gə̄ a əngen̄ dɔ nang tītə̄ yā gotə ngán Israel gə̄ alé. 24Banī yá̰á̰ kə́ nge ko̰ kutə gə̄ ń ngán Israel gə̄ a ɔrə̄n̄ tām̄ yā Kɔ́ɔ̄ɓē tə́ ní, m-ādə̄ ngán Lebi gə̄ yá̰a̰ kənge yādə́ tə́. I tām̄ najə̄ ń noō tə́ n m-ə́dádə́ na a əngen̄ dɔ nang tītə̄ yā gotə ngán Israel gə̄ aĺ ní.
25-26Kɔ́ɔ̄ɓē mēr̄ Moijə kəda ngán Lebi gə̄ ndū najə̄ gə̄ ń toō:
Ré ngán Israel gə̄ a adə̄n̄sí dɔ yá̰á̰ kə́ kɔr̄ gə̄ ń Kɔ́ɔ̄ɓē adə̄sí kə́ yāsí tə́ ní anī, sḭḭ̄ kɔ́ gə̄ ā ī-téliī yā kɔr̄ nge kə́ ko̰ kutə yā ndējə̄n. 27Tītə̄ ń ngáń ngé ɓē madə̄sí gə̄ a rāānəń ní, nge ń noō rāā rɔ̄n i dɔ kōō yāsí kə́ kem gárāá tə́ kə́ ɔ̄r̄ ādī Kɔ́ɔ̄ɓē ō, rāā rɔ̄n i dɔ kasə nduú yāsí kə́ kijə tə́ kə́ ɔ́sə ādī ō. 28I beé n sḭḭ̄ ā ādīiń Kɔ́ɔ̄ɓē dɔ yá̰a̰ yāsí gə̄ ō ní. I yá̰á̰ kə́ nge ko̰ kutə gə̄ ń ā ī-táāī jī ngáń ngé ɓē madə̄sí gə̄ tə́ ní n ā ɔ̄rī dɔ yā kadə̄n ní. Ba ā ādī i Aaro̰ nge tun̄ yá̰a̰. 29Yá̰a̰ malang ń a adə̄n̄sí ní, ā ɔ̄rī yā Kɔ́ɔ̄ɓē i dan ngé kə́ majə ngá̰ý gə̄ tə́. Nge ń noō i yá̰a̰ ndējə̄ kə́ táĺ. 30Ré ɔ̄rī dɔ oy anī, gotən i tām̄ yāsí tə́, tītə̄ ń gotə kōō kə́ kem gárāá kə́ kɔr̄ dɔ ō, gotə kasə nduú kə́ kɔsə dɔ ō, i tām̄ yā ngán Israel gə̄ tə́ ni. 31Loo kə́ rāā gə̄gē ā ə́saī yá̰a̰ gə̄ ní tū tə́ kə ngéésí gēé karī, tɔdɔ̄ i kəgā yāsí kə́ tām̄ yā kəla ń ī-rāāī kem kújə kənge naā tə́ ní. 32Ré ɔ̄rī dɔ kə́ majə ngá̰ý ń yāḿ ní oy ba ə́saī gotə anī, ī-rāāī i yá̰á̰ kə́ majaĺ alé. Ī-rāāī yá̰a̰ ndējə̄ kə́ táĺ gə̄ yā ngán Israel gə̄ yá̰á̰ kə́ karī tə́ alé, adə̄ ā óyiī alé.
Поточний вибір:
TƏ́DA 18: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.