TƏ́DA 13
13
Moijə əla de gə̄ kəndā ma̰ȳ dɔ nang kə́ Kanaan tə́
1Kɔ́ɔ̄ɓē əda Moijə na:
2Əla de gə̄ ādə̄ aw̄ əndān̄ ma̰ȳ dɔ nang kə́ Kanaan ń m-ādə̄ ngán Israel gə̄ ní. Ā ɔ̄r̄ i deē kógə̄ḿ kógə̄ḿ kə dɔ gír ɓē gēé n ā ə́ládə́ ní. De gə̄ ní ā ī-gə̄rādə́ i dan ngār gə̄ yā ngán Israel gə̄ tə́. Moijə rāā yá̰á̰ ń Kɔ́ɔ̄ɓē əda ní. 3Ni-ndi i kem dəla loo ké Paran tə́ n əlań de gə̄ ní. De gə̄ ń ni əladə́ ní nin̄ malang i ngār gə̄ yā ngán Israel gə̄. 4Rīdə́ n toō:
Samua ngōn̄ Jakur, tām̄ yā gír ɓē yā Ruben tə́.
5Sapat ngōn̄ Hori, tām̄ yā gír ɓē yā Simeo̰ tə́.
6Kaleb ngōn̄ Yepune, tām̄ yā gír ɓē yā Juda tə́.
7Igal ngōn̄ Jəjep, tām̄ yā gír ɓē yā Isakar tə́.
8Hose ngōn̄ Nun, tām̄ yā gír ɓē yā Epəraim tə́.
9Palti ngōn̄ Rapu, tām̄ yā gír ɓē yā Benjamḛ tə́.
10Gadiel ngōn̄ Sodi, tām̄ yā gír ɓē yā Jabulo̰ tə́.
11Gadi ngōn̄ Susi, tām̄ yā gír ɓē yā Manase ngōn̄ Jəjep tə́.
12Amiel ngōn̄ Gemali, tām̄ yā gír ɓē yā Dan tə́.
13Setur ngōn̄ Mikael, tām̄ yā gír ɓē yā Aser tə́.
14Nabi ngōn̄ Bopsi, tām̄ yā gír ɓē yā Nepətali tə́.
15Gewel ngōn̄ Maki, tām̄ yā gír ɓē yā Gad tə́.
16De gə̄ ń Moijə əladə́ kəndā ma̰ȳ nang kə́ Kanaan tə́ ní, rīdə́ n noó. Moijə ənda rī Hose ngōn̄ Nun na i Jojue#13.16 Hose aláa Jojue ní kumən na i Kɔ́ɔ̄ɓē ajə de gə̄..
17Pá tá kadə̄ aw̄n̄ ní, Moijə ədadə́ na:
Ī-teēī gō nang kə́ Negeb tə́, ba āwī dām̄ kə́ mbalá tə́. 18Loo ń noō tə́ ā á̰a̰ī ké dɔ nang ní to ba̰ý wa, ké gír de kə́ kemeé gə̄ ngangə̄n̄ aké ngangə̄n̄ aĺ wa, ké nin̄ i ngá̰ý aké i sḛ́ý beē wa. 19Á̰a̰ī ké dɔ nang ní majə aké majaĺ wa, ké ɓē kə́ kemeé gə̄ i ɓē kə́ ngan̄g gə̄#13.19 Ɓē kə́ ngan̄g gə̄: I ɓē gə̄ kə́ əgan̄ ndogə̄ mbal̄ gidə tə́ yā kɔgə̄ń ngé rɔ̄ɔ̄ gə̄ kudə kemeé. aké i ɓē gə̄ kə́ tə́ndān̄də́ kə̄ noō karī wa. 20Á̰a̰ī ké dɔ nang kə́ tū tə́ i kə́ teē yá̰á̰ ngá̰ý aké teē yá̰a̰ aĺ wa, ké kāgə̄ gə̄ ran̄ dɔ nang ní tə́ aké gətóon̄ wa. Əhɔī rɔ̄sí tɔgə ba ī-tə́jaī kan̄ kāgə̄ gə̄ kə́ dɔ nang ní tə́ ī-reēiń. Dan ngeé ń noō tə́ ní, i dan yā kəja kan̄ kāgə̄ nduú kə́ ta kəga dɔ gə̄.
21De gə̄ ní aw̄ əndān̄ ma̰ȳ dɔ nang kə́ Kanaan, əlan̄ gír kem dəla loo kə́ Sin tə́ bátə́ ugə̄nəń Rehob, kadə Lebo Hamat tə́ 22Nin̄ unən̄ gō nang kə́ Negeb ba aw̄n̄ bátə́ ugə̄n̄ Hebron, loo ń ngán Anak gə̄ ń, rīdə́ na i Ahiman ō, Sesay ō, Talmai ō, ndin̄ tū tə́ ní. Rāān̄ ɓē kə́ Hebron adə̄ rāā ɓāl̄ sīrí pá tá rāān̄ ɓē kə́ Soan kə́ dɔ nang kə́ Ejiptə tə́ ɓáý. 23Nin̄ aw̄ ugə̄n̄ wól loo kə́ Esəkol tə́#13.23 Wól loo kə́ Esəkol: I wól loo kə́rēý kə́ dām̄ mbɔ́r Hebron ké ko̰ó̰ tə́.. Əjan̄ dɔ bəra nduú kógə̄ḿ loo ngeé ń noō tə́, ba əlan̄ sáā kāgə̄ kə́ ngāl̄ danaá adə̄ de gə̄ jōó ətōnəń. Nin̄ əjan̄ kan̄ kāgə̄ gərenadə gə̄ ō, əjan̄ kan̄ kāgə̄ kótə̄ gə̄ ō. 24Əndān̄ rī loo ní na i wól loo kə́ Esəkol, kumən na i wól loo kə́ dɔ bəra nduú i tū tə́. Tām̄ ngán Israel gə̄ əjan̄ dɔ bəra nduú kógə̄ḿ loo ní tə́.
De gə̄ ń Moijə əladə́ ní tél reēn̄
25Ngé kəndā ma̰ȳ loo gə̄ ní rāān̄ ndɔ̄ kutə sɔ́ anī télən̄ dɔ tə́. 26Nin̄ reē əngen̄ Moijə ō, Aaro̰ ō, ngán Israel gə̄ ō, Kades kem dəla loo kə́ Paran tə́. Nin̄-ənīn̄də́ gotə yá̰a̰ malang ń a̰a̰n̄ ní ō, ɔjən̄də́ kan̄ kāgə̄ gə̄ kə́ kem ɓē ní tə́ ō. 27Najə̄ ń ədan̄ Moijə ní n toó:
J-aw̄ j-ugə dɔ nang ń ə́lájí tū tə́ ní. I dɔ nang kə́ mba ō, yibə̄ tejə ō, i ngá̰ý tū tə́ rɔ̄kum. Á̰a̰ā̰ kan̄ kāgə̄ kə́ tū tə́ gə̄ n toó. 28Ba ɓē bo kə́ tū tə́ gə̄ i ɓē kə́ ngan̄g ngá̰ý gə̄ ō, gír de gə̄ ń ndin̄ kemeé ní i gír de gə̄ kə́ tɔ́gə́də́ i ngá̰ý ō. Tá j-a̰a̰ de kə́ ngāl̄ ngá̰ý gə̄ kə́ gír kaa yā Anak tə́ dɔ nang ní tə́ ō. 29Amalek gə̄ ndin̄ i gō nang kə́ Negeb tə́. Ba Het gə̄ ō, Yebus gə̄ ō, Amor gə̄ ō, ndin̄ i dām̄ kə́ mbalá tə́. Kanaan gə̄ ndin̄ i kadə bā bo tə́ ō, kə gō kadə bā Jurdḛ ō.
30Kaleb adə̄ de gə̄ ń a tāmə̄n̄ kə Moijə ní ran̄ tadə́ mbóo, ní əda na:
J-aw̄ jə-taāī dɔ nang ní. J-a jə-tetiī rɔ̄ɔ̄. 31Banī de gə̄ ń aw̄n̄ seneé kəndā ma̰ȳ looó ní ədan̄ na:
J-asiī rɔ̄ɔ̄ de gə̄ ń noō alé, tɔdɔ̄ tɔ́gə́də́ tɔȳ yājí. 32Ba əlan̄ gír a tə́dan̄ najə̄ kə́ majaĺ gə̄ dɔ ɓē ń aw̄ a̰a̰n̄ tə́ ní ta kum ngán Israel gə̄ tə́, ədan̄ na:
Dɔ nang ń j-āw̄ j-əndā ma̰ȳ j-a̰ā̰ ní i dɔ nang kə́ a əsa i de kə́ tū tə́ gə̄. Tá de gə̄ malang ń j-a̰a̰də́ tū tə́ ní i de ké ngāl̄ ngá̰ý gə̄. 33J-a̰a̰ de kə́ ngāl̄ ngá̰ý gə̄ kə́ gír kaa yā Anak tə́ dɔ nang ní tə́. J-a̰a̰ rɔ̄jí tītə̄ gaẃ gə̄ ta kumdə́ tə́ ō, nin̄ a̰a̰n̄jí ɓáa jə-to tītə̄ ń noō rɔ̄kum ō.
Поточний вибір:
TƏ́DA 13: SARDC
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bibəl ta Sar̄ © L'Alliance Biblique du Tchad, 2006, 2010.