Psalms 50
50
1အနန္တတန်ခိုးတော်နှင့်ပြည့်စုံတော်မူသော ဘုရားရှင်သည် အမိန့်တော်ရှိ၍ နေထွက်ရာအရပ်မှ နေဝင်ရာအရပ်သို့တိုင်အောင် ကမ္ဘာတစ်ဝှမ်းလုံးရှိလူတို့အား ဆင့်ခေါ်တော်မူ၏။ 2ဘုရားရှင်သည် လှပခြင်းနှင့်ပြည့်စုံသော ဇိအုန်တော်ပေါ်မှ ထွန်းလင်းတောက်ပသော ရောင်ခြည်တော်ကို လွှတ်တော်မူ၏။ 3အကျွန်ုပ်တို့၏ဘုရားရှင်သည် ကြွလာတော်မူမည်ဖြစ်၏။ ကိုယ်တော်သည် တိတ်ဆိတ်စွာနေတော်မူမည်မဟုတ်။ ကိုယ်တော်၏ရှေ့တော်၌ ဝါးမျိုတတ်သောမီးရှိ၍ ကိုယ်တော်၏ပတ်လည်၌ ပြင်းထန်သောမုန်တိုင်းရှိ၏။ 4ကိုယ်တော်သည် မိမိ၏လူမျိုးတော်ကို စစ်ဆေးစီရင်ရန် အထက်ကောင်းကင်နှင့် ကမ္ဘာမြေကြီးကိုဆင့်ခေါ်လျက် 5"ပူဇော်သက္ကာပြုခြင်းအားဖြင့် ငါနှင့်ပဋိညာဉ်ဖွဲ့ကြသည့် ငါ၏သန့်ရှင်းမြင့်မြတ်သူတို့အား ငါ့ထံသို့စုဝေးစေကြလော့" ဟု မိန့်တော်မူ၏။ 6ထိုအခါ ကောင်းကင်သည် ကိုယ်တော်ဖြောင့်မတ်ခြင်းကို ပြောကြား၏။ အကြောင်းမူကား ဘုရားရှင်ကိုယ်တော်တိုင်သည် တရားစီရင်သောအရှင် ဖြစ်တော်မူ၏။ 7ကိုယ်တော်က "ငါ၏လူမျိုးတော်တို့၊ နားထောင်ကြလော့။ ငါမိန့်မြွက်တော်မူမည်။ အို အစ္စရေးလူမျိုးတို့၊ ငါသည် သင်တို့၏တစ်ဖက်၌ သက်သေခံမည်။ ငါသည် ဘုရားရှင်ဖြစ်၏။ သင်တို့၏ ဘုရားရှင်ဖြစ်၏။ 8ငါသည် သင်တို့၏ ပူဇော်သက္ကာများအတွက် သင်တို့အား ဆုံးမသည်မဟုတ်။ သင်တို့၏ မီးရှို့ပူဇော်သည့် ပူဇော်သက္ကာများသည်လည်း ငါ၏ရှေ့၌ အစဉ်မပြတ်ရှိကြ၏။ 9သင်၏အိမ်မှ နွားထီးကိုလည်းကောင်း၊ သင်၏ခြံထဲမှ ဆိတ်ထီးတို့ကိုလည်းကောင်း ငါမယူ။ 10အကြောင်းမူကား တောထဲရှိတိရစ္ဆာန်ရှိသမျှနှင့် ထောင်နှင့်ချီသောတောင်ကုန်းများပေါ်ရှိ တိရစ္ဆာန်တို့ကို ငါပိုင်၏။ 11တောင်များပေါ်ရှိ ကျေးငှက်အားလုံးကို ငါသိ။ တောသတ္တဝါများကိုလည်း ငါပိုင်၏။ 12ငါဆာလောင်မွတ်သိပ်ခဲ့လျှင်ပင် သင်တို့အား ငါပြောမည်မဟုတ်။ အကြောင်းမူကား ကမ္ဘာလောကမှစ၍ ကမ္ဘာလောကတွင်ရှိသည့် အရာအားလုံးတို့အား ငါပိုင်၏။ 13နွားလားတို့၏အသားကို ငါစားမည်လော။ ဆိတ်ထီးတို့၏သွေးကို ငါသောက်မည်လော။ 14ကျေးဇူးတော်ချီးမွမ်းခြင်း ပူဇော်သက္ကာဖြင့် ဘုရားရှင်အား ပူဇော်လော့။ အမြင့်မြတ်ဆုံးသောအရှင်ထံ သင်ပြုထားသည့် ကတိသစ္စာများအား ပြည့်စုံစေလော့။ 15ဆင်းရဲဒုက္ခရောက်သောကာလ၌ ငါ့ကိုခေါ်လော့။ ငါသည် သင့်အားကယ်မမည်။ သင်သည်လည်း ငါ့အားဂုဏ်ပြုချီးမွမ်လိမ့်မည်" ဟု မြွက်ဆိုခဲ့၏။ 16သို့သော် ဘုရားရှင်သည် ယုတ်မာကောက်ကျစ်သောသူအား "ငါ၏ပြဌာန်းချက်များကို ပြောကြား၍ ငါ၏ပဋိညာဉ်ကို နှုတ်၌ဆောင်ထားခြင်းသည် သင်နှင့်မည်သို့ သက်ဆိုင်သနည်း။ 17အကြောင်းမူကား သင်သည် ဆုံးမပဲ့ပြင်ခြင်းကို မုန်းတီး၏။ ငါ၏စကားတို့ကို ပစ်ပယ်၏။ 18သင်သည် သူခိုးနှင့်တွေ့သောအခါ သူ့အားလက်ခံ၏။ အိမ်ထောင်ရေးဖောက်ပြန်သူတို့နှင့်လည်း ပေါင်းသင်းဆက်ဆံ၏။ 19သင်၏နှုတ်အား မကောင်းမှုအတွက်အသုံးပြုပြီး သင်၏လျှာကို လိမ်လည်လှည့်ဖြားမှု၌ မှီဝဲဆည်းကပ်စေ၏။ 20သင်သည် မိမိ၏ ညီအစ်ကိုအရင်းအချာများကိုပင် ပြစ်တင်စွပ်စွဲတတ်၏။ 21သင်သည် ဤအမှုတို့ကို ပြုကျင့်သော်လည်း ငါသည်ဆိတ်ဆိတ်နေခဲ့၏။ သို့ဖြစ်၍ ငါ့အား သင်နှင့်တူသည်ဟု ထင်မှတ်ခဲ့၏။ သို့သော် ယခုတွင် ငါသည် သင့်အားပြောဆိုဆုံးမမည်။ သင်၏အပြစ်အား ပွင့်လင်းစွာဖြင့် ထုတ်ဖော်ပြသမည်။ 22ဘုရားရှင်အား မေ့လျော့တတ်သောသူတို့၊ ဤအချက်ကို သတိနှင့်ဆင်ခြင်ကြလော့။ ထိုသို့မဟုတ်ပါက ငါသည် သင်တို့အား အပိုင်ပိုင်းဆုတ်ဖြဲသဖြင့် သင်တို့သည် ကယ်တင်မည့်သူမရှိဖြစ်လိမ့်မည်။ 23ကျေးဇူးတော်ချီးမွမ်းခြင်း ပူဇော်သက္ကာဖြင့် ပူဇော်သောသူသည် ငါ့အားဂုဏ်ပြုချီးမွမ်းသောသူဖြစ်သည်။ မိမိ၏လမ်းခရီးကို ပြင်ဆင်သောသူအားလည်း ဘုရားရှင်၏ ကယ်တင်ခြင်းကို ငါပြသမည်" ဟု မိန့်တော်မူ၏။
Поточний вибір:
Psalms 50: TPV-RV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.