Philippians 3
3
1ထို့အပြင် အကျွန်ုပ်၏ညီအစ်ကိုမောင်နှမတို့၊ ဘုရားရှင်နှင့်တစ်လုံးတစ်ဝတည်းဖြင်လျက် ဝမ်းမြောက်ကြလော့။ သင်တို့ထံ ယခင်ကအကျွန်ုပ်ရေးပို့ခဲ့သော အကြောင်းအရာများကို ယခုထပ်မံ၍ရေးသားပေးပို့ရခြင်းသည် အကျွန်ုပ်အတွက်အပန်းမကြီးပေ။ အဘယ်ကြောင့်ဆိုသော် ဤအရာများသည် သင်တို့အားမှားယွင်းသော သွန်သင်မှုဘေးမှကာကွယ်လိမ့်မည်ဖြစ်သောကြောင့်ဖြစ်သည်။ 2ခွေးများနှင့်တူသော အကျင့်မကောင်းသည့်သူများကိုသတိထားကြလော့။ မကောင်းမှုကိုပြုလုပ်သည့် သူများကိုလည်းသတိထားကြလော့။ ထိုသူတို့သည်ခရစ်ယာန်ဖြစ်လိုသောအမျိုးသားတိုင်း အရေးဖျားလှီးမင်္ဂလာ ခံယူရမည်ဟုပြောဆိုသောကြောင့်ဖြစ်သည်။ 3အရေဖျားလှီးခြင်းမင်္ဂလာအစစ်အမှန်ကို ခံရသောသူတို့ကားထိုသူတို့မဟုတ်ဘဲ အကျွန်ုပ်တို့သာလျှင်ဖြစ်ပေသည်။ အဘယ်ကြောင့်ဆိုသော် အကျွန်ုပ်တို့သည်ဘုရားရှင်၏ ဉာဏ်အလင်းတော် အားဖြင့်ဘုရားရှင်အားကိုးကွယ်ဝတ်ပြုကြသောကြောင့်ဖြစ်သည်။ အကျွန်ုပ်တို့သည်လူ့အားထုတ်မှုအပေါ်၌အားမကိုးဘဲ ယေရှုခရစ်တော် ပြုသောအမှုအပေါ်၌သာအားကိုးကြသည်။ 4သို့သော် လူ့အားထုတ်မှုအပေါ် အားကိုးစရာလည်း ကျွန်ုပ်တွင်ရှိ၏။ တစ်စုံတစ်ယောက်သည် လူ့အားထုတ်မှုအပေါ် အားကိုးစရာရှိသည်ဟုဆိုလျှင် အကျွန်ုပ်တွင်ပို၍ပင်ရှိသည်။ 5အကျွန်ုပ်သည်ရှစ်ရက်မြောက်သောနေ့တွင် အရေဖျားလှီးမင်္ဂလာကိုခံယူထားသောသူ၊ အစ္စရေးလူမျိုး၊ ဗင်္ယာမိန် အနွယ်ဝင်၊ ဟေဗြဲလူမျိုးမှပေါက်ဖွားလာသော ဟေဗြဲလူမျိုးအစစ်ဖြစ်ပြီး ပညတ်တရားစောင့်ထိန်းမှုနှင့်ပတ်သက် ၍ဆိုရလျှင် ငါသည်ဖာရိရှဲဂိုဏ်းဝင်ဖြစ်တစ်ဦးဖြစ်သည်။ 6စိတ်အားထက်သန်မှုအရဆိုလျှင် အသင်းတော်ကိုညှဉ်းဆဲသောသူဖြစ်သည်။ ပညတ်တရားအားလိုက်နာ ကျင့်သုံးမှုအရဆိုလျှင် အကျွန်ုပ်သည်အပြစ်တင်စရာမရှိသောသူဖြစ်သည်။ 7သို့သော် ထိုအရာများသည်အကျွန်ုပ်အတွက်အမြတ်ဟုမှတ်ယူနိုင်ခဲ့သော်လည်း ယခုအခါယေရှုခရစ်တော် အတွက်ကြောင့် အရှုံးဟုအကျွန်ုပ်မှတ်ယူသည်။ 8ထိုမျှမက အကျွန်ုပ်၏အရှင်ဖြစ်သောယေရှုခရစ်တော်ကို ရင်းနှီးကျွမ်းဝင်ရခြင်းတည်းဟူသော ကြီးမားသည့်အကျိုးကျေးဇူးနှင့်ယှဉ်လျှင် အရာအားလုံးကို အရှုံးဟူ၍သာမှတ်ယူသည်။ ယေရှုခရစ်တော်အတွက်အရာခပ်သိမ်းကို အဆုံးရှုံးခံပြီး ၎င်းတို့ကိုအမှိုက်သရိုက်များကဲ့သို့မှတ်ယူသည်။ ဤသို့ဖြင့် အကျွန်ုပ်သည် ယေရှုခရစ်တော်ကိုအပြည့်အဝရရှိမည်ဖြစ်သည်။ 9ထို့ ကြောင့်အကျွန်ုပ်သည် ကိုယ်တော်နှင့် တပေါင်းတစည်းတည်းဖြစ်မည်ဖြစ်သည်။ ပညတ်တော်ကို လိုက်နာခြင်းအားဖြင့် ရရှိသော အကျွန်ုပ်၏ ဖြောင့်မတ်ခြင်းကို အားမကိုးတော့ဘဲ ယေရှုခရစ်တော်ကို ယုံကြည်ခြင်းအားဖြင့် ရရှိသော ဖြောင့်မတ်ခြင်းကိုသာအားကိုးသည်။ ထိုဖြောင့်မတ်ခြင်းသည် ဘုရားရှင်သတ်မှတ်တော်မူသောအရာ ဖြစ်ပြီး ယုံကြည်ခြင်းကို အခြေခံ၍ ရရှိသောဖြောင့်မတ်ခြင်းလည်းဖြစ်သည်။ 10အကျွန်ုပ်သည် ယေရှုခရစ်တော်ကိုပို၍သိကျွမ်းရန်၊ ကိုယ်တော်၏အသက်ပြန်လည်ရှင်သန်ထမြောက်ခြင်း တန်ခိုးတော်ကိုခံစားသိရှိရန်၊ ကိုယ်တော်ကဲ့သို့ပင် အသေခံ၍ ကိုယ်တော်၏ဆင်းရဲဒုက္ခကိုမျှဝေခံစားရန်တို့ကို သာအလိုရှိသည်။ 11သို့မှသာ သေခြင်းမှပြန်လည်ရှင်သန်ထမြောက်ခြင်းအခွင့်ကိုရရှိမည်ဖြစ်သည်။ 12ထိုသို့ဆိုသော် အကျွန်ုပ်သည် အောင်မြင်မှုကို ရရှိပြီ၊ ပြည့်စုံပြီဟုမဆိုလိုပါ။ သို့သော် ယေရှုခရစ်တော်သည် အကျွန်ုပ်အား ထိုပြည့်စုံခွင့်ကိုပေးရန် အကျွန်ုပ်ကိုဦးစွာ ပိုင်ဆိုင်ထားသည်ဖြစ်၍ အကျွန်ုပ်သည်လည်း ထိုအခွင့်ကို ရရှိရန် ကြိုးပမ်းလျက်ရှိသည်။ 13အကျွန်ုပ်၏ညီအစ်ကိုမောင်နှမတို့၊ အကျွန်ုပ်သည်ထိုပြည့်စုံခွင့်ကို ရရှိပိုင်ဆိုင်ထားပြီဟုမမှတ်ယူပါ။ သို့သော် ထိုအရာအားလုံးထက် အကျွန်ုပ်လုပ်ဆောင်လိုသောရည်မှန်ုးချက်တစ်ခုမှာ နောက်၌ကျန်ရစ်ခဲ့သောအရာများကို မေ့ထားပြီး အရှေ့၌ရှိသောအရာများကိုသာအာရုံစိုက်ထားလိုခြင်းဖြစ်ပြီး 14ဆုလာဒ်ရရှိရန်ပန်းတိုင်သို့အရောက်ပြေးနေပါသည်။ ထိုဆုလာဒ်သည် ယေရှုခရစ်တော်အားဖြင့် ရွှေမြို့တော် သို့ ဘုရားရှင်ခေါ်ယူတော်မူမည့်ဆုလာဒ်ပင်ဖြစ်သည်။ 15ထို့ကြောင့် ဝိညာဉ်ရေးရာ၌ရင့်သန်ကြသော အကျွန်ုပ်တို့အားလုံးသည် တူညီသောစိတ်သဘောထားမျိုးရှိသင့် ပေသည်။ အချို့သောအကြောင်းအရာများတွင် သင်တို့သည်မတူညီသောစိတ်သဘောထားမျိုးရှိခဲ့လျှင် ဘုရားရှင် သည် သင်တို့အားရှင်းလင်းစွာဖော်ပြတော်မူလိမ့်မည်ဖြစ်သည်။ 16မည်သို့ပင်ဆိုစေကာမူ အကျွန်ုပ်တို့သည် အကျွန်ုပ်တို့ကိုဘုရားရှင်ဆောင်ရွက်စေလိုသောအရာများကိုသိရှိပြီး သောအရာများကို လုံးဝလိုက်နာကြရမည်ဖြစ်သည်။ 17အကျွန်ုပ်၏ညီအစ်ကိုမောင်နှမတို့၊ အကျွန်ုပ်အားအတုယူကြလော့။ အကျွန်ုပ်တို့ပေးထားသော စံနမူနာအတိုင်း လိုက်နာလျှောက်လှမ်းသောသူများကို ဂရုတစိုက်ကြည့်ရှုကြလော့။ 18အဘယ်ကြောင့်ဆိုသော် များစွာသောအကြောင်းအရာတို့ကို သင်တို့အားအကျွန်ုပ်ဟောပြောခဲ့ပြီးဖြစ်သည်။ ယခုလည်း အကျွန်ုပ်သည် ဝမ်းနည်းမှုမျက်ရည်များဖြင့် သင်တို့ကိုထပ်မံ၍ပြောလိုသည်မှာ လူများစွာတို့သည် ယေရှုခရစ်တော်၏ လက်ဝါးကပ်တိုင်ကိုဆန့်ကျင်၍ လျှောက်လှမ်းနေကြသည်။ 19ထိုသူတို့၏နိဂုံးသည် ပျက်ဆီးခြင်းပင်ဖြစ်သည်။ သူတို့သည် သူတို့ကိုယ်ခန္ဓာအားဖြည့်ဆည်းပေးရန် အတွက်သာ ရှင်သန်နေကြသည်။ သူတို့သည်ရှက်ဖွယ်ကောင်းသောအမှုကိစ္စများကိုလုပ်ဆောင်လျက် ဂုဏ်ယူဝင့်ကြွားနေကြသည်။ သူတို့၏စိတ်သည် လောကီရေးရာများကိုသာစွဲလမ်းကြသည်။ 20သို့သော် ကျွန်ုပ်တို့သည် ရွှေမြို့တော်၏နိုင်ငံသူနိုင်ငံသားများသာဖြစ်သည်။ သားသမီးများသာဖြစ်သည်။ အကျွန်ုပ်တို့သည်ကယ်တင်ရှင်ဖြစ်သော အရှင်ယေရှုခရစ်တော်ကိုကိုစောင့်မျှော်နေကြသူများသာဖြစ်ကြသည်။ 21အကျွန်ုပ်တို့၏အရှင်ယေရှုခရစ်တော်သည် အရာအားလုံးအပေါ်လွှမ်းမိုးနိုင်သောတန်ခိုးအာဏာဖြင့် အကျွန်ုပ်တို့၏နိမ့်ကျသောကိုယ်ခန္ဓာကို မိမိ၏ဘုန်းအသရေနှင့်ပြည့်စုံသောကိုယ်ခန္ဓာအဖြစ် ပြောင်းလဲတော်မူမည်ဖြစ်သည်။
Поточний вибір:
Philippians 3: TPV-RV
Позначайте
Поділитись
Порівняти
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.