မဿဲ 1
1
အခန်း (၁)
ကိုယ်တော်ယေရှု၏ဆွေစဉ်မျိုးဆက်စာရင်း
1ဤအကြောင်းအရာသည် အာဗြဟံနှင့်ဘုရင်ဒါဝိဒ်၏မျိုးရိုးမှ ဆင်းသက်လာသော ကိုယ်တော်ယေရှု၏ဆွေစဉ်မျိုးဆက်စာရင်းဖြစ်၏။
2အာဗြဟံသည် သားဣဇက်ကိုရ၏။
ဣဇက် သည် သားယာကုပ်ကိုရ၏။
ယာကုပ် သည် သားယုဒနှင့်သူ၏ညီအစ်ကိုများကိုရ၏။
3ယုဒသည် တာမာအားဖြင့် သားဖာရက်နှင့်ဇာရကိုရ၏။
ဖာရက် သည် သားဟေဇရုံကိုရ၏။
ဟေဇရုံ သည် သားအာရံကိုရ၏။
4အာရံသည် သားအမိနဒပ်ကိုရ၏။
အမိနဒပ် သည် သားနာရှုန်ကိုရ၏။
နာရှုန် သည် သားစာလမုန်ကိုရ၏။
5စာလမုန်သည် ရာခပ်အားဖြင့် သားဗောဇကိုရ၏။
ဗောဇသည် ရုသအားဖြင့် သားဩဗက်ကိုရ၏။
ဩဗက်သည် သားယေရှဲကိုရ၏။
6ယေရှဲသည် သားဒါဝိဒ်ဘုရင်ကိုရ၏။
ဒါဝိဒ် သည် ဥရိယ၏မယားအားဖြင့် သားရှောလမုန်ကိုရ၏။
7ရှောလမုန်သည် သားရောဗောင်ကိုရ၏။
ရောဗောင် သည် သားအဘိယကိုရ၏။
အဘိယ သည် သားအာသကိုရ၏။
8အာသသည် သားယောရှဖတ်ကိုရ၏။
ယောရှဖတ် သည် သားယောရံကိုရ၏။
ယောရံ သည် သားဩဇိကိုရ၏။
9ဩဇိသည် သားယောသံကိုရ၏။
ယောသံ သည် သားအာခတ်ကိုရ၏။
အာခတ် သည် သားဟေဇကိကိုရ၏။
10ဟေဇကိသည် သားမနာရှေကိုရ၏။
မနာရှေသည် သားအာမုန်ကိုရ၏။
အာမုန် သည် သားယောရှိကိုရ၏။
11ဘေဘီလုံသို့ရွှေ့ပြောင်းခြင်းခံရချိန်တွင် ယောရှိသည် သားယေခေါနိနှင့် သူ၏ညီအစ်ကိုများကိုရ၏။
12ဘေဘီလုံသို့ ရွှေ့ပြောင်းခြင်းခံရပြီးနောက်
ယေခေါနိ သည် သားရှာလသေလကိုရ၏။
ရှာလသေလ သည် သားဇေရုဗဗေလကိုရ၏။
13ဇေရုဗဗေလသည် သားအဗျုဒ်ကိုရ၏။
အဗျုဒ် သည် သားဧလျာကိမ်ကိုရ၏။
ဧလျာကိမ်သည် သားအာဇော်ကိုရ၏။
14အာဇော်သည် သားဇာဒုတ်ကိုရ၏။
ဇာဒုတ်သည် သားအာခိမ်ကိုရ၏။
အာခိမ် သည် သားဧလုဒ်ကိုရ၏။
15ဧလုဒ်သည် သားဧလာဇာကိုရ၏။
ဧလာဇာ သည် သားမဿန်ကိုရ၏။
မဿန် သည် သားယာကုပ်ကိုရ၏။
16ယာကုပ်သည် မာရိ၏ခင်ပွန်းဖြစ်သူ သားယောသပ်ကိုရ၍ မာရိသည် ခရစ်တော်ဟုခေါ်သောယေရှုကို ဖွားမြင်တော်မူ၏။
17သို့ဖြစ်၍ အာဗြဟံမှစ၍ ဒါဝိဒ်အထိ မျိုးဆက်တစ်ဆယ့်လေးဆက်၊ ဒါဝိဒ်မှ ဘေဘီလုံသို့ရောက်သူများထိတိုင် မျိုးဆက်တစ်ဆယ့်လေးဆက်ဖြစ်ပြီး ဘေလီလုံသို့ရောက်ပြီးနောက် ယေရှုခရစ်တော်ကို မွေးဖွားသည့်တိုင် မျိုးဆက်တစ်ဆယ့်လေးဆက်ဖြစ်၏။
ကိုယ်တော်ယေရှုဖွားမြင်တော်မူခြင်း
18ယေရှုခရစ်တော်ဖွားမြင်တော်မူသည့်ဖြစ်စဉ်မှာ ဤသို့ဖြစ်၏။ ကိုယ်တော်ယေရှု၏မိခင်မာရိသည် ယောသပ်နှင့်လက်ထပ်ပေါင်းသင်းရန် စေ့စပ်ထားခဲ့သူဖြစ်၏။ သို့သော် ထိုသို့ပေါင်းသင်းနေထိုင်ခြင်းမပြုမီ မာရိသည် အပျိုစင်ဘဝ၌ရှိစဉ် ဉာဏ်အလင်းတော်၏တန်ခိုးအားဖြင့် ပဋိသန္ဓေစွဲနေသည်ကို သိရလေ၏။ 19ယောသပ်သည် စိတ်ထားမှန်သောသူဖြစ်သည်နှင့်အညီ မာရိကို လူအများရှေ့တွင် အရှက်မကွဲစေလိုသဖြင့် မာရိနှင့်မင်္ဂလာပွဲကို တိတ်တဆိတ်ဖျက်သိမ်းရန် ကြံရွယ်လေ၏။
20ဤသို့ကြံရွယ်နေစဉ် ဘုရားရှင်၏နတ်ဒေဝါတစ်ပါးသည် ယောသပ်၏အိပ်မက်၌ပေါ်လာပြီး “ဒါဝိဒ်၏မျိုးဆက်ဖြစ်သော ယောသပ်၊ မာရိအား သင်၏ဇနီးအဖြစ် လက်ထပ်ယူရမည်ကို မစိုးရိမ်နှင့်။ အကြောင်းမူကား မာရိ၏ပဋိသန္ဓေသည် ဉာဏ်အလင်းတော်၏တန်ခိုးအားဖြင့် ရခြင်းဖြစ်၏။ 21သူမသည် သားယောကျ်ားကို ဖွားမြင်လိမ့်မည်။ ထိုသားသည် မိမိ၏လူမျိုးတို့ကို အကုသိုလ်အပြစ်ဒုစရိုက်များမှ ကယ်တင်မည့်သူဖြစ်သောကြောင့် သူ၏အမည်ကို ယေရှုဟူ၍ မှည့်ခေါ်ရမည်” ဟုဆိုလေ၏။
22ဤအကြောင်းအရာအားလုံးတို့သည် ရှေးယခင်က အရိယာသူတော်စင်မှတစ်ဆင့် ဘုရားရှင်မိန့်မှာတော်မူသည့်အတိုင်း အမှန်တစ်ကယ်ဖြစ်လာခြင်းဖြစ်၏။ မိန့်မှာချက်မူကား 23“အပျိုစင်သည် ပဋိသန္ဓေစွဲယူ၍ သားယောကျ်ားကို ဖွားမြင်လိမ့်မည်။ ထိုသား၏အမည်ကို ‘ကျွန်ုပ်တို့နှင့်အတူရှိတော်မူသော ဘုရားရှင်’ ဟုအဓိပ္ပါယ်ရသည့် ဧမာနွေလဟုခေါ်ဆိုကြလိမ့်မည်” ဟူ၍ဖြစ်၏။
24ယောသပ်သည် အိပ်ပျော်ရာမှနိုးလာသောအခါ နတ်ဒေဝါမိန့်မှာခဲ့သည့်အတိုင်း မာရိကို ဇနီးအဖြစ် လက်ထပ်ထိမ်းမြားလေ၏။ 25သို့သော် သူတို့သည် သားယောကျ်ားမမွေးဖွားမီတိုင်အောင် အတူတူပေါင်းသင်းခြင်းမပြုခဲ့ကြပေ။ ထို့နောက် ယောသပ်သည် ထိုသား၏အမည်ကိုလည်း ယေရှုဟု မှည့်ခေါ်လေ၏။
Поточний вибір:
မဿဲ 1: TPV-RV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
