Aba Vatowo 18
18
Yauwe iikatótula Eberamo natuna manuna tetelina
1E tuwo Eberamo nava asa Mamre alovaina gagaidi goi ikaaiyaka. Go tuta tayamo dine goi ituwodo ina yoyou parai totomna goi itusobu ikaaiyaka. Ikaaiyaka, e Yauwe isowóduwo tauyana yaina. 2E Eberamoyana ikandobala koroto adi taito igitedi sitatáoya.#Iberiu 13:2. Igitedi, ina yoyou parai totomna goi isowóduwo, woilina ibala ina ikauyagu yaidi goi, e ivatugúyala, ikanakabobo. 3Tuwo idigo kana,
‘Guna tomoya, neta kuusosale, geya kunoita, go sem yau im pákwana taiyao takaiyāka. 4Kutagōna bego guna pákwana ina bwae itege ime aemi adi níkina manuna. Ikavava, ameko alova unana goi kowaiwasi 5go, avami giyaina akabi, avinimi kokáika bei togaga kobabane imi koidádana manuna. Komi bogina kowowoinegu unana koma yau imi pákwana guna vada, tauna latuwogu bego avaitemi.’
E kidi sitagona kadi,
‘Uyama. Moe dedevina; nakae kuguinūwe.’
6Tuwo Eberamo woilina ina ina yoyou parai goi isiu, Sera ilatuwoko idigo kana,
‘Sera, woilīm kūna im parawa dedevina kukābi kūme beredi kugābu.’
7Ilatuwoko ikavava, Eberamo ilokoina ina tayamo bulumakau bonatuna dedevina ikabi, ikaumate. Ikaumate ikavava, ina pákwana ivini. Tauyana ikabi ina ivaipolu. 8Ivaipolu ikavava, Eberamo itáoya, bonatunayana ikabi, koroto adi taito ivinidi. Nakae bulumakau nununa itege ivinidi sinim be nakae nununayana maniyena ikule ivinidi. Tauyadi sikakáika go, Eberamoyana kikidi alova unana goi itatáoya.
9E kidi korotoyadi sidigo kadi,
‘Go monem Sera nakoina?’
‘Amoni yoyou sinaena’, Eberamo kaena.
10Tuwo sinaedi goi tayamo idigo kana,
‘Tukówana ainima aivasi nakae sikavava, moitamo bei akaluvila go, kunōve. Monem Serayana bogina bei ivenátuna, natuna koroto.’#Roma 9:9.
E kina go Serayana yoyou ana niboda mlina goi ikaaiyaka itaaiyakeka. 11Ego kina Eberamo bogina ikaitomoya; kina Sera nakae bogina ikainamoya. Tauna geya itoboineyeta ivenátuna unana bogina itobuvavina. 12E tuwo Yauwe ina livala inove, tauna ivanama; ina nuwonúwana kana,
‘Ii, yau bogina akainamoya go! Monegu nakae ikaitomoya go, manakae? Masisi ana uyáwana#18:12 Masisi ana uyáwana: Isileli tubunao niyadi goi ame geya imavadeta. Enao aiyuwo sikaaiyaka. Tayamo mae nakae go, tayamo itoboineda kada, ‘Venátuna ana uyáwana.’ bei alotowomnei?’#1 Pita 3:6.
13Go kina Yauwe idigo kana,
‘Kaga unana Sera ivanama? Kaga unana idigo kana,
“Yau bogina akainamoya, bei moitamo avenátuna”?
14Geya kada kaga tayaamo imou Yau Yauwe yaigu.#Luke 1:37. Moitamo guna upa bogina ayato bei akaluvila moe tukówana ainima aivasi sikavava nakae go, Sera bogina bei ivenátuna, natuna koroto.’
15E Serayana imatoita, tauna ilawoiwoi kana,
‘Yau geya avanameta.’
Go kina Yauweyana idigo kana,
‘Geya. Moitamo, kuvanama; bogina anovem.’
Eberamo ina kawanoi Sodoma manuna
16E korotoyadi sitáoya ivatabaledi go, sikandosobu Sodoma sigite. Eberamo nakae taiyao ivatabaledi ivaduduwedi. 17Sigitegite go, Yauwe inuwonúwana kana,
‘Manakae? Eberamo alatuwoko manakaegu bei aguinuwe Sodoma yaina gea geya? 18Tauyana ina boda nava bei boda gagaina be nakae toogagaina. Boda liliudi poyapoya goi bei siyagoi tauyana goi akaipakuyedi.#Aba Vatowo 12:3, 22:18, 26:4, 28:14; Galetiya 3:8. 19Guna nuwonúwana geya avamouyeta. Tauyana bogina akatuveko bei natunao nakae tubunao ilovinaedi kana,
“Kina Yauwe ina kenao goi taaketōiya ame nakae: Nuwona takiboobosīdi be nakae takínona vavasa taguuinūwe. Neta nakae taguuinuwe, e Kina Yauwe ina katótula bei isowóduwo komi be yau yaida.”’
20E tuwo Eberamo ilatuwoko idigo kana,
‘Eberamo, da Sodoma be da Gamora valedi bogina anove, idi bágala ivakaigaga toina. 21Tauna ame tutayana bei asou ana agite neta livalayana moitamo gea geya. Neta livalayana geya moitamo, bei ayagoi.’
22E koroto adi taiyuwo sisou sina Sodoma go, kina Eberamoyana nava Yauwe matana goi itatáoya. 23E ivalabelabena Yauwe yaina idigo kana,
‘Tomoya, manakae? Tokibóbwata toogoyoidi taiyao bei moitamo kumtulidi? 24Neta tokibobwatayadi adi badabada 50 asa goi sikaaiyaka, bei da Sodoma madabokidi kumtulidi gea tokibobwatayadi pasidi toogoyoidi kunuwotaoidi? 25Go moe geya nakae im sinapu geya. Iyaa! Neta toogoyoidi tokibóbwata taiyao kumtulidi, moe ana kaigigita tauyadi matam goi sivavasa. Ago kom kai da poyapoya ama totakínona; itoboinem kutakinona vavasa ae?’
26E Yauweyana idigo kana,
‘Neta tokibóbwata adi badabada 50 Sodoma goi ababanedi, e kidi pasidi madabokidi bei anuwotaoidi.’
27E Eberamo idigo kana,
‘Tomoya, yau kaga? Tomota tayamo poyapoya kaukauna tauna. Go tuwo bokoyo magu katepatu avadigoim go, guna digopopóita kunuwotao. 28Neta tokibóbwata adi badabada 45 taudi Sodoma goi sikaaiyaka, manakae? Bei toni kasa liliudi kumtulidi?’
‘Neta tokibóbwata adi badabada 45 ababanedi, e toni kasayadi madabokidi geya amtulidita’, Yauwe kaena.
29E Eberamo ibobwaramna idigo kana,
‘Go neta tokibóbwata adi badabada 40taudi amoko goi kubabanedi?’
‘Tokibóbwata adi badabada 40 pasidi toni kasayadi geya amtulidita’, Yauwe kaena.
30Eberamo idigo kana,
‘Tomoya, geya kuegamogamoguta, go sem kutagōna abóbwara. Neta tokibóbwata adi badabada 30 kubabanedi, bei manakaem?’
‘Neta tokibóbwata adi badabada 30 ababanedi, toni kasayadi madabokidi bei geya amtulidita’, Yauwe kaena.
31Eberamo idigo kana,
‘Tomoya, magu katepatu avadigoim go, guna digopopóita kunuwotao. Neta tokibóbwata adi badabada 20 kubabanedi, bei manakaem?’
‘Tokibóbwata adi badabada 20 pasidi toni kasayadi madabokidi bei geya amtulidita’, Yauwe kaena.
32Tuwo Eberamo idigo kana,
‘Tomoya, geya kuegamogamoguta go, sivatayamo tuwaina bei abóbwara. Neta tokibóbwata adi badabada yawou kubabanedi, bei manakaem?’
‘Tokibóbwata adi badabada yawou pasidi toni kasayadi madabokidi bei geya amtulidita’, Yauwe kaena.
33E Yauwe ibóbwara ikavava, ina go, Eberamo ikaluvila ina ina kasa.
Поточний вибір:
Aba Vatowo 18: GVS
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2019, Wycliffe Bible Translators, Inc. All rights reserved.