PRU MAT WA AI 35
35
Bansa Nhtoi Hta Hkan Sa Na Tara Ni
1Mawshe gaw Israela amyu masha shawa hpung ting hpe shaga jahpawng tawn nna shanhte hpe, “Da ndai gaw nanhte hkan galaw lu na dai Madu hkang da ai ga rai nga ai: 2Nanhte gaw nanhte a magam bungli galaw la na nhtoi kru ya tup lu nga myit dai; rai ti mung dai sanit ya nhtoi chyawm gaw Ngai Madu hpe nawku daw jau na matu dagam shaka da ai bansa nhtoi rai nna, nye a matu ap nawng da sai hte chyoi pra nga lu na rai nga ai. Dai nhtoi hta amu bungli galaw ai wa kadai mung si ai hkrum na rai nga ai. #Pru 20:8-11; 23:12; 31:15; 34:21; Jaw 23:3; Trj 5:12-14. 3Dai Bansa Nhtoi shani e, nanhte a dum nta ni hta wan pyi wut lu na myit dai n rai,” ngu nna tsun wu ai.
Chyoi Pra Ai Sum A Matu Nawng Ya Ai Kumhpa Ni
(Pru 25:1-9)
4Mawshe gaw Israela amyu masha ni yawng hpe, “Da ndai gaw dai Madu hkang da ai ga rai nga ai: 5Dai Madu hpe hkungga nawng jau mu; kam jaw ai myit hte jaw ya mayu ai masha shagu gaw aja, gumhpraw, magri mang; 6mani ai lachyit sumpan, sawm tsit ai, shaba pu nsam rawng ai hte hkyeng ai sagu ri, bainam mun hte da ai sumpan; 7jaw jahkyeng da ai sagu la hpyi, mani tsawm ai shanhpyi, shaji hpun; 8wan shatu na sau, chya ya na namman sau a matu namji namya, manam pyaw ai baw a matu namji namya; 9unuk lung seng hte Hkinjawng Kaba wa a hpa hkai lawng hte shi a sinda magap hta hkrep na ja lung seng re ai ni la sa na rai myit dai.
Dai Madu A Hpung Shingkang Shanu Nga ai Sum A Matu Arung Arai Ni
(Pru 39:32-43)
10“Nanhte hta na kung kyang ai lata sama ni yawng, ra mara amu sa galaw na matu, dai Madu hkang da sai hte maren, 11Sum hte de a magap, shinggan magap, de a chyinghkyi ni hte de a hpunpyen ni, de a htinggrang ni, de a shadaw ni hte machyaw ni; 12Ga Shaka Sumpu hte de a kandang ni, de a magap hte grang na nba grang; 13ku hte de a kandang ni, dai hte seng ai arai ni yawng, Karai Kasang a matu nawng jau ya ai muk; 14wan shatu na pyengdin shadun hte dai hte seng ai arai ni; pyengdin ni hte wan shatu na sau; 15manam pyaw ai baw nat nawng na tawn hkungri hte de a kandang ni, chya na namman sau, manam pyaw ai baw, Sum a shang wa chyinghka grang; 16wan nat hkungga nawng na tawn hkungri hte de a magri mang magrang, de a kandang ni hte dai hte seng ai arai ni, ntsin htung hte dai hte seng ai ku ni, 17wang grang hte de a shadaw ni, machyaw ni, wang chyinghka grang na chyinghka grang; 18Sum hte wang a matu mailak hte sumri ni; 19Hkinjawng ni Chyoi Pra ai Shara hta shanhte daw jau yang hpun ai dai reng ai hpun palawng ni, hkinjawng Arun hte shi a shadang sha ni bu hpun na chyoi pra ai hpun palawng ni hpe galaw na rai myit dai,” ngu nna tsun wu ai.
Amyu Masha Ni Shanhte A Kumhpa La Sa Ma Ai
20Israela amyu masha ni yawng pru sa nhtawm, 21dai Madu a hpung shingkang shanu nga ai Sum galaw na matu sharawng awng ai ni kadai mung dai Madu hpang de kumhpa la sa na rai ma ai. Shanhte gaw nawku daw jau na amu hta lang ra ai arai shagu hpe mung, hkinjawng bu hpun palawng ni hpe mung galaw na matu la sa shajang ma ai. 22Kam jaw ai shawang myit rawng ai numsha hte lasha ni yawng hte gaw sumli da ai hkindang, na lakan, lachyawp, kachyi hte aja arai baw hkum sumhpa yawng dai Madu a matu ap ya ma ai. 23Mani tsawm ai lachyit sumpan, sawm tsit ai, shaba pu nsam rawng ai, hkyeng ai sagu ri, bainam mun hte da ai sumpan, jaw jahkyeng da ai sagu la hpyi, mani tsawm ai shanhpyi lu ai ni kadai mung la sa shajang ma ai. 24Gumhpraw hte magri mang lu jaw ai ni kadai mung dai Madu a matu la sa ma ai; kaning re ai amu hta mung akyu jashawn mai ai shaji hpun lu ai ni mung la sa nga ma ai. 25Lata maka hpaji kung kyang ai numsha ni yawng mung mani tsawm ai lachyit sumri, sawm tsit ai, shaba pu nsam rawng ai, hte hkyeng ai sagu ri ni hte shanhte nan ri ri la nna la sa ma ai. 26Shanhte gaw bainam mun hte ri ri ma ai. 27Ningbaw ni gaw unuk lung seng hte hpa hkai lawng hte sinda magap hta hkrep na lung seng; 28wan pyengdin a matu manam pyaw ai namji namya, chya na namman sau a matu namji namya, manam pyaw ai baw a matu namji namya la sa shajang ma ai. 29Dai Madu Mawshe hpe hkang dat ai amu lam shagu a matu Israela amyu masha ni yawng hta kam jaw ai shawang myit rawng ai ni gaw shanhte a hkungga kumhpa ni la sa shajang nga ma ai.
Dai Madu A Hpung Shingkang Shanu Nga Ai Sum Hpe Galaw Ai Lata Sama Ni
(Pru 31:1-11)
30Mawshe gaw Israela amyu masha ni hpe, “Dai Madu gaw Yuda lakung hta na Uri a kasha, Hura a kashu Bezalela hpe lata san da nu ai. 31Karai Kasang mung shi a ntsa hta shi a wenyi jahpring ya nhtawm aja, gumhpraw, magri mang dup ai amu hte nlung tawk ka nna ja lung seng hkrep ai amu, 32hpun tawk ai amu hte hpaji hparat, zai byeng-ya, chye chyang ai lam hte seng ai hpaji, amu baw hkum sumhpa chye nna, 33reng hkik ai amu galaw chye na atsam marai jaw ya wu ai. 34Dai Madu gaw shi hte Dan a lakung hta na Ahisamak a kasha Aholiaba hpe nyan marai jaw nna, kaga gale ni hpe sharin ya lu ai hpaji maka hpe mung bang ya wu ai. 35Shi gaw dai yan hpe tawk nna galaw ai baw amu hkum sumhpa, reng ai lata sama hpaji, sawm tsit ai, shaba pu nsam rawng ai hte hkyeng nna mani tsawm ai lachyit ri hte maka chye ka ai amu, da da ai amu, hpaji lam amyu myu hte galaw chye ai hpaji lam, amyu shagu hpe chye galaw shangun ai hpaji byeng-ya jaw ya wu ai. Shan gaw bungli amyu shagu chye galaw ma ai hte kungkyang ai lata sama yan rai ma ai.
Поточний вибір:
PRU MAT WA AI 35: JCLB
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Jinghpaw Common Language Bible © Bible Society of Myanmar, 2009.