PRU MAT WA AI 27
27
Tawn Hkungri
(Pru 38:1-7)
1“Tawn hkungri langai hpe shaji hpun san san hte galaw lu na rai nga ai; dai gaw man shada bung nna, galu de pe 7 chyen, nda de pe 7 chyen hte tsaw de pe 4 chyen rai na rai nga ai. 2Jut mali hte a ntsa e nrung ni shatut na rai nga ai. Dai nrung ni gaw tawn hkungri hte hkrang langai sha galaw na rai nga ai; dai hte ting hpe magri mang hte kayawp na rai nga ai. 3Dap hte kau na matu ban ni, shingban ni, jarung ni, chyinghkyi ni hte wan ban pa ni hpe galaw na rai nga ai; dai arung arai ni yawng hpe magri mang hte hkrai galaw lu na rai nga ai. 4Magri mang magrang langai galaw nna de a ntsa jut ni hta magri mang shanghkawng mali galaw na rai nga ai. 5Magri mang magrang hpe tawn hkungri a nten matu npu hta tawn da na rai nga ai, shaloi dai gaw tawn hkungri a ka-ang hkup du hkra grang da na rai nga ai. 6Shaji hpun hte galaw ai kandang ni hpe magri mang hte kayawp na rai nga ai; 7tawn hkungri hpai ai shaloi de a lahkawng maga hta kap ai shanghkawng ni hta kandang dinghkrawn bang na rai nga ai. 8Ngai nang hpe bum ntsa e madun dan sai kasi hte maren, tawn hkungri hpe hpunpyen pa ni hte galaw nhtawm kata e hpungkraw di na rai ndai.
Karai Kasang a Hpung Shingkang Shanu Nga Ai Sum Wang A Lam
(Pru 38:9-20)
9“Nye a hpung shingkang shanu nga ai Sum hpe kum ai wang a matu mani ai lachyit wang grang ni hpe galaw na rai ndai. Dingda maga de na wang grang gaw galu de pe 150 rai nna de a matu magri mang machyaw hkun 10hpe magri mang shadaw hkun hte jung shangang da nna chyinghkyi ni hte htinggrang kaji ni hpe gumhpraw hte galaw da na rai nga ai. 11Dai hte maren, dingdung maga na wang grang galaw na rai nga ai. 12Sinna maga de mung pe 75 galu ai wang grang hte shadaw shi, machyaw shi rai na rai nga ai. 13Sinpraw maga na shang wa chyinghka nga ai de mung pe 75 gang na rai nga ai. 14-15Dai shang wa chyinghka lam a lahkawng maga de pe 22 chyen galu ai wang grang hte de a shadaw masum, machyaw masum ni hpe maren galaw na rai nga ai. 16Shang wa chyinghka lam a matu nba grang gaw pe 30 galu nna sawm tsit ai, shaba pu nsam rawng ai ri hte hkyeng ai ri ni hte mani tsawm ai lachyit sumpan da nhtawm dai hpe maka ka shatsawm da na rai nga ai. Dai hpe shadaw mali, machyaw mali hte gang shadaw da na rai nga ai. 17Wang grup grup jung da ai shadaw ni yawng gaw gumhpraw ngaugran gran da nna, de a chyinghkyi ni hpe gumhpraw, de a machyaw ni hpe magri mang hte galaw na rai nga ai. 18Dai wang gaw galu de pe 150, nda de pe 75, tsaw de pe 7 chyen rai na rai nga ai. Nba grang ni hpe mung mani tsawm ai lachyit hte machyaw ni hpe magri mang hte galaw na rai nga ai. 19Sum hta lang ai arung arai yawng hte Sum hte wang hta lang ai mailak ni yawng hpe magri mang hte galaw na rai nga ai.
Pyengdin Hpajang Ai Lam
(Jaw 24:1-4)
20“Pyengdin a matu kaja htum ai tsanlun sau nang kaw la sa na matu Israela amyu masha ni hpe hkang da u, shaloi dai gaw shana de shagu shatu lu na rai nga ai. 21Nye a hpung shingkang shanu nga ai Sum kata, Ga Shaka Sumpu a man e grang ai nba grang a shinggan maga e, Arun hte shi a shadang sha ni, dai pyengdin amu hpajang lu na rai ma ai. Dai hpe nye a hpung shingkang shanu nga ai shara hta shana de nna jahpawt du hkra shatu na rai nga ai. Ndai gaw Israela masha ni hte shanhte a matu mara ni htani htana hkan sa na hkang da lam rai nga ai.
Поточний вибір:
PRU MAT WA AI 27: JCLB
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Jinghpaw Common Language Bible © Bible Society of Myanmar, 2009.