KASA 20
20
Makedoni Hte Ahkaia Mung De Sa Wa Ai Lam
1Ya dai kabring kabrawng lam sim mat ai hpang Pawlu gaw kam sham ai sape ni hpe shaga la nna, shanhte hpe n-gun jaw ai ga ni tsun ngut jang shakram da nhtawm Makedoni mung de sa wa na pru wa ai. 2Dai ginwang hkan ga sa wa nna, mungga law law hte shadum jahprang n-gun jaw da ngut jang Ahkaia mung de du ai. 3Dai kaw shi shata masum nga nga ai. Dai hpang Suri mung de li hte bai wa na hkyen shajin nga yang, Yuda masha ni shi hpe gyam nga ma ai hpe mu chye kau wu ai majaw Makedoni mung hku ga lai nna nhtang wa na myit daw dan wu ai. 4Shaloi shi kaw hkan nang ai ni gaw, Beri mare na Puru a kasha Sopata; Htesaloni mare na Aristarku, Sekuntu, Derbe mare na Geu, Asi mung na Tuhkiku yan Trohpimu hte Timohti hte rai ma ai. 5Shanhte chyawm gaw shawng sa wa nna Troa mare hta e anhte hpe sa la nga ma ai. 6Anhte mung Azuma poi ngu ai matsi n rawng ai Muk sha ai poi lai ai hpang Hpilipi mare kaw nna li jawn nhtawm rawt sa wa ai, manga ya na ai hpang, Troa mare hta hkan dep nna dai kaw nhtoi sanit ya hkring nga ga ai.
Troa Mare De Pawlu Hpang Jahtum Sa Du Ai Lam
7Anhte gaw Laban kru#20:7: Laban kru: KJV, NEB, JB Hanson Chyum Laika ni hta bat a langai ya ngu na shani-ngu ka da ma ai, ndai zuphpawng gaw shana de she galaw ga ma ai. Yuda ni a nhtoi hti ai hku nga yang-bat a langai ya gaw kru ya shana kaw nna hpang nna Laban shana de jan shang ten hta htum ai. Nkau mi gaw Dk 11 hte madi shadaw ma ai. Luk gaw Yuda lai hku n rai Grik lai hku hkan ai-Lani mi ngu ai gaw jahpawt jan pru ai kaw nna sha hti la ma ai. Dai hku rai yang laban kru ya shana de mahtang grau jaw ang ai. ya shana de kanawn mazum shat sha poi hta shang na matu zuphpawng nga ga ai. Pawlu gaw hpang jahpawt dai mare kaw na pru mat wa na maw ai majaw, shana yup tung tung hkra masha ni hpe sharin shaga nga ai. 8Dai anhte hpawng nga ai ntsa gawk hta e pyengdin law law tu nga ai. 9Utuhku ngu ai la shabrang ma langai mi gaw hku wawt hku mahka e yup nga dung nga ai. Pawlu grau grau matut manoi ga tsun galu nga yang yup malap mat wa ai hte nta htap masum kaw na di hkrat mat wa ai. Masha ni shi hpe sa hta pawn yu yang, shi si mat sai. 10Shaloi Pawlu yu wa nhtawm, dai wa a ntsa e shi hkum mara ahpum let, “Hkum tsang myit shi asak naw hkrung nga ai,” ngu mu ai. 11Bai ntsa gawk de shi lung wa nna muk ahkyep alep di nhtawm sha nga ai. Shanhte hte nhtoi htoi ai du hkra galu galang tsun shaga chyai ngut jang shi pru wa ai. 12Shanhte ni mung asak hkrung nga sai dai shabrang ma hpe shi a nta de woi wa ya mu ai rai nna shalan shabran ai lam grai lu la ma ai.
Troa Mare Kaw Nna Miletu Mare De Du Ai
13Anhte mahtang li de shawng sa nna Asu mare de rawt sa wa ga ai. Dai mare hta she Pawlu hpe hkap shajawn la na myit nna sa wa ga ai. Pawlu gaw dai mare de hkarang lam hku sa wa na myit nna anhte hpe dai hku galaw na hkang da mi ai. 14Shing rai Asu mare e anhte hte hkrum jang shi hpe shajawn la nhtawm, Mitulene mare de jawn sa wa ga ai. 15Dai kaw nna bai rawt ai gaw, hpang shani e Kiu zunlawng makau de du ga ai. Dai hpang lani mi na jang Samu zunlawng de du nna dai kaw nna hpang lani mi na jang Miletu mare de du ga ai. 16Pawlu gaw Asi mung e nhtoi hkatum n shama mayu wu ai majaw Ehpesu mare hpe lai kau da nna li hte sa mat wa na myit daw dan da wu ai; hpa majaw nga yang Pawlu gaw byin mai yang Pentekoti shani dep lu hkra Yerusalem mare de du wa na matu tin da wu ai.
Ehpesu Mare Na Hpung Myit Su Ni Hpe Pawlu Tsun Ai Shakram Ga
17Ya Pawlu gaw Miletu mare nna Ehpesu mare na hpung salang ni hpe shi hte sa hkrum na matu masha shangun nna shaga dat mu ai. 18Dai ni du jang Pawlu gaw, “Asi mung de ngai nnan du ai shani kaw nna nanhte hte rau nga nga ai aten nlang hte hta ngai kaning rai nga nga nngai gaw nanhte chye chyalu rai nga myit dai. 19Yuda masha ni a n hkru n kaja ai maw mawn ai lam a majaw, matsan jam jau ru yak tsin yam hkrum ai ten hta ngai myi prwi law law hkrat let nachying myit shagrit shanem ai hte Madu a shangun ma rai nga nngai hte maren shi a magam gun hpai nngai. 20Shawa masha yawng a man e mung, nanhte a nta ni hta mung, ngai hkaw tsun sharin shaga ai shaloi nanhte a matu akyu rawng na lam magup hpe ngai galoi mung n ginhtim n ip da ga nngai hpe mung nanhte chye nga myit dai. 21Yuda masha ni hpe mung, maigan masha ni hpe mung, shanhte a yubak mara ni kaw na Karai Kasang hpang de myit malai kayin wa nna, anhte a Madu Yesu hpe kam sham na matu mung, ngai aja awa sadi jaw shadum shahprang ni ai. 22Ya ngai gaw Chyoi Pra ai Wenyi a hkang ai hpe madat mara let Yerusalem mare de sa wa lu na rai nga ai. Dai mare e ngai hta hpa byin wa na ngu ai hpe gaw n chye nngai. 23Chyoi Pra ai Wenyi gaw ngai hpe gyit hkang sharen da ai hte zingri zingrat ai lam ngai hpe ala nga ai, nga nna mare shagu hta tau hkrau sadi jaw ai hpe chyu sha ngai chye nngai. 24Rai ti mung nye a matu masat da ai amu lit hpe mung Madu Yesu ngai e ap ya da ai magam amu hpe mung, tsep kawp ngut kre hkra gun na lam chyu sha ahkyak madung rai nga ai majaw ngai gaw nye a asak hpe pyi lahpawt nngai n rai. Dai Madu ap ya da ai magam amu ngu ai gaw Karai Kasang a chyeju Kabu Gara Shiga hpe hkaw tsun sakse hkam na lam nan rai nga ai.#Rom 8:35; 2Ko 4:1,16; Gal 1:1; 2Tm 4:7.
25“Ngai gaw Karai Kasang a Mungdan lam hpe nanhte hpang de hkaw tsun kawan hkawm ni ai. Rai ti mung ya gaw nanhte hta na kadai mung nye a myi man hpe htawm hpang de galoi mung bai n mu lu na rai myit dai hpe ngai chye nga nngai. 26Dai majaw nanhte hta na marai langai ngai asak Wenyi sum mat ai rai yang, nye a lit n rai sai lam dai ni ngai nanhte hpe hkrak sha tsun dan da made ai. 27Hpa majaw nga yang ngai gaw Karai Kasang a shatawng shada ai lam hpe ginhtim da ai lam n nga hkra nanhte hpe tsun shana dan ni ai majaw rai nga ai. 28Dai majaw nanhte gaw nanhte a hkum nan hpe mung, nanhte a lata hta Chyoi Pra ai Wenyi ap ya da sai sagu hpung ting hpe mung, sadi sahka hte yu lahku nga mu, Karai Kasang gaw shi a hpung tai nga na matu shi a Kasha a si hkam ai hte mari la ai hpung hpe sagu rem ni zawn bau rem nga mu. 29Ngai pru mat wa ai hpang masha nkau mi nanhte kaw shang nna matse n hkru ai chyahkyawn zawn sagu hpung hpe matsan n dum, hkyamsa n jaw na mara ai hpe ngai chye nga nngai. 30Nanhte hta na masha nkau mi gaw masu hkalem ai ga tsun nna kam sham ai ni hpe shanhte hpang de lau la ai aten mung du na ra ai. 31Dai re majaw, ngai nanhte mahkra hpe masum ning tup shani shana myi prwi law law hkrat nna sharin achyin shadum shahprang da ai hpe dum nna amaja nga mu.
32“Ya ngai gaw nanhte hpe Karai Kasang a lata hta mung, chyeju hte seng ai dai Kabu Gara Shiga a lahku lamai ai lata hta mung, ap da masa de ai. Dai Kabu Gara Shiga gaw Madu a amyu masha ni yawng a matu mazing da ai shaman chyeju nlang hte hpe nanhte e hkam la shangun na ra ai. 33Ngai gaw gade a ja gumhpraw hpun nba mung n ra marin yu nngai. 34Ngai gaw ndai lata ni hte amu galaw nna, ngai hte ngai kaw hkan nang ai ni a ra ai lam magup a matu karum madi shadaw jaw ya ni ai hpe nanhte nan chye nga myit dai. 35Lam shagu hta nanhte hpe madun dan sai nye a len ningli hte maren nanhte mung amu galaw shaja nna hkam sha ai hta jaw ya ai mahtang grau a lu nga ai, nga nna Madu Yesu tsun ai ga ni hpe dum nga let, ra kadawn gawng kya nga ai ni hpe anhte karum madi shadaw lu na rai nga ai,” ngu na tsun mu ai.
36Shing nga tsun ngut jang, shi lahput hput di nna shanhte mahkra hte rau akyu hpyi nga ai. 37Shanhte nlang ja ja hkrap ai hte Pawlu a du hta noi ahpum nna shi hpe pup let shakram dat mu ai. 38Hpang de shi a myi man bai n mu lu na sai ngu ai ga majaw shanhte grau yawn ma ai shing rai li du hkra shi hpe hkan sa dat ma ai.
Поточний вибір:
KASA 20: JCLB
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
Jinghpaw Common Language Bible © Bible Society of Myanmar, 2009.
