PAIMBA 3
3
Waʼa ana i Haruni
3:1-4
1Seʼimo waʼa bangani ncombori i Haruni pai Musa ri tempo pompau i mPue ri Musa ri wawo Buyu Sinai. 2#Pai. 26:60 I Haruni mampotumpu aopo ana tuama inceʼemo: i Nada anu uyue, nepa nasuncu i Abihu, i Eliasari pai i Tamari. 3Tau seʼe ndalanti mewali tadu mpanyomba, ndabubuka lana ri wawo ntanoananya. 4#Tad. 10:1-2, Pai. 26:61 Paikanya i Nada pai Abihu mate ri pada bone Sinai, ri tempo pampanyombaka ntau seʼe anu anu kapali. Tau seʼe radua bereʼe ananya. Mewali sindara tuwupa i Haruni, i Eliasari pai i Tamari mangkekenimo tetala ntadu mpanyomba.
Waʼa nto Lewi ndapakanoto da mamporiokoi waʼa ntadu mpanyomba
3:5-13
5Ndatoʼo i mPue ri Musa, 6“Peboomo waʼa nto Lewi pai pakanotomo tau seʼe da mewali toporioko i Haruni. 7Tau seʼe da motetala ri raya ngKemaku pai da mamporiokoi waʼa ntadu mpanyomba pai waʼa ntau sondo ri potetala ntau seʼe ri raya ngKemaku setu. 8Tetala ntau seʼe da mampasilolongani waʼa mparewa ri raya ngKemaku pai mawianaka tetala ri Kemaku setu mancaru ngkoro waʼa nto Isaraeli. 9Ri oyo waʼa nto Isaraeli podo to Lewi anu kupapakoyoka tetala mamporiokoi i Haruni pai waʼa mulinya. 10Paikanya iHaruni pai waʼa ananya da nulanti mawianaka tetala ntadu mpanyomba; ane reʼe tau ntaninya anu da mampebutuka mawianaka tetala ntadu mpanyomba sangaya-ngaya da kupepate.”
11Ndatoʼo woʼu i mPue ri Musa, 12-13#Pa. 13:2 “Kamonconya waʼa nto Lewi kupilisi da galaku. Ri tempo kupampepate waʼa ana uyue nto Masiri, pura-pura ana tuama nto Isaraeli pai pura-pura ana mpinatuwu ntau seʼe anu uyue kupatani da galaku. Pura-pura setu paka da galaku. Ewa poncawani waʼa ana uyue nto Isaraeli anu tuama to Lewi kutima da galaku, maka Yakumo Pue.”
Paimba to Lewi
3:14-39
14Ri papa bone Sinai i Pue mampokau i Musa, 15da maimba pai maʼuki waʼa nto Lewi santina pai santina seʼe; pura-pura ana tuama anu tinuwu sambuya waindeku da nuʼuki toʼonya. 16Nawianaka i Musa songka i mPue setu. 17-20Ana i Lewi anu tuama tatogo inceʼemo: i Geresoni, i Kohati, pai Merari. Tau seʼe inceʼe ngkai waʼa ntau anu ndapapotoʼo malulu toʼo ntau seʼe. Ana tuama i Geresoni radua, toʼonya: i Libini pai Simei. Ana i ngKehati anu tuama aopo, toʼonya: i Amara, Yisihari, i Heberoni pai Usieli. Ana i Merari anu tuama radua, toʼonya: i Mahali pai i Musi. Tau seʼe mewali ngkai waʼa ntau anu ndapapotoʼo malulu toʼo ntau seʼe.
21To Geresoni inceʼemo muli i Libini pai Simei. 22Poromu ntuama to Geresoni anu sambuya waindeku tinuwunya anu teʼuki 7.500 tau. 23-24I Eliyasa ana i Laeli mantadulakoni tau seʼe. Ri pokema nto Isaraeli, tau seʼe mawangu kemanya ri tondo kasoyoa ri taliku ngKema i mPue. 25Ri tau seʼe ndapesarumakaka pampasilolongani Kema i mPue, sangkani pai kaʼuwinya pai ayapa mpoompo wombo mpesua. 26layari ntambale sape-sape Kema setu. Tau seʼe mamporipalei pura-pura tetala anu mokenta pai waʼa mparewa setu.
27To Kehati inceʼemo muli i Amara, i Yisihari, i Heberoni pai i Usieli. 28Muli ntau seʼe anu tuama tinuwu sambuya waindeku poromunya pura-pura 8.600 tau. Tau seʼe motetala mampasilolongani waʼa mparewa ri raya ngKema i mPue. 29-30I Elisapa ana i Usieli mantadulakoni tau seʼe. Tau seʼe mawangu kemanya ri tondo selata ngKema i mPue. 31Anu da naporewu ntau seʼe inceʼemo: Peti mPojanji, meja, witi ncilo, waʼa lampaʼani mpanyomba, waʼa mparewa anu napake waʼa ntadu mpanyomba ri Lincu Magali pai ayapa makumba anu maoyoti Lincu Anu Magali mPodago. Tau seʼe anu mamporipalei pura-pura tetala anu mokenta pai waʼa mparewa setu.
32Tadulako nto Lewi inceʼemo i Eliasari. Siʼa anu majagai tau anu motetala ri Lincu Magali.
33To Merari inceʼemo muli i Mahali pai i Musi. 34Muli ntau seʼe anu tuama tinuwu sambuya waindeku poromunya pura-pura 6.200 tau. 35I Surieli ana i Abihaili mantadulakoni tau setu. Tau seʼe mawangu kemanya ri tondo utara Kema i mPue. 36Anu naporewu ntau seʼe inceʼemo waʼa mparewa ngKema setu, waʼa sobonya, nono pai patundanya, pai pura-pura parewa sangkani pai waʼa ntetala anu mokenta pai waʼa mparewa setu. 37Ewanceʼe seʼe waʼa nono ntambale pai potunda ngKema setu, waʼa mpato pai wayaanya anu ndapake ri soma.
38I Musa pai i Haruni mawangu kemanya api waʼa ananya ri suara ngKema tondo pebetea. Tau seʼe anu maincani pampasilolongani katewianaka mpanyomba nto Isaraeli ri Lincu Magali. Ane reʼe tau ntaninya mampebutuka da mawianaka tetala setu sangaya-ngaya da kupepate. 39Pura-pura tuama ri lemba i Lewi tunuwu sambuya waindeku anu naʼuki i Musa santina pai santina seʼe malulu songka i mPue, poromunya pura-pura 22.000 tau.
To Lewi mewali poncawani ana tuama nto Isaraeli
3:40-51
40Ndatoʼo i mPue ri Musa, “Pura-pura ana uyue nto Isaraeli galaku. Imbamo pai ukimo toʼo ntau seʼe anu tinuwunya sambuya waindeku. 41Paikanya pura-pura to Lewi poncawani ntau seʼe da galaku. Maka yakumo Pue! Pai waʼa mpinatuwu nto Lewi inceʼe seʼe mewali poncawani waʼa ana uyue mpinatuwu nto Isaraeli.” 42Nawianaka i Musa songka i mPue setu; naʼuki pura-pura toʼo ana tuama anu uyue, 43anu tinuwunya sambuya waindeku. Poromu ntau seʼe pura-pura 22.273 tau.
44Roo setu ndatoʼo i mPue ri Musa, 45“Patanimo waʼa nto Lewi da galaku mewali poncawani pura-pura ana uyue nto Isaraeli anu tuama; ewanceʼe seʼe pinatuwu nto Lewi da mewali poncawani mpinatuwu nto Isaraeli. 46Ua waʼa ana uyue nto Isaraeli anu tuama meruu 273 tau ungka ri imba nto Lewi. Mewali perunya setu da ndibayari. 47Sambaʼa ananggodi da ndibayari alima ngkomba doi salaka malulu oli ri raya ngKemaku, 48doi setu waika i Haruni pai waʼa ananya.” 49Nawianaka i Musa songka i mPue setu. 50Natima 1.365 ngkomba doi salaka 51nepa nawaika i Haruni pai waʼa ananya.
