Mbete Matiye 3
3
1-2Sew a hani Za̧h ti̧h ɓil lawkɔr ké tusiɓa Zude. Ke namuri-aw, ke ƴo hi̧ nzukri ti̧h ɓil batem a mbih. Ke ƴo ka-kah ɓay ɓahri se : « Lák mbay a nunmbam gi ka̧h da, í mbi law woiri ké tul suya ma fal el kan law tul Ŋgerzah. »
3Za̧h ra ɓa nzuk ké Ezay, gun nzak pihna Ŋgerzah a lewsa̧ ɓah ɓay tul ye ɓahri, kusol nzuk mgbe ɓil lawkɔr ɓahri, í lek wuri mahful geŋ Miƴori#3.3 Í mgba Mbete Esaïe 40.3 tuh ke gel ki̧na-ay.. Í lek wuri fulu ɓá na kparak kparak.
4Za̧h ra ndoh gar kú-u kaŋ ke pirma zɔŋzɔŋ#3.4 Gar ndohna Za̧h ke fe su̧na ye eŋ gar ndohna ke fe su̧na a gun nzak pihna Ŋgerzah. Í mgba Mbete Zacharie 13.4 ke Mbete 2 Rois 1.8 tuh ke gel ki̧na-ay.. Ke ŋga̧h si̧h ye ke sal ho̧ko. Fe su̧na ye ɓa zele ke num zuhru.
5Wara mí ziɓ a Zurusalemri ke ziɓ a ɓoruri ké tusiɓa Zude ke ziɓ a a̧yri ké puh woyri ɗoŋ ɓel mbih Zurdeŋ gbam gim ma ta̧w ye. 6Ku hi̧ Za̧h soh niri mbih batem ɓil mahmbih Zurdeŋ. Nzak woyri ƴo ten ɓay suya woyri. 7Za̧h ko daɓa fariziri ke sadusiri ƴo gi ma gel ké-e ƴo hi̧ ziɓri ti̧h ɓil batem a mbih ra bale, ke ɓah hi̧ niri ɓahri : « A woiri, mi̧hri soy, a ge mí sɔk wuri í ɗuk haŋ fa̧hna Ŋgerzah ké ƴo gina le ? 8Í hi̧ mi̧hri mbilaw woiri ké i ruh ɓá ti̧h, ɓá leh lehna siŋ sina a suki ké mah ke kanlaw tul Ŋgerzah. 9Kerɓay woiri ké i ɓahri, i ɓay ya̧ mun woiri ke riŋ ziih Abaraham le, í lu kerɓayu ma fal. Mi ƴo ɓah hi̧ wuri ɓahri se, Ŋgerzah ƴo ke ŋgerna-sɔɓ kasawri-aw ti̧h ɓa gun zih Abarahamri.
10Tena ƴo ɗih ya ké sa̧w kpuh ɓay te-u wara. Kpuh a suŋ suŋ gbam ké leh lehna a suki ya dale, ke ɓay te ku̧ ɓil hɔrɔ. 11A bi ra, mi hi̧ nzukri ti̧h ɓil batem a mbih ké ɓa batem a mbilaw ɓay law woyri kú-u mbi ké tul suya ma fal el kan tul Ŋgerzah. Mí nzuk a luki ƴo gina. Ŋgerna ye mba tul bi mba-mba. Ɗíŋ tul ɓay sel sal sabɔk ye kara mi mah ya. A ye mí ke ɓay hi̧ nzukri ti̧h ɓil batem a Tempuki ké ɓa batem a hɔrɔ. 12Ŋgoro-zo naŋ na ndɔk ye. Ke ɓay kehr keni mbu̧y naŋ ke ti̧hri naŋ. Ke ɓay fa̧h ti̧hri naŋ ku̧ ɓil pul. Mbu̧y naŋ ba, ke ɓay nzuh ke hɔrɔ ké ri-rimna ya. »
13Wara mí Zezu ur ke tusiɓa Galile gi ka̧h ta̧w Za̧h ké ɓel sew Zurdeŋ ɓay hi̧ Za̧h ɓá soh ni mbih batem. 14Mí Za̧h sa-a. Ke ɓahri : « A bi mí-i yih ɓay mú soh mi mbih batem wa, ani mú-u gi ta̧w bi ɓay mí soh mu mbih batem le ? »
15Dale Zezu yih nzak ye ɓahri : « Mú poŋ hi̧ batemu ɓá laɓ. Su-su ɓay mú soh mi batemay ɓay hi̧ sal in ké Ŋgerzah lek ɓay mí ŋga̧h ɓá laɓ ƴo gelu. »
Wara mí Za̧h soh ni mbih batem#3.15 Tí̧h mbih batemaw ɓa nam ké Ŋgerzah sɔk Zezu ɓa nzuk ké-e mbi ni ɓa Ŋgermbay. Kandɔkaw mí Zezu ti̧h mbih batem ya̧ keni suya nzukri ku̧ tul ye kandɔk mbay ya̧ suya nzuk puh yeri ku̧ tul ye..
16Zezu ɓá ti̧h ɓil mbih bale, í ko, nunmbam mgbur hi̧ nzukri ko, mí Zezu ko Tem Ŋgerzah ɗer kandɔk mbɔre gi kaɓ tul ye. 17Mí í ko, kusol ti̧h ke nunmbam ɓahri : « A ye-ay, ke ɓa gun sana bi. Law bi na sa tul ye. »
Поточний вибір:
Mbete Matiye 3: SIAFNK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© Wycliffe Bible Translators, Inc. All rights reserved.