PEMUYAN 19
19
Paulus kaʹ lepoʹ Ipesus
1Jinan Apulus un kaʹ lepoʹ Kurintus, tai kun Paulus masat pa tipo tanaʹ apau, ngan nai ie abeʹ kaʹ Ipesus. Kina ha taʹan palai diaʹ bayaʹ katuk Tuhan. 2Un dau ue neng ida: “Un ncem alaʹ Berua Buheʹ dalau kenai hem ngelan are tupe?”
Un dau re neng ia: “Naʹun, abeʹ meʹ tisen adeʹ ban un Berua Buheʹ.”
3“Buk ke pekina,” kun Paulus, “man batis inu hem lepa sihoʹ ngebatis tupe?”
Un dau re dina: “Man batis Yaya.”
4Penco dau Paulus pelaʹa: “Yaya ina ngebatis ida diaʹ nesen ngan nyepuleʹ kimet de. Pekini dau ue neng lepoʹ Israil dina: ‘Tekep kem ngelan ia iaʹ kenai tahaʹ bayaʹ neng akeʹ,’ ina Yesus.”
5Lepa re kenahan dau puyan ina, tai re mung sihoʹ ngebatis dalem ngadan Tuhan Yesus. 6Kun Paulus napoʹ ujoʹ o neng ida, sulo kenai Berua Buheʹ mesun neng ida, penco re pisiu man isu iaʹ bulen dau. Kun nte badaʹ seluhan isiu cen Allah pelaʹa. 7Masa un puloʹ dua usa mung nte laki dina.
8Un Paulus, tai kun ne kaʹ amin sebayang Yahudi, mentung nge pisiu ngan tempa dau ue. Telu bulan majan ne pata petiraʹ ngan petisen ida neng puyan pengaren Allah ngaren kelunan. 9Moʹ un palai diaʹ ban mahing kimet de, ngan abeʹ de ubaʹ ke ngelan, bang pejaʹat dau neng Janan Tuhan tuaʹ ne ida me dulu, ina ukoʹ Paulus mecin ida dina. Kun ne ngkin ida diaʹ bayaʹ katuk Tuhan dina ngan ne. Singket tau ne tai ie petiraʹ dalem amin sekula Tiranus. 10Pekina puyan Paulus dalem dua uman majan ne, pa mung dulu neng tanaʹ Asia kenahan tiraʹ Tuhan, inu pia Yahudi, ngan pekina pe Gerika, mung nte kenahan dau ue.
Anak Sekiwa
11Ban cen Paulus, Allah uyan kudaʹ puyan nyingan iaʹ ca naʹan diseʹ, 12pa dulu alaʹ berit apeʹ e, iaʹ man ne miʹit sana ha, ketai re ngkin ne palaʹ diaʹ sakit. Penco penyakit de pesau cen ida, ngan pekina pe ketai bali jaʹat kelap cen ida lete. 13Un pe palai lepoʹ Yahudi iaʹ ban tutang tutang nai masat, diaʹ mencam cuk bali kelap neng kelunan. Kun nte ten ke kanan ngadan Tuhan Yesus neng ida diaʹ ban bali nelasek. Kun dau re neng bali: “Akeʹ cuk kem kelap man ngadan Yesus iaʹ Paulus badaʹ ina.” 14Un tujoʹ usa laki, anak Sekiwa, iaʹ pekina puyan nte. (Sekiwa ina ca lepoʹ Yahudi, detaʹu bioʹ.)
15Un sepuʹo un dau bali neng ida: “Tisen nceʹ Yesus ina, pekina pe Paulus. Ikem dini, aheʹ kem tupe?”
16Penco laki iaʹ ban bali nelasek idai nyudup anak Sekiwa ne, mentung lemenaʹ ida ngan ngenyarem nyakit ida pa ketai re kelap cen amin ina, ugai ngan muʹo suhat ne ida. 17Tai pasi ne denga ina neng ahang mung lepoʹ Yahudi ngan lepoʹ Gerika diaʹ mudip kaʹ lepoʹ Ipesus. Tai takut ne tekaʹ de mung. Tai un pit kuʹo ke dulu diaʹ pempau ngadan Tuhan Yesus. 18Kadoʹ de diaʹ ngelan Tuhan dina nai kaʹ mpun dulu, badaʹ ngan peluhaʹ ban pemuyan nte cen kena. 19Ban un pe kadoʹ dulu diaʹ mampin taban pucau cen kena, nai re pempun mung surat te, penco re nutung nge kata mpun dulu. Kun dulu pecap ban beli ie lema puloʹ ibu ligit pirak. 20Pekina ban luhaʹ penyukat tiraʹ Tuhan iaʹ tai denga kuʹo ke, ngan tai un pit un pit pengali ie.
Kasing kaʹ dalem lepoʹ Ipesus
21Lepa ne puyan ina uʹo, un tekaʹ kimet Paulus ubaʹ ke tai masat pa tipo tanaʹ Makedunia ngan tanaʹ Gerika. Uʹo ina ha ngimet ketai kaʹ Yerusalim. Kun dau ue: “Buk keʹ tai abeʹ kaʹ ina ʹo, atek keʹ ketai naʹat tanaʹ Rum lete.” 22Ina ukoʹ o cuk dua usa diaʹ uban pegayeng ngan ne tai nekena kaʹ tanaʹ Makedunia, dua dina ne Timutius ngan Irastus. Dalau ina, ngelineʹ ne Paulus kaʹ dale. Asia majan kediʹut de.
23Dalau ina nuyan ca kasing bioʹ kaʹ lepoʹ Ipesus kuʹun Janan Tuhan. 24Moʹ un ca laki, ngadan ne Dimitrius, iaʹ mencam nene pirak uyan katap amin uyat bali leto Artimis cen pirak. Un gayeng ina bioʹ laleʹ bang nge neng diaʹ mencam nene dina. 25Kun Dimitrius pempun ida diaʹ pegayeng ngan ne pemung ngan mung nte diaʹ pekuaʹ gayeng dina. Un dau ue neng ida: “Ahaʹ cenganak cenganak, un te ikem tisen cen gayeng ina iaʹ ukoʹ le kayaʹ. 26Un te ikem taʹan ngan kenahan neng puyan Paulus ini, kadoʹ dulu tai seluk ngan payo ngan ne. Abeʹ e bang kaʹ Ipesus tuaʹ le. Pa tipo tanaʹ Asia pe tai katuk Paulus ne. Un baʹan dau Paulus: ‘Uyat iaʹ ban kelunan uyan ke sereket Tuhan Allah, abeʹ e ina iaʹ ban Tuhan Allah.’ 27Un diaʹ pekina, abeʹ e gayeng le ini tuaʹ le iaʹ ketai tasaʹ, di pareʹ amin Artimis, bali leto bioʹ ina, abeʹ dulu ke pesingo ia ne laʹa ʹo. Ke pesau mung, peging ngan pengaren bali ini, moʹ mung dulu lemameʹ ia kaʹ tanaʹ Asia. Ketoʹ dulu kusun tanaʹ lemameʹ Artimis ne.”
28Lepa re kenahan dau puyan ina, nai buseʹ buseʹ ne ida, tading ketai re lemikaʹ: “Bioʹ bali Artimis lepoʹ Ipesus,” kun dau re tesep tesep ke. 29Tai jaʹat ne ngan kasing dau dalem lepoʹ ina. Sulo re peseket tai pempun kaʹ lasan lepoʹ, mentung nte dakep Gayus, ngan Aristakus lepoʹ Makedunia, diaʹ ban pejahi ngan Paulus masat cen kena. 30Ubaʹ Paulus ketai pisiu ngan dulu kina, un sepuʹo diaʹ bayaʹ katuk Tuhan dina, ida mulen ne tai. 31Un pe kudaʹ usa diaʹ tuʹa neng perinta cen tanaʹ Asia pelaʹa, diaʹ malai ngejahi Paulus, naʹ tiraʹ katu mia mulen ia tai kukoʹ lasan ina. 32Dalau dulu bisau bisau dau pekina, un palai pisiu pekini, un palai pisiu pekina, moʹ dulu diaʹ pempun dina muʹo tai kasing diseʹ de. Kadoʹ de diaʹ abeʹ un tisen inu iaʹ ukoʹ de tai pempun kina. 33Palai mida dina ngihoʹ ban Alik-sandar iaʹ nading puyan ini moʹ lepoʹ Yahudi ban mecuk ia tahaʹ tena mpun ina. Kun Alik-sandar ina pekata man ujoʹ o, ubaʹ ke mipa dulu kina. 34Uʹo re tisen ia ban ca lepoʹ Yahudi, sulo re ngelengap mung, pa majan kihoʹ kihoʹ dua jam, pekini dau re: “Bioʹ bali Artimis lepoʹ Ipesus.”
35Ketai kuʹo ho laki bioʹ perinta lepoʹ ina penceng ngan pedenaʹ dau me mpun dina. Un dau ue: “E lepoʹ Ipesus, mung dulu te tisen lepoʹ Ipesus ini petubo umaʹ palan Artimis iaʹ bioʹ, ngan uyat batu iaʹ nai luhoʹ cen langit ina. 36Dalem mung puyan ina, abeʹ un aheʹ iaʹ senteng keʹ nyepuhoʹ o. Ina ukoʹ tekep kem ke pedenaʹ ading, ngan ayen uyan pemuyan iaʹ pahoʹ-ahoʹ. 37Moʹ ban ikem ngkin ne ida dini kini, petem abeʹ pe ida ngelau inu dalem umaʹ palan le, ngan abeʹ pe ida pejaʹat bali leto Artimis le. 38Buk Dimitrius de pat diaʹ mencam nene dina un ukoʹ de ke mekem penyalaʹ neng aheʹ aheʹ pe, ina pe mpun diaʹ lataʹ ke pebetep tiraʹ ukoʹ tai re petugen puyan ina. Tekep te ida ti ie neng ida selepeʹ kina. 39Un ʹo, buk kem abeʹ un teto tekaʹ neng ina, senteng ngkem tai palaʹ diaʹ lataʹ diaʹ peteneng lepoʹ pelaʹa. 40Moʹ le malap ke luhaʹ penyalaʹ le suaʹ ban puyan bikaʹ pahoʹ-ahoʹ tau ini, iaʹ abeʹ un tuman tuman ne. Abeʹ le mencam ke mipa dulu suaʹ ban puyan ini.” 41Uʹo laki bioʹ perinta lepoʹ ina pisiu pekina, kun ne cuk dulu dina tai uleʹ nuʹo.
Seçili Olanlar:
PEMUYAN 19: KNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Kenyah New Testament © Bible Society of Malaysia, 1984.
