PEMUYAN 18
18
Tai Paulus kaʹ lepoʹ Kurintus
1Uʹo ina puke kun Paulus cen lepoʹ Atina, penco tai ie abeʹ kaʹ lepoʹ Kurintus. 2Kaʹ ina ha petegoʹ ngan diaʹ lepoʹ Yahudi ngadan nte Akila ngan Periskila ida dua peto, diaʹ ban pempet kaʹ lepoʹ Puntus, iaʹ laho lepe ban nai cen lepoʹ Rum tanaʹ Italia, moʹ Laja Keludius cuk lepoʹ Yahudi mung tai kelap cen lepoʹ Rum. Un dalau ketai Paulus kaʹ lepoʹ Kurintus, tai kun ne naʹat ida dua, 3penco ho ngelineʹ pegayeng pemung ngan nte dua, moʹ pekuaʹ gayeng nte telu mita pengudip de uyan lepau anit pun. 4Singket Tau Kelineʹ ne tai Paulus pata petiraʹ dalem amin sebayang Yahudi, moʹ o ubaʹ lepoʹ Yahudi ngan lepoʹ Gerika ke mayo nai ngelan.
5Tegoʹ kenai Silas ngan Timutius abeʹ cen tanaʹ Makedunia, un Paulus abeʹ un kelineʹ kelineʹ e penco tiraʹ Tuhan, mentung tugen dau ue badaʹ me lepoʹ Yahudi ban Yesus ina lete iaʹ atek ngkang pungu udip ne. 6Kun lepoʹ Yahudi miʹa ngan pejaʹat dau neng Paulus. Kun Paulus nepap abu sapai ie, mentung dau ue neng ida: “Buk kem lingu ngan ke durat berua hem nuʹo, tiwet neng ikem tengen pesuʹun kidi. Abeʹ penyalaʹ ini kesihoʹ ake. Naʹkini ketai heʹ pala lepoʹ tahaʹ awang Yahudi ne ini.”
7Ina ukoʹ Paulus tai mecin ida. Tai kun ne pemung amin ngan ca laki ngadan ne Titius Yustus, ca laki iaʹ tahaʹ awang lepoʹ Yahudi iaʹ temek lemameʹ palaʹ Allah. Un amin ne petemping ngan amin sebayang Yahudi. 8Un Kerispus de panak, nai re ngelan Tuhan. Kerispus iaʹ tuʹa bioʹ mpun sebayang Yahudi dina. Ngan kadoʹ kenai diaʹ lepoʹ Kurintus ngeringa dau katuk Paulus, sulo nai re ngelan Tuhan ngan tai sihoʹ ngebatis.
9Un ca alem me, kenai Tuhan pisiu ngan Paulus dalem penaʹat te, kun ne: “Ayen ncoʹ takut lemuto ne pisiu, ngan ayen tai luʹap tekaʹ kimet coʹ, 10moʹ un te akeʹ ngan ncoʹ, ngan abeʹ un aheʹ iaʹ senteng ke ti jaʹat neng ikoʹ. Kadoʹ kelunan nceʹ dalem lepoʹ ini iaʹ akeʹ ke un.” Pekina dau Tuhan me Paulus. 11Ina ukoʹ o ca uman nem bulan majan Paulus ngelineʹ kina, pekatuk tiraʹ Allah mida kina.
12Dalau Galio tai gebenur ngkang perinta kaʹ tanaʹ Gerika, nai kun lepoʹ Yahudi diaʹ kuaʹ ayo ban peseket ubaʹ ke nyakit Paulus. Penco re dakep ia, ngkin ia kukoʹ diaʹ lataʹ pebetep tiraʹ. 13Kun dau re: “Laki ini iaʹ peseluk dulu tai lemameʹ palaʹ Allah ngan puyan iaʹ seʹ ke nyarat adet meʹ.”
14Kena Paulus ke pisiu, un dau Galio neng lepoʹ Yahudi dina: “E lepoʹ Yahudi, buk lan ne ini ca puyan salaʹ ngan ca puyan jaʹat, tekep te akeʹ pedenaʹ ngeringa dau hem. 15Iaʹ lan ne ini ca paseʹ tiraʹ kem kuʹun ngadan isiu, ngan kuʹun adet cem. Ikem tengen iaʹ tekep ke peteneng nge. Abeʹ keʹ ubaʹ ke pebetep tiraʹ neng puyan iaʹ pekini.” 16Penco ho pekarap ida cen mpun diaʹ lataʹ pebetep tiraʹ dina. 17Sulo dulu diaʹ kadoʹ kina dakep Sustenis, tuʹa bioʹ mpun sebayang Yahudi dina, penco re lemeta ia kata diaʹ lataʹ pebetep tiraʹ dina. Abeʹ Galio pesingo ca bute neng puyan ina.
Tai Paulus uleʹ kaʹ Antiukia
18Kun Paulus ngelineʹ kaʹ Kurintus majan ne ngan diaʹ cenganak dalem Tuhan kina. Uʹo ina tai ie puke bayaʹ kapen tai kaʹ tanaʹ Siria pemung ngan Periskila re dua Akila. Kena ina Paulus nguluk ulu ue kaʹ lepoʹ Kengkeria, moʹ o lepa ban patek tuket ngan Allah. 19Abeʹ ne ida telu kaʹ lepoʹ Ipesus, tai Paulus petat ngan nte dua kina. Bang Paulus tengen le iaʹ tai penco kedalem amin sebayang Yahudi. Kina ha pata petiraʹ ngan lepoʹ Yahudi. 20Kun nte ke mapo ia ngelineʹ majan kaʹ Ipesus; abeʹ e dayo, 21bang nyat lesau le ia, kun dau ue: “Buk un pengubaʹ Allah, nai te akeʹ ngeliwet palaʹ ikem laʹa ʹo.” Penco tai ie bayaʹ kapen, mecin Ipesus.
22Uʹo Paulus abeʹ kaʹ lepoʹ Kaisaria, penco tai ie pukat kaʹ Yerusalim, badaʹ tiga saheʹ e palaʹ Mpun diaʹ ngelan Tuhan kina. Sulo tai ie puno kaʹ Antiukia pelaʹa. 23Kudaʹ majan pe ia ngelineʹ kina, penco tai ie puke neliling pa tipo tanaʹ Galatia ngan Perigia, mentung nge ngepali penawai mung nte diaʹ ngelan Tuhan dina.
Tai Apulus kaʹ lepoʹ Ipesus ngan lepoʹ Kurintus
24Un ca laki lepoʹ Yahudi, ngadan ne Apulus, iaʹ nai kaʹ lepoʹ Ipesus. Kaʹ lepoʹ Alik-sandar ban nai ie pempet. Ia ca laki iaʹ mencam pisiu, ngan tisen neng sen isiu dalem Kitap Tuhan. 25Un ban laki ini lepa ne ia pekalai katuk neng Janan Tuhan. Ia ca laki iaʹ jaya pisiu, ngan teneng dau katuk ke neng pemuyan Yesus. Naʹ pia pekina, bang neng batis Yaya tuaʹ le ia tisen. 26Kun ne pisiu dalem amin sebayang Yahudi ngan tempa dau ue. Dalau Periskila ngan Akila kenahan dau ue, kun nte dau ngkin ia tai kaʹ amin nte, ngan nemek dau re dua badaʹ Janan Tuhan Allah mia ngan peluhaʹ iaʹ teneng pelaʹa.
27Un Apulus ubaʹ ke tai tahaʹ dipa kaʹ tana Gerika. Mung diaʹ ngelan Tuhan kaʹ lepoʹ Ipesus dina pebioʹ saheʹ e tai, mentung nte naʹ surat palaʹ cenganak de dalem Tuhan kaʹ tanaʹ Gerika, apan nte nyelama kenai ie. Uʹo ho abeʹ, bioʹ laleʹ seʹ e mepo pekatuk dulu diaʹ ban ngelan kuʹun pengelesau Allah. 28Moʹ kuʹun penisen Apulus, ina ukoʹ lepoʹ Yahudi supeʹ pesakat ngan ne neng mpun dulu, mentung nge badaʹ cen isiu dalem Kitap Tuhan ban Yesus ina, ia lete iaʹ ngkang pungu udip.
Seçili Olanlar:
PEMUYAN 18: KNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Kenyah New Testament © Bible Society of Malaysia, 1984.
