2 कुरिन्थियां 11
11
पौलुस ते कूड़े प्रेरित
1मैं चाहवे कि तम्ही माई थोड़ी जा मूर्खता सहन करती गिहा, जिंवे वास्तव मां तम्ही ऐ समय मां सहन वी करा पले। 2कांकि मैं तम्चे बारे मां नरीकारा आलीकर धोन्न लाली रिहे, ऐवास्ते कि मैं हेके ही मर्दा लारे तम्ची बात पक्की करती ङिली यानिकि मसीह लारे, तम्हानु पवित्र कुंवारी चे समान मसीह नु सोंपती ङिये। 3पर मैं ङरे कि जिंवे नाग़ा ने आपणी चलाकी लारे हवा नु भरमाती ङिले, कङी इसड़े ना हो कि तम्चे मन मसीह चे प्रति पवित्रता ते भग़ती कनु भटकती ना जाओ। 4कांकि अगर कुई तम्चे गोढु आती कर जिसे ईशु चा सुसमाचार अम्ही तम्हानु सुणाला, ओचे अलावा कुई ङुजे ईशु चा सुसमाचार सुणावे, जा जको आत्मा तम्हानु मिड़ला, ओचे कनु अलग़ कुई नेरी आत्मा नु ग्रहण करा तां तम्ही छुटकारे चे समाचार नु कोनी अपनाले, ओचे कनु अलग़ कुई ङुजे समाचार नु अपनावा तां तम्ही बङी आसानी लारे वानु अपनाती गिहा।
5मैं कुई बाते मां वां प्रेरितां कनु कम कोनी जानु तम्ही बङे समझा। 6अगर मैं ब़ोलणे मां अनाड़ी छै, तां ज्ञान मां कोनी। ऐचा प्रमाण अम्ही सब तरह कनु ते हर-प्रकार चीया बाता मां तम्हा लौका नु ङिती चुकले।
7का ऐचे मां मैं कुई पाप करला कि, मैं तम्हानु नरीकारा चा सुसमाचार मुफ्त मां सुणाला, ते आपणे आप नु झिके करले, कि तम्ही ऊंचे हुती जावा? 8लौका ची नजरी मां मैं नेरीया कलीसिया नु लूटणे आलीकर काम करले यानिकि वांचे कनु मजदूरी गेहली, ताकि तम्ची सेवा करे। 9#फिलि 4:15–18ते जब मैं तम्चे लारे हुता, ते मनु कमी पेशी हुली तां मैं काये उपर बोझ कोनी नाखला, कांकि भावां ने मकिदुनिया कनु आती कर माई जरुरता नु पुरे करले। मैं हर बाते मां आपणे आप नु तम्चे उपर बोझ हुवणे कनु रोकले, ते रोकली वी रिही। 10अगर मसीह ची सच्चाई माये मां छै, तां अखाया चे प्रदेसा मां कुई मनु ऐ घमण्ड कनु नी रोकी। 11के वास्ते, का ऐवास्ते कि मैं तम्चे लारे प्रेम ना राखी? नरीकार ग़वाह छै कि मैं तम्चे लारे प्रेम राखे।
12मैं जको करता आवे पला ऊंही करता वी जई, जाये कनु वां लौका नु ये बाते चा गर्व करने चा मौका ना मिलो कि वे प्रचार चे कामा मां माये बराबर छी। 13कांकि इसड़ी इन्साने कूड़े प्रेरित, ते छल-कपट लारे काम करने आले, ते मसीह चे प्रेरितां चा रुप धारणे आले छी। 14ते हा कुई हैरानी ची बात कोनी कांकि शैतान आप ज्योतिमय दूत जिसड़ा रुप धारण करने ची कोशिस करे। 15ऐवास्ते अगर ओचे सेवक वी धार्मिकता चे सेवका आलीकर रुप धारण करी, ते कुई बङी बात कोनी। पर वांचा अन्त वांचे कामा चे अनुसार हुवी।
पौलुस चा मुसीबता
16मैं बल्ति किहे, कुई मनु मूर्ख ना समझो। पर अगर समझा तां बल्ति मूर्ख ही समझती कर माई सहन करती गिहा, ताकि थोड़ा जा मैं वी घमण्ड कर सग़े। 17ऐ घमण्डा लारे जको कोच्छ मैं किहे, वा प्रभु ची आज्ञा चे अनुसार कोनी पर मनती गिहा कि मूर्खता लारे ही किहे। 18कांकि ब़ोहत सारे लौक संसारिक जीवन चे अनुसार घमण्ड करी, ते मैं वी घमण्ड करी। 19बल्ति तम्ही तां समझदार छिवा कि खुशी लारे मूर्खा ची सहन करती गिहा। 20कांकि जिसे बेले तम्हानु कुई दास बणाती गिहे, जा ते खाती जाये, जा फसाती गिहे, जा आपणे आप नु बङे बणावे, जा तम्चे मुँहा उपर थप्पड़ मारे, ते तम्ही सहन करती गिहा वी। 21मनु खौद्द शर्मसार हुती कर केहणे पड़ले मनती गिहा कि अम्ही ब़ोहत कमजोर जा हुते।
पर जिसी बाते मां कुई हिम्मत ङिखाणे, मैं वी मूर्खता लारे किहे पला कि मैं वी हिम्मत ङिखाणे। 22का वे ही इब्रानी छी? मैं वी छै। का वे इस्राएली छी? मैं वी छै। का वे ही अब्राहम चे वंश छी? मैं वी छै। 23#प्रेरि 16:23का वे ही मसीह चे सेवक छी? मैं पाग़ला आलीकर किहे मैं वांचे कनु बधती कर छै। ज्यादा मेहनत करने मां, बार-बार कैद हुवणे मां, कोड़े खाणे मां, बार-बार मौत चे जोखिम चवणे मां।
24पाँच वारी मैं यहूदिया चे हाथु उनतालीस-उनतालीस कोड़े खाले। 25#प्रेरि 16:22; प्रेरि 14:19तीन वारी मैं बैंता लारे कुटीला, हेक वारी माये उपर पत्थराव हुला, तीन वारी पाणीया आले जहाजा मां मैं चढ़ला हुता भान्ती गेले, हेक वारी रात-ङिओ मैं समुन्दरा मां बिताला। 26#प्रेरि 9:23; प्रेरि 14:5मैं बार-बार सफरा मां, नदीया चे जोखिमा मां, ङाकुवा चे जोखिमा मां, आपणी जाति ची वजह कनु जोखिमा मां, नेरीया जातिया ची वजह कनु जोखिमा मां, शहरा मां रेहणे आला ची वजह कनु, खतरनाक ब्याबान मां, भयानक समुन्दरा चे जोखिमा मां, कूड़े भावां चे बीच मां खतरनाक स्थिति मां रेहला।
27मैं कई राती जाग़ती कर, खास करती भुक्का तरसेला रेहती कर, ते ठड्डी ची वजह कनु ते कम ओढ़णा ची वजह कनु मैं घणीया मुसीबता सहन करलीया। 28ते या सारीया बाता चे लारे-लारे, हर ङिओ सारीया कलीसिया चा बोझ वी माये उपर बणला रिहे। 29कूण कमजोर छै, जाई कमजोरी चा अहसास मनु ना हुवी? का काये पाप मां ढेणे लारे माये जी नी ङुखी?
30अगर मनु घमण्ड करना ही छै, तां मैं आपणी कमजोरी चा घमण्ड करी। 31अम्चे प्रभु ईशु मसीह ब़ा नरीकार जको हमेशा तक धन्न छै, आप खौद्द ग़वाह छै कि मैं कूड़ कोनी मारे पला। 32#प्रेरि 9:23–25जिसे बेले मैं दमिश्क मां हुता, ते राजा अरितास चे राज्यपाल ने मनु गिरफ्तार करने चे वास्ते शहरा उपर पाहरा लाती ङिला। 33ते मैं टोकरे मां खिड़की कनु हुती कर शहरपनाह चे उपर कनु उतारला गेला, ते ओचे हाथा कनु बचती गेला।
Seçili Olanlar:
2 कुरिन्थियां 11: ODR
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
CC BY-NC-ND 4.0