Levitikus Nuarin-tas alupas 21.
Nuarin-tas alupas 21.
1 Intas alep vai intaig u ilpu atimi ahlap. 6 Vai nedo upene ura. 8 Vai nikni ra. 7, 13 Vai natmehgan ura. 17 Eri jim auaraheca an neom itap a ilpu atimi ahlap el et eteuc tah nuarin has irai ohura.
1IS ika a Ihova ehele Moses, Namu tas ehele ohwat atimi ahlap aiek, ohwat hal u Eron, um ika ehele rau, Etmu jim auahas nitap o un tah natimi ahlap vaig tah natimi mas irai up uran pece o un;
2ja vai ilpu atimi ehpan iran esjilid ache, nikavaig, vai risin, im lep vai etman, im inhalav atamaig o un, im inhalav atahig o un, im etwan,
3im natahig iran inveijec, et tup amen aien, et eti eteuc natamnyu un; etmu auahas nitap o un aien vai yin.
4Ja etmu jim auahas nitap o un aien vaig tah et eche, mika yi idivaig tup atimi: et idim atimi alupas aien irai up uran pece o un.
5Erumu jim ucsei apitpityat numri nidjinira ara, erumu jim ucsei, tah nuarin umri ingeijira ara, um jim atai tah nuarin nohura.
6Erumu ilpu atimi upene vai Atua ura ara, erumu jim auahas nidai Atua ura ara: era idim ahlap irai iji itai ahlap ara er atnamud an cap, im lep nitai caig u Atua ura: va nitai inigki erumu upene ara.
7Etmu jim leh intakata inig yi ehgan tah natimi ahlap et mun ago ingeijid aien, ka tah et mun ago nedo maumau aien; im lep inig, etmu jim leh intakata inig aien is abraig pan yin a natamnyu un: era idim ilpu atimi upene vai Atua ura ara,
8va nitai inigki akumu ikni ra aijaua mika eri ilpu atimi upene ara; era idim ahlap an nitai caig u Atua unyimia ara: erumu ilpu atimi upene imi caua ara: ek idim upene ainyak Ihova inig, ek ago upene caua ainyak.
9El et ago ingeijid a inhalav atahig o un tah natimi ahlap, um auahas yin, et mun auahas etman aien: uhmu atnamud yin an cap.
10Etmu jim atipagki incat adgaig o un a natimi esjilid an nahlap, um jim ahpati napelumai o un, nikavaig, et esjilid irai ilpu etwan aien, eris lep atladwi narakei itap an nidjinin, eris lep ati yin mika yi aso yin ira apelumai itap aien;
11im lep inig, etmu jim apan ubutpotet u nohui atimi mas aien, etmu jim auahas nitap o un aien vai etman, ka vai risin;
12im lep inig, etmu jim udei nimnim itap aien um apan itac, etmu jim auahas nimnim itap u Atua o un aien; et mun adgaig incat adgaig itap aien eris atladwi iran narakei itap u Atua o un: et uce intas alep unyak Ihova.
13Etmu leh natahig ache aien yi ehgan.
14Etmu jim leh intakata inig aien is mas natamnyu un yi ehgan, ka intakata inig is abraig pan yin a natamnyu un, ka intakata ago nedo maumau, ka intakata ago ingeijid, etmu jim leh tah aien irai ra sji igki: etmu leh natahig ache aien irai up uran pece o un.
15Vai yi jim auahas nitap u ilpu hal o un aien irai up uran pece o un: ek idim ago upene yin ainyak Ihova.
16Is tas a Ihova ehele Moses, um ika,
17Namu tas ehele Eron aiek, um ika, El et eteuc nuarin has iran tah irai ilpu mapom irai iji mesese, etmu jim apam ehelek aien par ahlap an nitai caig u Atua o un.
18Etmu jim apam ehelek tah natimi inig et has tah nuarin nohun: nikavaig, natimi inig et apat nesganimtan, ka et isvihteuc neduon, ka et haklin tah nuarin, ka et alupas tah nuarin,
19ka natimi inig is tes neduon, ka is tes nikman,
20ka et atga acvaacva aien, ka natimi inig et haklin aien, ka et eteuc nuarin has an nesganimtan, ka et ehias aien, ka et amasaki aien, ka et atpujij nauintin;
21etmu jim apam ehelek tah irai ilpu mapoi Eron natimi ahlap mika yi ahlap irai iji itai ahlap u Ihova er atnamud an cap, el et eteuc iran tah nuarin has: etmu jim apam ehelek aien mika yi ahlap an nitai caig u Atua o un aien; et idim eteuc iran tah nuarin has.
22Etmu caig nitai caig u Atua o un aien, nikavaig, nitai caig inig et itap, im lep nitai caig inig et itap esjilid.
23Ja etmu jim yetpam u natcai apelumai aien, um jim apam ubutpotet u natau, vaig inig nikavaig, et eteuc iran tah nuarin has; vai yi jim auahas niji uarin itap unyak: ek idim ago itap nuarin iji igki ainyak Ihova.
24Is asuptecnaig intas iji igki a Moses ehele Eron, im ohwat hal o un, im lep ehele nup Isreel asega.
Seçili Olanlar:
Levitikus Nuarin-tas alupas 21.: ABO
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)