Levitikus Nuarin-tas alupas 20.
Nuarin-tas alupas 20.
1 Intas alep vai yin et ikni ilpu hal o un aien imi Molek. 4 Vai yin et atau iran aien. 6 Vai ra era apan ehele ilpu atimi araces ara. 7 Vai nago upene atimi. 9 Vai yin et ahlaijaig ohwat atmil o un aien. 10 Vai ingeijid. 11, 14, 17, 19 Vai nedo has esjilid. 13 Vai nedo auarobotpotedo. 15 Vai nedo maumau esjilid. 18 Vai nedo er amcel vaig. 22 Vai nimiaiji intas alep u Atua. 27 Uhmu atgei ilpu atimi araces.
1IS tas a Ihova ehele Moses, um ika,
2Namu lep ika aiek ehele nup Isreel, El et eteuc tah natimi irai up Isreel asega, ka irai up urai taka pece asega era amen an pece Isreel ara, el et ati tah ilpu hal o un aien imi Molek; uhmu idim atgei yin: erumu asji yin irai hat a nup uran pece.
3Ekpu aat irai natimi iyehki ainyak, um atipagki yin ehele nup uran pece o un; vaig inig nikavaig, et mun ati tah ilpu hal o un aien imi Molek, mika yi auahas nimnim itap unyak aien, um tup asaig nidak upene.
4Ja el era eti aktaktai nedo o natimi iyehki a nup uran pece o un, et wat ati tah ilpu hal o un aien imi Molek, um eti atgei yin:
5ekpu aat irai natimi iyehki ainyak, im lep irai ilpu hal o un, um atipagki yin ehele nup uran pece o un, im lep ra asega era apitac yin ara um ago nedo ahnag, era apitac Molek marom ara um ago nedo ahnag.
6El et apitac ilpu atimi araces tah, ka ilpu atimi iji ig era ahei ra a ilpu atmas, mika yi ago nedo ahnag ehele ra, ekpu aat irai natimi iyehki ainyak, um atipagki yin ehele nup uran pece o un.
7Akumu ago upene caua aijaua, mika aki upene: ek idim Atua unyimia ainyak Ihova.
8Akumu imiaiji niji tas alep unyak aijaua, um ago: ek idim ago upene caua ainyak Ihova.
9El et asan tas ahlaijaig tah vai etman ka risin, uhmu idim atgei yin: et mun asan tas ahlaijaig aien vai etman ka risin; uhmu atijai iran inmas o un.
10El et ago ingeijid tah natimi ehele ehgan tah, uhmu idim atgei natamaig inig im intakata inig, erau mun ago ingeijid arau.
11El et amen ehele ehgai etman tah natimi et mun auahas ehgai etman aien: uhmu idim atgei rau; uhmu atijai ira rau inmas urau.
12El et amen ehele ehgai inhal o un tah natimi, uhmu idim atgei rau: erau mun ago nedo has esjilid arau; uhmu atijai ira rau inmas urau.
13El et amen tah natamaig ehelen tah natamaig, et idivaig namen u ilpu atamaig ehele ilpu takata, erau mun ago nedo amcel vaig arau: uhmu idim atgei rau, uhmu atijai ira rau inmas urau.
14El et leh natahig tah natimi im lep risin mika eru ehgan arau, nedo has esjilid nigki: uhmu atnamud ehtaij an cap; vai yi jim eteuc nedo has inigki ehelemia.
15El et amen tah natamaig ehelen tah nitai eklim edo irai pece, uhmu idim atgei yin: uhmu lep atgei nitai eklim edo irai pece iyehki.
16El et apan tah intakata, um amen ehelen tah nitai eklim edo irai pece, uhmu atgei intakata iyehki, im lep nitai eklim edo irai pece iyehki: uhmu idim atgei rau; uhmu atijai ira rau inmas urau.
17El et leh natahig iran tah natimi, inhalav atahig u etman, ka inhalav atahig u risin, el erau ago nedo has arau; nedo amcel vaig nigki; uhmu atgei rau an nuhup u nup uran pece urau: et mun auahas natahig iran aien; et mun ago nedo has aien.
18El et amen tah natamaig ehelen tah intakata et wat eteuc iran nemehe u ilpu takata; erau mun ago nedo maumau esjilid arau: uhmu atipagki rau ehele nup uran pece urau.
19Etmu jim amen tah natamaig ehele etwai risin, ka ehele natahig irai etman: el et uce, et amen ehele natimi ehpan iran aien; arumu lucsei nimtan nedo has urau arau.
20El et amen tah natamaig ehele ehgai matan, ka ehele ehgai etwai etman, et mun auahas ehgai matan aien, ka ehgai etwai etman: arumu lucsei nimtan nedo has urau arau; arumu emesmas arau jam eti eteuc inhal urau;
21El et leh ehgai etwan tah natamaig mika yi ehgan, et mun ago nedo has esjilid aien: et mun auahas ehgai etwan aien; etmu jim eteuc inhal urau.
22Im lep inig, akumu imiaiji intas asega unyak aijaua, im intas alep asega unyak, um ago: vai yi jim alo iramia inpece iyehki, ekpu imiapan caua iran ainyak par amen iran.
23Akumu jim ago nedo o nup urai pece iji ig aijaua, ekpu ahlo pan itac ra ainyak an nuhup unyimia: eris idim ago nitai iji igki asega ara, va nitai inigki kis amcel vai ra ainyak.
24Ja ek mun ika ehelemia ainyak, Akumu ohuun inpece ura aijaua, ekpu alupai caua ainyak, mika aki amen iran aijaua, et alupas nidenided im hune an pece iyehki: ek Atua unyimia ainyak Ihova, ek mun echim ikni caua ainyak ehele nup urai iji taka pece.
25Va nitai inigki akumu asjaaicnaig niji itai eklim edo irai pece et upene aijaua, im niji itai eklim edo irai pece et eti upene, im niji man et upene im niji man et eti upene: akumu jim auahas nitap unyimia aijaua vaig tah nitai eklim edo irai pece, ka vaig tah inman, ka vaig tah nitai atahas et atahas an nobohtan, nitai iji ig marom ek mun ika ehelemia ainyak et eti upene.
26Akumu ilpu atimi upene vai nyak aijaua: ek idim upene ainyak Ihova, ek mun echim ikni caua ainyak ehele nup urai iji taka pece, mika aki ilpu atimi unyak aijaua.
27Uhmu idim atgei tah natamaig inig ka intakata inig et aracsei atimi aien, ka et ahei yin tah natmas: uhmu asji ra sji igki irai hat: uhmu atijai ira ra inmas ura.
Seçili Olanlar:
Levitikus Nuarin-tas alupas 20.: ABO
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)