प्रकाशन 20
20
हज़ारा सालो राज़
1तेखअ भाल़अ मंऐं एक स्वर्ग दूत स्वर्गा का उंधै होथदअ, तेऊए हाथै ती नथहऐ कूंडे कुंज़ी अर एक बडी शांघल़। 2तैहा बडी दानुईं मतलब सह पराणअ बडअ दानअ, ज़ुंण इबलीस अर राख्स आसा, सह ढाकअ अर हज़ारा साला लै डाहअ बान्हीं।#प्रका. 12:9
3संघा किअ सह नथहऐ कूंडा दी पाई बंद। तेथ दी लाई मोहर कि सह किअ हज़ार साला पूरै हणैं तैणीं बंद ताकि ज़ाती-ज़ातीए लोगा तेभै तैणीं भिई कबाता नां पल़े, तेखअ आसा अह ज़रूरी कि थोल़ी घल़ी खोल्हणअ अह भिई।
4तेखअ भाल़ी मंऐं होर राज़गाद्दी अर तेथ दी तै लोग बेठै दै अर तिन्नां लै त दैनअ द परमेशरै नसाफ करनैओ हक, अर तिन्नें आत्मां बी भाल़ी, तिन्नें मूंड तै प्रभू ईशूए शाजत दैणा लै अर तेऊए बैणा दी विश्वास करनै पिछ़ू काटै दै। तिंयां थिऐ तिंयां ज़ुंणी तेऊ पशूए नां पूज़ा किई अर नां तेऊए मोहर आपणैं माथै अर हाथै लाई ती, तिंयां आसा लागै दै भिई ज़िऊंदै हई प्रभू ईशू मसीहा संघै हज़ार साला तैणीं राज़ करदै।#दान. 7:22
5-6ईंयां लोग आसा पैहलै ज़ुंण भिई ज़िऊंदै हुऐ अर तिंयां आसा खास बर्गता आल़ै अर पबित्र। ईंयां निं दुजी बारी भिई कधि मरनै। ईंयां हणैं परमेशरा अर मसीहा लै प्रोहत अर इना करनअ तिन्नां संघै हज़ार साला तैणीं राज़। मूंऐं दै मणछा मांझ़ै निं होर कोहै हज़ार साला तैणीं ज़िऊंदअ हणअ।
राख्सो बनाश
7ज़ांऊं हज़ार साला पूरी हणीं, तेखअ छ़ाडणअ राख्स कैद खानै का पोर्ही। 8तेखअ एछणअ सह संसारे सोभी देशे लोगा कबाता पांदअ ज़ुंण सारै संसारै आसा छिंघुऐ दै। इना देशा लै बोला गोग अर मागोग। राख्सा करनै तिंयां तैहा ज़ैगा कठा ज़िधी तिंयां जुध करी सके। तिंयां हणैं तिधी समुंदरे रेता ज़िहै एतरै खास्सै कठा ज़ेता कुंण गणी निं सकदअ। 9सह राख्से सैना डेऊणीं सारै संसारै हर ज़ैगा अर पबित्र लोगे गराऊंआं अर तैहा एरुशलेम नगरी लै ज़हा लै परमेशर झ़ूरा। तिधी गोटणी तिन्नां सह फेर-फिरदी पर परमेशरा छ़ाडणीं सरगा का आग अर तेता करै करनै तिंयां खतम।#एज. 39:6
10तेखअ ढाकणअ सह राख्स ज़ुंण संसारे मणछा कबाता पाआ त। सह शोटणअ तेखअ आगी अर गंधके सअरा दी। झ़ुठै गूर अर सह पशू हणैं तेथ पैहलै ई शोटी हेरै दै अर तिंयां रहणैं तैहा आगी जैंदरी राची धैल़ी जुगै-जुगै चाछल़दै लागी।#मोत्त. 25:46
बडी शेतै रंगे राज़गाद्दी अर खिरी नसाफ हणअ
11तेखअ भाल़ी मंऐं एक शेती राज़गाद्दी अर तेथ दी परमेशर बेठअ द। पर ज़हा ज़ैगा परमेशर त बेठअ द, तिधा का लुक्कअ सारअ सरग अर पृथूई तेखअ निं तिंयां कोही का शुझुऐ।#मोत्त. 25:31; भज. 47:8
12-13तेखअ भाल़ै मंऐं मूंऐं दै मणछ, कै होछ़ै कै बडै तिंयां थिऐ राज़गाद्दी आजू खल़्हुऐ दै। ज़ुंण मूंऐं दै मणछ समुंदरै आसा डुबै दै, ज़ुंण मरी करै घोरी आसा दाबै दै, ज़ुंण जम्परी आसा, तिंयां सोभ खल़्हुऐ राज़गाद्दी सम्हनै। तेखअ खोल्ही तिधी ज़िन्दगीए कताब अर होर बी कई कताबा। मूंऐं दै मणछो नसाफ हुअ तिन्नें तैहा कताबा दी लिखै दै तेते साबै ज़ुंण तिन्नैं आपणीं ज़िन्दगी दी किअ। तिन्नों नसाफ हणअ तिन्नें कामें साबै।#दान. 7:10
14-15ज़हा मणछे नाअं ज़िन्दगीए कताबा दी नांईं तै लिखै दै तिंयां पाऐ आगीए समुंदरा दी। तेता लै बोला दुजी मौत, ज़ुंण सज़ा तेऊ आगीए समुंदरा दी आसा। तेभा पोर्ही नां मौत हणीं अर नां जम्पर हणीं किल्हैकि तिंयां पाऐ तेऊ आगीए समुंदरा दी। #1 जोह. 5:11-12; जोह. 3:36
Seçili Olanlar:
प्रकाशन 20: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.