प्रकाशन 19
19
1ज़ांऊं जोधअ स्वर्ग दूत बोली मुक्कअ, मंऐं शूणअ इहअ स्वर्गा का कि ज़ाणनअ कि खास्सै मणछ आसा लागै दै ज़ोरै-ज़ोरै इहअ बोल्दै,
“परमेशरे ज़ै-ज़ैकार!
“उद्धार, प्रतप्प अर शगती आसा म्हारै परमेशरे ई।
2“तेऊए करा स्तोती किल्हैकि तेऊओ नसाफ आसा शुचअ अर ठीक,
“तैबी किअ तेऊ तैहा बडी कंज़री बेटल़ीओ नसाफ ज़ुंणी कंझ़रूई करै पूरी पृथूई भ्रष्ट शोटी ती करी। तैहा का लअ तेऊ आपणैं दासे लोहूओ बदल़अ।”#बधा. 32:43
3तेखअ बोलअ दुजी बारी तिन्नैं,
“परमेशरे ज़ै-ज़ैकार!
“तैहा दझ़णेंओ धूँ रहणअ जुगै-जुगै लागी!”#भज. 106:48
4तिन्नैं च़ौबी विश्वासी टोलीए सैणैं अर च़ऊ प्राणीं बी टेक्कअ उटअ पल़ी परमेशरा लै माथअ ज़ुंण राज़गाद्दी दी त बेठअ द, संघा बोलअ,
“एवमस्तू, परमेशरे ज़ै-ज़ैकार!”
मिम्मूंओ बैह
5तेखअ शूणअ कुंण बोल्दअ अर सह ज़ाण्हिंआं त राज़गाद्दी का बोल्दअ,#भज. 135:1
“हे म्हारै परमेशरा का सोभी डरनै आल़ै दासो,
कै होछ़ै, कै बडै, तम्हैं सोभै करा परमेशरे ज़ै-ज़ैकार।”
6तेखअ शूणअ मंऐं ज़िहअ खास्सै मणछ आसा कठा ज़ोरै बोल्दै लागै। अह त इहअ ज़ोरै पाणींए छ़ोआ ज़िहअ शणकार अर गुल़ूबिज़ल़ू ज़िहअ बोल। तिंयां थिऐ इहअ बोल्दै लागै दै,
“परमेशरे ज़ै-ज़ैकार!
“म्हारअ परमेशर, सर्वशक्तिमान करा राज़।#भज. 99:1; 93:1
7एछा, हाम्हां हणअ नंद अर मगन,
अर एऊए करनी हाम्हां ज़ै-ज़ैकार।
किल्हैकि मिम्मूंओ बैह आअ नेल़,
अर तेऊए लाल़ी गई तैर्हुई।
8तैहा लै दैनअ असली बाछे च़मकदै शेतै झिकल़ै बान्हणैंओ हक।
किल्हैकि तेऊ असली बाछो मतलब आसा पबित्र लोगे धर्में काम।”
9तेऊ स्वर्ग दूतै बोलअ मुखा इहअ लिख, “परमेशरा दैआ तिन्नां लै बर्गत ज़ुंण मिम्मूंए बैहे भोज़ा दी आसा शादै दै” तेखअ बोलअ इहअ बी, “ईंयां गल्ला ज़ुंण परमेशरै बोली, ईंयां आसा शुची।”
10ज़ांऊं मंऐं इहअ शूणअ, हुंह पल़अ उटी बाखा तेऊ सेटा माथै टेक्कणा लै ज़ुंण मुंह संघै गल्ला करदअ त लागअ द, तेऊ बोलअ मुखा इहअ, “मुंह सेटा निं माथअ टेक्कै। हुंह आसा तिहअ ई परमेशरे च़ाकरी करनै आल़अ ज़िहअ तूह आसा अर तेरै होर भाई आसा ज़ुंण विश्वास करा अर ईशू प्रगट किई शुची शिक्षा मना। परमेशर ई आसा एक्कै ज़ुंण माथअ टेक्कणै जोगी आसा। सह आसा पबित्र आत्मां ज़ुंण परमेशरे परज़ा तेऊ सत्ते बारै खोज़णैं जोगी बणाआं ज़ुंण ईशू प्रगट किअ।”
शेतै घोल़ेओ शुंआर
11तेखअ भाल़अ मंऐं स्वर्ग घुआल़ी, अर तेथ कै भाल़अ कि एक शेतअ घोल़अ आसा, अर तेऊ घोल़ै प्रैंदै आसा एक शुंआर, ज़हा लै भरोस्सैमंद अर शुचअ बोला, सह करा धर्में साबै परमेशरे दुशमणो नसाफ अर तिन्नां संघै जुध।#भज. 96:13
12तेऊए आछी आसा आगीए लुपल़ै ज़ेही अर तेऊए मुंडै आसा राज़ मुगट। तेथ आसा तेऊओ नाअं लिखअ द पर तेऊ नाओं किज़ै मतलब आसा तेतो थोघ आसा सिधअ तेऊ ई का।#प्रका. 19:16
13सह आसा लोहू करै छ़ल़िकै दै झिकल़ै बान्हीं अर तेऊओ नाअं आसा “परमेशरो बैण।” 14स्वर्गे खास्सी सैना लागी शेतै घोल़ै दी शुंआर अर शेतै असली बाछे शेतै झिकल़ै बान्हीं तेऊ पिछ़ू-पिछ़ू हांढदी। 15ज़ाती-ज़ाती मारना लै निखल़ा तेऊए मुंहां का एक तिछी तलबार अर तेऊ करनअ लोहेओ राज़दंड लई करै तिन्नां दी राज़। सर्वशक्तिमान परमेशरा करनै आपणैं दुशमण इहै खतम ज़िहै लोग दाखो रस बणाआं। तेऊ करनी ईंयां सोभै गल्ला परमेशरा लै ज़ुंण सोभी प्रैंदै राज़ करा अर ज़सरअ प्रकोप तिन्नां लै पल़णअ किल्हैकि तिन्नैं किअ पाप।#प्रका. 2:27
16तेऊए झिकल़ै दी अर ज़ांघा आसा इहअ नाअं लिखअ द कि माहा राज़अ अर प्रभूओ प्रभू।#1 तिम. 6:15
17तेखअ भाल़अ मंऐं एक स्वर्ग दूत सुरज़ा दी खल़्हुअ द अर तेऊ बोलअ ज़ोरै-ज़ोरै सरगै डैऊणै आल़ै सोभी च़ेल्लू-पखीरू लै, “एछा! सोभै झाल़्हिआ, संघा खाआ तैहा धामा ज़ुंण तम्हां लै परमेशरै आसा बणाईं दी।#एज. 39:19-20
18“एछा तम्हैं खाआ राज़ैओ मास्स, सरदार, जोधै मर्धो, घोल़ेओ अर तिन्नां दी शुंआरे ल्हासा का मास्स, कै बज़ीर, कै दास, कै होछ़ै, कै बडै, तम्हां भेटणअ सोभी रंगो मास्स खाणां लै।”
19तेखअ भाल़अ मंऐं कि सह पशू निखल़अ समुंदरा का बागै अर पृथूईए सारै राज़ै अर तिन्नें सैना तेऊ घोल़ै दी शुंआरा अर तेऊए सैना संघै जुधा करना कठा हंदै। 20सह पशू अर तेऊ संघै सह झ़ुठै गूर बी ढाकअ, ज़ुंणी तिन्नां सम्हनै नछ़ैण रहैऊऐ तै, ज़ेता करै तेऊ तिंयां धोखै दी पाऐ तै ज़हा दी तेऊ पशूए छ़ाप ती अर ज़ुंण तेऊए मुहुर्तीए पूज़ा करा तै, ईंयां दूई पाऐ ज़िऊंदै-ज़िऊंदै ई तेऊ आगीए समुंदरा दी ज़ुंण गंधका करै ज़ल़ा।#प्रका. 20:2
21तेखअ ज़ुंण सह शेतै घोल़ै दी शुंआर त तेऊ पाऐ तेऊ पशूए सारी सैना आपणीं तलबारा करै मारी ज़ुंण तलबार तेऊए खाखा का निखल़ा ती। काअ-गरली चुटी तिन्नें ल्हासा खांदै ज़ुंण मारी पाऐ तै अर तिंयां सोभ रज्ज़ै।
Seçili Olanlar:
प्रकाशन 19: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.