इब्रानी 13
13
मसीही ज़िन्दगी ज़िऊंणें सलाह
1आप्पू मांझ़ै डाहणीं भाई-बैहणी ज़ेही झ़ूरी। 2ज़हा विश्वासी भाई संघै तम्हां पैहली बारी भेत-बछ़ैण हआ तिंयां निंणै ज़रूर आपणैं घअरा लै प्राहुंणैं। किल्हैकि इहअ करै आसा कई लोगै स्वर्ग दूत बी प्राहुंणैं निंयैं दै।#1 पत. 4:9; मूल. 18:1—19:3
3कैद हुऐ दै विश्वासीए हेर-सभाल़ बी करा एही समझ़ी कि तिन्नां संघै आसा तम्हैं बी कैद, अर ज़हा संघै लोग विश्वासी हणैं पिछ़ू बूरअ बर्ताअ करा, तिन्नें करा इहअ समझ़ी हेर-सभाल़ ज़िहअ कि अह आसा म्हारी आपणीं देही।
4बैहो करनअ सोभी अदर, अर आपणीं ज़िन्दगीए साथी संघै रहणअ शुचै-पाक्कै अर नर्दोश किल्हैकि परमेशरा दैणीं कंज़रै अर पराई बेटल़ी सेटा डेऊणैं आल़ै लै सज़ा।
5थारअ सभाब निं ढब्बैओ मांण करनै आल़अ लोल़ी हुअ। ज़ुंण तम्हां का आसा तेता ई दी रहा खुश। किल्हैकि परमेशरै आसा आप्पै इहअ बोलअ द,#भज. 37:25; बधा. 31:8; ज़ैह. 1:5
“मुंह निं तम्हैं कधि कल्ही शोटणै
अर हुंह निं तम्हां लै दैणअ कधि बिस्सरदअ।”
6तैही एछा हाम्हां इहअ बोल़णें हिम्मत,#भज. 27:1; 118:6
“मेरी फाज़त करनै आल़अ आसा परमेशर,
तैही निं हुंह डरदअ आथी।
संसारे मणछ निं मेरअ किछ़ै बगाल़ी सकदै।”
7ज़ुंण थारै सैणैं तै, अर ज़ुंणी तम्हां लै परमेशरो बैण आसा खोज़अ द, तिन्नां डाहा आद कि तिन्नैं आपणीं ज़िन्दगी केही ज़िऊई अर तिंयां किहै रहै मरनै तैणीं शुचै-पाक्कै। तैही लागा हाम्हां बी तिन्नां ई ज़िहअ करनअ।
8प्रभू ईशू मसीहा आसा हिझ़, आझ़ अर जुगै-जुगै ज़िहअ कै तिहअ।#भज. 90:2; प्रका. 1:8; ईशा. 41:4
9किल्हैकि ईशू मसीहा आसा हर बगत तिहअ ई, तै निं नऊंईं गल्ले अर होरी रंगे शिक्षे ज़ाणैं लागी। तम्हां लै एछा परमेशरे झींणा करै शगती। नां कि खाणैं पिणें बारै बधान बणाईं करै। तिंयां खाणैं पिणें च़िज़ा करै निं असली दी तिन्नां किछ़ै फाईदअ हंदअ ज़ुंण तिन्नां खाआ।
10ज़ेथ मसीहा बल़ीदान आसा हुअ द सह बेदी आसा म्हारी, तेता प्रैंदा का खाणेंओ हक निं तिन्नां मणछा बी आथी, ज़ुंण यहूदी पराणैं बधाने साबै अज़ी बी बेदी दी बल़ीदान करी भबनै च़ाकरी करा। 11किल्हैकि पैहली करारे साबै हर साल ज़हा पशूओ लोहू माहा प्रोहत पाप माफी लै बल़ीदान करी खास पबित्र ज़ैगा लै निंयां, तिन्नें ल्हास पाआ खिम्भा बागै ज़ाल़ी। 12ईशू मसीहा बी ज़िरै एरुशलेम नगरीए प्रऊल़ी बागै दुख, ताकि सह आपणैं लोहू करै सोभी लोगा पबित्र करी सके। 13एछा, ऐबै छ़ाडणअ हाम्हां बी यहूदी मणछो पराणअ रबाज़ हाम्हां डेऊणअ मसीहा सेटा, हाम्हां दैणअ लोगा म्हारी बेइज़ती करनै ज़ेही तिन्नैं ईशूए बेइज़ती किई।#लूक. 6:22
14किल्हैकि एऊ संसारै निं हाम्हां का इहअ घअर आथी ज़ुंण सदा लै रहणअ। पर हाम्हैं आसा तेऊ सदा रहणैं आल़ै घअरा न्हैल़ै-भाल़ै लागै दै ज़ुंण हाम्हां आजू भेटणअ।
15तै करनी हाम्हां आपणैं होठा करै परमेशरे स्तोती। अह आसा म्हारअ तेऊ लै बल़ीदान।#भज. 50:14,23; होश. 14:2 16हर बगत रहणअ दुजै लै भलै कामां करदै लागी आपणीं हर गल्ला करनी तिन्नां लै दैई ज़हा ज़ेते ज़रुरत आसा। किल्हैकि इहै कामें बल़ीदाना करै हआ परमेशर खुश।
17विश्वासा दी ज़ुंण थारै सैणैं आसा, तिन्नें शूणां ज़िहअ तिंयां बोला तिहअ, अर रहा बी तिन्नें डरा हेठै। किल्हैकि तिंयां आसा थारी हेर-सभाल़ करदै लागै दै कि तम्हैं कबाता नां पेठे। तिन्नां लागा आपणैं कामों साब-कताब परमेशरा सेटा दैणअ, कि तिंयां एऊ कामां खुशी-खुशी करे नां कि दुखी हई करै। नांईं ता तम्हां निं किछ़ै फाईदअ हणअ।#1 थिस. 5:12-13; शधा. 20:28
18हाम्हां लै बी रहा परमेशरा का प्राथणां करदै लागी। किल्हैकि हाम्हां आसा भरोस्सअ कि म्हारी सोर-समझ़ आसा शुची अर हाम्हैं च़ाहा सोभी गल्ला करै परमेशरा खुश करनअ। 19हुंह च़ाहा इहअ कि तम्हैं करै मुल्है प्राथणां कि हुंह तम्हां सेटा लै एकी बारी भिई एछी सकूं।
20ईशू आसा म्हारी तैणीं,
सह बच़ाऊआ हाम्हां अर सह करा म्हारी एही हेर-सभाल़ ज़िहअ एक फुआल आपणीं भेडे करा।
म्हारै मन्नैं शांती दैणैं आल़ै परमेशरै किअ प्रभू ईशू मरी करै ज़िऊंदअ।
इहअ करी किई परमेशरै हाम्हां लै सदा रहणैं आल़ी करार मसीहे क्रूसा दी बहाऊऐ दै लोहू दी प्रगट।#जोह. 10:11; शधा. 2:24; रोम. 15:33
21हुंह करा परमेशरा का प्राथणां कि तम्हां हरेक भली गल्ला लै सिध्द करे, ईशू थारी तिहअ करना लै मज़त करे ज़ेता करै परमेशर खुश हआ।
ईशू मसीहे बड़ैई लोल़ी जुगै-जुगै हंदी रही। एवमस्तू।
22भाईओ, मंऐं लिखी थारी हिम्मत बढाऊंणा लै च़िठी दी थोल़ी ज़ेही गल्ला, हुंह करा तम्हां का अरज़ कि मंऐं ईंयां गल्ला ज़ुंण बोली एता समझ़ै बडै धैन-मन्न लाई।
23हुंह च़ाहा कि तम्हां का लोल़ी थोघ लागअ कि विश्वासा दी म्हारअ भाई तिमोथी गअ कैद खानै का छ़ुटी, ज़ै सह मुंह सेटा छ़ेक्कै एछे, तै आणू हुंह तेऊ आप्पू संघै तम्हां सेटा लै मिलदअ।
24आपणैं सोभी सैणैं अर सोभी पबित्र लोगा लै दै मुंह बाखा राज्ज़ी-खुशी, इधी एऊ इटल़ी देशै रहणैं आल़ै विश्वासी भाई बी आसा दैनी दी तम्हां लै राज्ज़ी-खुशी।
25हुंह करा प्राथणां कि तम्हां सोभी लै लोल़ी परमेशरे झींण हंदी रही। एवमस्तू।
Seçili Olanlar:
इब्रानी 13: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.