O YOSUA 9
9
O Gibeon manyawa iwi tipu o Yosua
1O abari mangale o Israeloka yöutumu yödogilianga hiädono o kokoanoika mata-mata o Yordan ma Ngairi o wange madumuniha i daduoka – il̄ol̄oku-l̄okuika, ol̄oku matimino, deʼ o tönaka irata-rataka o Ngöto i Kokoröna o gahi madatekino hiädono ima tëro magurutika deʼ o Libanon mal̄oku o koremieuku; enagënanga o Amori, o Kanaan, o Feris, o Hewi deʼ o Yebus ma kokoano. 2Mata-mata o kokoano gënanga imateke fakati deʼ i ma kodogo la yäparangi nao Yosua deʼ o Israel manyawa.
3Mä o Gibeon manyawa o Hewi manga hoanino yoihenoka mangale okianaga wadodiai o Yosua o Yerikho deʼ o Ai makotaika. 4Daha önanga ya pütuhu la i wi tïpu o Yosua deʼ i hibärene toönanga manga keledail̄e: o kärongo madëka-dëkanuku, deʼ o angguru mangï o aiwani makai madodorou. Deʼ hokä biläono, önanga ya sadia o roti itöre-töreoka deʼ igüfa-güfaoka. 5Onanga yapäke o pakeanga makäkäkihi inoli manga hapato itotoröuoka deʼ itapa-tapaika. 6Deʼ madodagi hokogënanga önanga yöiki imakamäke deʼ o Yosua manga tau madoomuoka o Gilgal madaeraoka daha i witëmo unangika deʼ o Israel manyawaika, ”Ngomi o berera ma gö gurutoka deʼ miaino mimau miadiai o jaji dede ngini Tüa-tüanga.”
7 #
Kel. 23:32, 34:12; Ul. 7:2 Mä o Israel manyawa yäto, ”Mangale okia ngomi miadiai o jaji dede ngini? Mudukua tingini niaberera nenangoka naga dika ima hitigi-tigino!”
8Onanga yato, ”Ngomi deʼ miahininga mahuka miadiai okia dika Tuanga nohipareta.”
”Ngini o nagona? Deʼ o berera okia manyawa?” o Yosua wä leha onangika.
9Onanga yohäluhu, ”Ngomi o berera duru magögurutoka deʼ miaino, Tuanga, karana ngomi mi ihene mangale ma Jou o Jou Madutu niwihö huba-huba Tüa-tüanga. Ngomi mi ihene mangale mata-mata Wadodiai o Mesir mabereraka, 10#Bil. 21:21-35 deʼ mangale okianaga Wadodiai o Amori manga koanoika yahinoto o Yordan mawange mahiwaröko, enagënanga o Sihon o Hesybon ma koano inoli o Og o Basan ma koanoino yogögögere o Asytarot mabereraka. 11O tutüda-tutüda deʼ yongödumu tongomi miaberera manyawa imï hüloko ngomi miaino nenangino mimaka mäke de de ngini Tüa-tüanga, deʼ mihinyata ngomi mimaponu mihidöaka nginika Tüa-tüanga. Hababu gënanga, ngomi migähoko niahininga mamura Tüa-tüanga la niadiai o jaji dede ngomi. 12Abeika Tüa-tüanga niolëga, o roti tongomi mia biläono nënanga. Maöraha ngomi mimäjobo, o roti nënanga kamahau-haukohi. Maöraha nënanga, nia mäke! I tore oka deʼ i gufaka. 13Deʼ mia angguru mangï nënanga kama hungi-hungiohi maöraha miadol̄a; maörahanënanga, niamäke! Ikäkakihoka. Tongomi mia parangi deʼ tongomi mia hapato ma i torou oka karana mia dodagi ma gö gurutika nënanga.”
14Done o Israel manyawa yatarima mahuhütulu o Gibeon manyawa manga ïnomo gënanga, deʼ koyolehaua ma Jouika yakorona o hali gënanga. 15O Yosua wodiai o jaji ima kohöbata deʼ o Gibeon manyawa gënanga, deʼ wojaji kowätömaua önanga. O Israel manyawa manga tutuda-tutudaö, yoköboto la yaganapu manga jaji gënanga.
16-17Mä inyata, o wange hangeoka o jaji gënanga yadiai deʼ iböto, o Israel manyawa yakunoka yädono o Gibeon makota, o Kefira, o Beerot deʼ o Kiryat-Yearim o nyawa geönanga manga daera ika. Done dahaö ihiöriki toönanga manga berera ikurutikaua deʼ o Gilgal. 18Mä o Israel manyawa yakunua yätöma önanga, hababu o Israeloka manga tutüda-tutüda yokobotoka onangika, deʼ ma Jou o Israeloka manga Jou Madutu Ai römanga yongödumu o Israel manyawa yokurübungu yakorona o hali gënanga toönanga manga tutüda-tutüdaika. 19Mä o tutüda-tutüda gënanga yohäluhu, ”Abeika hasarakia! Ngomi mijajioka onangika deʼ o köboto deʼ ma Jou o Israeloka manga Jou Madutu Airömanga. O öraha nënanga yakunua ngone hodiai i totoröu onangika. 20Ngone yakunua hä töma önanga hababu ngone hojajioka; deʼ nako ngone hatiläkuru o jaji gënanga ma Jou Madutu aha wonä hükumu ngone. 21Hoʼ hämal̄aika önanga yowängo, mangone mata-mata hädiai önanga nanga gota yobëla-bëlaka deʼ nanga akere yomoku-moku mangale ngone mata-mata.” Hoko gënanga ihidöaka o nasihati o tutüda-tutüda gënanga.
22Daha o Gibeon manyawa gënanga yä ähoko i wï hïmanga o Yosua. O Yosua wätemo, ”Yadodoa hö ngini nimï ëluku ngomi deʼ niato niaberera duru kahägurutika? 23Karana ngini niadiai hokogënanga, ma Jou Madutu winïhükumu ngini. Niahöana deʼ niaberera aha salalau yodadi o giläongo, o gota yobëla-bëlaka deʼ o akere yomoku-moku mangale ahi Jou Madutu Ai Tau.”
24Onanga yohäluhu, ”Ngomi midiai hokogënanga karana ngomi miihene ma Jou o Jou Madutu Tüanga nïhuba-huba gënanga wïhulokoka o Musa, aigiläongo gënanga wohidöaka ngonaika Tüanga o berera nënanga mata-mataika deʼ nätöma mata-mata maberera manyawa maöraha Tüanga nal̄ë o berera gënanga. Ngomi duru miömödongo nako ngomi i mïtöma, gënanga mahababu ngomi midiai mata-mata nënanga. 25Orahanënanga ngomi ani kuaha magoronaka Tüanga. Ngomi nomihidiai imöteke Tüanga nö lëga-lëga yaoa.” 26Done nënangadoka o Yosua wodiai ünanga wögöana o nyawa geönanga deʼ wohigumal̄aua o Israel manyawa yätöma önanga. 27Mä önanga i mä giläongo – enagënanga o gota yo bëla-bëlaka deʼ o akere yo moku-moku mangale o Israel manyawa deʼ mangale ma Jou Aihuhuba mangï. Hiädono o örahanënanga önanga kayadiaiohi o karajänga gënanga o ngï ma Jou wairi-irikoka idadi o puji mangï Unangika.
