O YOSUA 8
8
O Ai makota yaöra deʼ yawëdere
1Ma Jou wïtemo o Yosuaika, ”Nä toomu anitentara mata-mata, deʼ moiki dede önanga o Ai makotaika. Uha anihininga ihuha deʼ uha nohawana! Ngohi aha tohidöaka ngonaika nïutumu o Ai manga koano. Aikawaha, aikota, deʼ aiberera aha ngona naora. 2O Ai deʼ ma koano kokiani nahidiai hokä o Yerikho deʼ ma koano nähidiai kahuruono naga. Mä nënanga mamoi mabara-baranga deʼ ma aiwani o gigini yakunu ngini nimä l̄ë nimahi tingini. Ni na hidiai la niaparangi o kota gënanga nia hi todokanika manga poretino niä böa.”
3Done o Yosua womahidiai la wöiki o Ai makotaika kamamoi deʼ aitentara mata-mata. Unanga wäiriki yaribuhu moruange yopoparangi duru maoa-oa, daha wähüloko önanga o hutu-hutu, 4deʼ wahidöaka onangika o pareta nënanga, ”Nimangiunu doka mahönonga o kota gënanga, mä uha kalioli nikurutika; deʼ nimahidiai hupaya niäparangi. 5Ngohi deʼ ahingoha-ngohaka aha mi mahitigi o kotaika gënanga. Nako o Ai manyawa yohupu la imï lawani ngomi, ngomi aha mima idulu deʼ mi piringana hokä kahuruono naga. 6Onanga aha i mï ginïki ngomi gila-gila hiadono magurutika de o kata genanga, de yato bote ngomi hiöara mia diri hokä kahuruono naga. 7O öraha gënanga ngini kokiani nihupu nia ngingiunoka, deʼ niä ora o kota gënanga. Ma Jou nia Jou Madutu aha wahilapahi nginika. 8Nia ora deʼ iböto, nia tuhuku o kota gënanga, i ma moteke deʼ ma Jou wohipopareta. Gënanga nia manarama.” 9Deʼ ipaha o Yosua wahüloko önanga, deʼ önanga yöiki i ma ngiunu o Ai o wange madumuniha o Betel deʼ o Ai mahidogorona, daha yotamä genangokadau. Mä o Yosua woma hiduhutu o Israel manyawa manga tau madoomuoka.
10Duru o ngoru-ngorumini o Yosua womömiki deʼ wahipareta aitentara maduduono hupaya imatoomu. Deʼ ipaha ünanga deʼ o Israel manyawa manga tutuda yäao o tentara maduduono gënanga o Ai ika. 11O tentara maduduono gënanga kamamoi deʼ o Yosua yotagi yodümutu o Ai makota mangorana ikökua-kuata, daha imä tau o koremieuku idaduoka, kiaka yamäke moi o wai önanga deʼ o kota gënanga manga hi dogorona. 12Manga ngöe donehö yaribuhu motoa wähulokoka ima ngiunu o wange madumuniha idaduoka deʼ o kota gënanga, o Ai deʼ o Betel mahidogorona. 13Hoʼ, madätoro o tentara maduduono yopoparangi gënanga yatatoro hokä hoko nënanga: O tentara mabälu-bäluhu manga ngï i kokua-kuata ihi gögere o koremieuku idaduoka deʼ o kota gënanga deʼ o tentara manga duduono mahomoa o wange madumuniha i daduoka, enahïoko o Yosua wöiki o waiika o hutu gënanga. 14Hoko gënanga o Ai manga koano wämake o Yosua ainyawa manga duduono, tai-taiti ünanga wo dailako. Unanga deʼ ainyawa mata-mata yohupu yodumutu o Yordan mawai la yäparangi o Israel manyawa manga ngï ihira-hiraka. Unanga wohiorikua mahutuohi ünanga aha iwi parangi aiporetino yöböa. 15O Yosua deʼ ainyawa manga duduono imadiai hokä önanga magogiria yodohuku; önanga yopiringana yamëta o daera matonaka ikokakaha. 16Mata-mata o nau-nauru o Ai makota magoronaka wä toomu la yäginïki na o Yosua deʼ aiduduono gënanga. Mä iholoi önanga yä ginïki nao Yosua, önanga iholoi yokurutika deʼ toönanga mangakota. 17Mata-mata o Ai manyawa yohupu la yäginïki o Israel manyawa, hiädono o kota gënanga yamal̄aika ihelengaika hokogënanga dika, komoiua magogöana.
18Deʼ ipaha ma Jou wïtemo o Yosuaika, ”Nagöraka anikuama deʼ nohitumutika o Ai makotaika; o kota gënanga To hilapahi ngonaika o örahanënanga.” O Yosua wadiai ma Jou aipareta gënanga. 19Hoko gënanga o Yosua wohitumutika aigiama, aitentara maduduono ima ngïu-ngïunika gënanga ima tai-taiti ima oko deʼ yaparangi o kota gënanga, daha yaora. Ihi gila-gila önanga yatühuku o kota gënanga. 20-22O Ai manyawa imälëga manga poretöko, deʼ yamäke o nöfo ikuhühulu hiädono o dihangil̄e. O Yosua deʼ aitentara maduduono yamäke o nöfo deʼ yanako o tentara maduduono mahomoa yaoraoka o kota gënanga. Hoʼ, o Yosua deʼ aitentara maduduono imaidulu mangale yaparangi deʼ yätoma o Ai manyawa. O Israel manyawa o Ai makotaka gënanga mayoböa deʼ ima himoteke yoparangi, hiädono o Ai manyawa yahigilolitöka deʼ yakunua manga diri ihiöara. Onanga ka o nyawa moi ö ma yootanua, mata-mata yohönenge o Israel manyawa yätoma, 23sowaliua o Ai manga koano. Unanga iwï tägoko daha iwiao wïhïmanga o Yosua.
24O Israel manga tentara maduduono yätöma yamata-mataka manga haturü manga tentara yägoginïki önanga o tönaka ikokakahaka deʼ ibötoönanga imaidulu o Ai makotaika, deʼ yätöma mata-mata manyawa dokengoka. 25-26O Yosua kahokogenangika dika wohitumutika aikuama mamëta o Ai makotaika, deʼ kowohigutiua hiädono o Ai ma nyawa mata-mata yätomaka. O wange genangö yongodumu o Ai yogögögere yohönenge manga ngöe yäribuhu ngimoi deʼ hinoto, deʼ o ngongoheka. 27O aiwani o gigini deʼ o bara-baranga yaora-ora o kotaka gënanga, o Israel manyawa imä l̄ë imahitoönanga, imamöteke deʼ ma Jou wahëto-hëtongo o Yosuaika. 28O Yosua wa tühuku o Ai makota, deʼ wodogumal̄aika idadi o kota mangëdere hiädono o örahanënanga. 29O kota gënanga ma koano iwinuneuku o liateoka, deʼ iwïdo gumal̄aika genangokadau hiädono o bimaoa. Maöraha o wange deʼ itumunu, o Yosua wä hüloko yal̄ë o mayeti gënanga deʼ yaumo o kota mangorana ilägo-ägomo mahimangoka. Deʼ ipaha o ngï gënanga yödopörono o helewo duru kahängöe. O helewo-helewo gënanga enanagaohi dokengoka hiädono o örahanënanga.
Ma Jou Ai tita yabasa o Ebal mal̄okuoka
30 #
Ul. 27:2-8
Deʼ ipaha o Yosua wohigoko o huhuba mangï o gahumu moi o Ebal mal̄okuoka mangale ma Jou, o Israeloka manga Jou Madutu. 31#Kel. 20:25 O huhuba mangï gënanga wadiai ima möteke deʼ o hidumutu-hidumutu o Musa ai Buku magoronaka, ma Jou Aigiläongo gënanga, o Israel manyawaika: ”O gahumu moi o huhuba mangï o helewo komaiwahi yakarajanga deʼ o pakakäha o behi.” O huhuba mangï gënanga mal̄okuoka o Israel manyawa ihihuba ma Jouika: o huhuba ya tö tühu-tühuku deʼ toönanga manga dame ma huhuba ö. 32Dokengoka, deʼ o Israel manyawa yohakihi, o Yosua wohitülihi o huhuba mangï mahelewoika gënanga ma Jou Ai tita yauti-utioka naga yamäke o Musa ai Buku magoronaka. 33#Ul. 11:29, 27:11-14 O Israel manyawa, deʼ o tutüda-tutüda, o tentara manga bälu-bäluhu, o haki-hakimi, deʼ o nyawa maporetino ö yogögögere toönanga manga hidogoronaka, ima okoino, yöari hohönonga ma Jou Ai Jaji ma Peti yöhimangika o Lewi ma imam-imam yamö moku-moku o Jaji ma Peti gënanga. Ma hönonga deʼ hagala o Ebal mal̄okuika. O Musa ma Jou Aigiläongo gënanga, wohiparetaka hupaya önanga yadiai o hali gënanga nako maöraha yädono mangale önanga yatarima o barakati ma Jou wahijäjajioka. 34Deʼ ipaha o Yosua wabasa wakua-kuatil̄e ingodumu o tita imamöteke deʼ i tö tuli-tulihi o Tita ma Buku magoronaka, yöngohama hagala o barakati deʼ hagala o lolai. 35O Musa aipareta magëtongo o Yosua wädabasa yöngödumu o Israel manyawaika, yangöhama o ngongoheka, o ngoha-ngohaka, deʼ hagala o nyawa o dagi-dagino yogögögere toönanga mangahidogoronaka.
