O YESAYA 45
45
Ma Jou wigoraka o Kores
1Ma Jou wiirikoka o Kores wodadi o koano;
ünanga witumutu mangale wahohihanga o hoana de o berera maago-agomo
deʼ mangale watobiki mangakuaha o kokoano.
Ma Jou aha wahelenga o kota mangorana maago-agomo unangika,
koiwa moiö i gogogere ibenoino.
Unangika ma Jou wïtemo,
2”Ngohi aha tohidiai o ngekomo ngonaika;
ol̄oku deʼ o doporono aha Tohirata,
o ngora-ngorana o tabaga aha Tawedere,
deʼ madudukuru o behi Tatobiki.
3Done ngona ahaTonihidöaka
o arata o kaya iö iu-iunu,
hupaya ngona nohioriki Ngohi o Jou, o Israeloka manga Jou Madutu,
woniahokoka ngona de aniromanga.
4Ngona toniahoko deʼ Tonihidöakaohiromanga,
ngaroka ngona nohinakoua Ngohi.
Tonihimanarama ngona nariwo o Israeloka Ahigilaongo,
hababu önanga Ahingongiriki manyawa.
5Ngohi o Jou koiwa mahomoa,
Ngohi ma Jou Madutu Toma Tengo-tengoka.
Ngona Tonihidaeoka,
ngaroka ngona nohinakoua Ngohi.
6Hagala moi-moi gënanga Tadiaioka
hupaya o wange mahiwaroko hiädono o wange madumuniha mata-mata o nyawa ihioriki Ngohi ma Jou, mahomoa de Ngohi koiwa naga o gikiri mahomoa.
7Ngohi tohidadadi o dararono deʼ o huhutu,
Ngohi tohiboa o barakati deʼ o bodito.
Ngohi o Jou tadodiai mata-mata gënanga.
8O dihangoka de yauku Tohiguti o utumu hokä o awana,
o dunia yahelenga madiri mangale yatarima,
daha ihiwango o halamati deʼ o bebasi;
Ngohi o Jou todiai gënanga idadi.”
Ma Jou o alami ingodumu wakokuaha deʼ o sejara watatatoro
9 #
Yes. 29:16; Rm. 9:20 Yobodito o nyawa imalawani de wahidadadi;
ünanga hokä o bohoko iwilawani o nyawa wadodiai.
Boteka o tonaka matau-taulu iwi leha o bohoko wododiaika,
”Ngona magogiria okia nodiai?”
Boteka o bohoko imaliwolu
wadodiai koiwa to ünanga ai sawaro?
10Wobodito o nyawa wotemo aidimonika,
”Yadodoa ngohi ihihingohaka hokonënanga?”
11O Jou, o Israeloka manga Jou Madutu wotebi-tebini wotemo,
”Nohi leha Ngohi yakorona o öraha mahimangika.
Mä uha näleha mangale Ahingoha-ngohaka,
ekola nohihuloko Ngohitodiai okianaga moi.
12Ngohi o Jou tohidadadi o dunia,
deʼ tahidadi o nyawa mangale yögogere.
De ahikuaha Ngohitohihohe o dihanga,
deʼ tapareta o wange malako,
o mede deʼ hagala o murumu.
13Ngohi tihimomiki o Kores
mangale wadiai Ahi dungutu
deʼ wohigoko o adili.
Ngohi ahatohirata mata-mata o ngekomo wanononu.
Unanga aha wohigokookali o Yerusalem makota
deʼ wahibebasi Ahiumati yatumu-tumunguku,
koiwa maurubokumu deʼ koiwa mabobangu.”
Ma Jou Duru wo Kokuaha wotemoka.
14Ma Jou watemo o Israelika,
”Nimahitingini o Mesir matonaka mahasili deʼ o Sudan mautumu.
Hagala o Syeba manyawa yopoputurungu idaditingini;
önanga imadagi nia poretino manga ranteoka.
Onanga aha yatilabuku deʼ imangaku,
’ma Jou Madutu igou-goungu niahidogoronaka;
koiwa o gikiri mahomoa de Unanga!
15Ma Jou Madutu wohihohalamati o Israel
ganga ma Jou Madutu wangö ngiu-ngiunu Aidiri.
16Mata-mata o nyawa yododiai o gomanga madulada;
aha wahimal̄eke deʼ wähikauku.
17Mä o Israeloka wahihalamati ma Jou;
aihalamati aha kahirahi.
Ngini aha winihimal̄ekua deʼ winihikaukuua
hiädono kahiado-adonika.’ ”
18Ma Jou wohidö dadadi o dihanga,
Unanga ma Jou Madutu!
Unanga wohidadi deʼ watüku o dunia,
wadiai iputurungu deʼ kahirahi imaokoino.
Unanga wohidadiua o ngï kairïdika,
mä o ngï mangale yogogere.
Unanga wotemo,
”Ngohi o Jou, deʼ koiwa mahomoa.
19Ngohi totemoua de kataiu-iunu,
ekola madodagi irorahasia.
Ngohi tahulokua Ahiumati o Israeloka ihilingiri Ngohi de kaparahaja.
Ngohi, o Jou, totemo madiai,
deʼ tohingahu okia magoungu.”
Ma Jou Duru wokokuaha deʼ o Babel manga giki-gikiri
20Ma Jou wotemo, ”Nimatoomu deʼ niboa nimakinïki,
ngini mata-mata nio ota-otana o hoana de o berera ma ago-agomo manga hidogoronaka!
Yobodo hagala o nyawa yao ihiduono o dulada o gota,
deʼ imaniata o giki-gikirika yakunua yahihalamati.
21Niao perekara, nihihimanga manyonyata-nyonyata,
yämal̄aika önanga imakinïki ihidailako.
O nagona ihiabari o hali gënanga
deʼ ihingahu maöraha kahuruonika?
Koigoungua Ngohi, ma Jou?
Koiwa o gikiri mahomoa de Ngohi.
Ngohi ma Jou Madutu toadi-adili deʼ tohi Hohalamati,
koiwa mahomoa sowaliua Ngohi!
22Hei, dunia manyawa ningodumu,
nimaidulu Ngohino hupaya ngini inïhihalamati,
hababu duga-duga Ngohi ma Jou Madutu, koiwa mahomoa!
23 #
Rm. 14:11; Plp. 2:10-11 Ngohi tojajioka, deʼ Ahijaji aha tadohukua;
mangale Ngohimahirete Ngohitokoboto:
Moi-moi o nyawa ahayatilabuku Ahihimangoka,
deʼ manga demo mahirete magoronaka
yojaji mangale yosatia Ngohino.
24Hagala o nyawa yotemo,
’O adili deʼ o kuata duga-duga ma Jouino!ʼ
Mata-mata o nyawa ihïdoha-dohata Ngohi ahayoboa Ngohino deʼ yamake o mal̄eke.
25Mä o Yakub aidifauku aha yahihalamati,
deʼ önanga aha ihihigiriri Ngohi, ma Jou.
