O YESAYA 44
44
O Jou ma Jou Madutu woma Tö Tengo-tengoka
1O Jou wotemo, ”Noihene, hei Yakub ahigilaongo,
hei Israel, o umati Tiniiri-iriki!
2Ngohi ma Jou tonihidadadi ngona,
tonituku ngona mamulaenge ngoni ayo ami mamataokahi,
deʼ toniriwo ngona.
Uha nohawana, ngona Ahigilaongo,
o umati Toniiri-iriki Tonïhohininga.
3Hababu Ngohi aha tohituagi o akere o tonaka madü dudungika,
deʼ tohihahuru o ngai-ngairi o tonaka matore-toreoka.
Ngohi aha tohidöaka Ahikuaha anidifauku,
deʼ tahibarakati ani ngohaka de ani danongo.
4Onanga aha yowango yoburere hokä o momo o akere madatekoka,
hokä o gandarusa mautu o ngairi madatekoka.
5Moi-moi aha imangaku manga diri Tongohimadutu,
deʼ yoboa imahi dogo de o Yakub aidifauku.
Moi-moi yatulihi manga giamoka: Toma Jou Madutu,
deʼ ya hetongo manga diri ma Jou Madutu Aiumati manyawa.”
6 #
Yes. 48:12; Him. 1:17, 2:8, 22:13 Nenanga aidemo ma Jou Duru Wokökokuaha,
o Koano deʼ o Israeloka mangahohohongo,
”Ngohi ma Jou Madutu Toma Tengo-tengoka,
madodihiraka deʼ mabobahaka.
7O nagona hokä Ngohi? Niwihuloko ünanga womangaku!
Mal̄aika ünanga wohingahu deʼ wohinyata Ngohino!
O nagona ihidodemoka o öraha mahimangika
öraha mamulaenge hiädono o öraha mabaha?
8Ahihoana de ahiberera, uha nihawana ekola inïtodokana;
koigoungua kahuruonohi de yaino hiadono o öraha nënanga Ngohi tohidodemoka okia idödadadi? Nginila Ahi hakihi-hakihi.
O hohohongo mahomoa koiwa deʼ tanakoua.”
Yahuba o dulada ganga o manarama madorou
9Hagala o nyawa yododiai o gomanga madulada gënanga yobaragunaua, deʼ hagala o gikiri önanga yapuji-puji gënanga ifaidaua. Hagala o nyawa yahuba-huba o dulada gënanga yopiloko deʼ okia-kiaua ihioriki, hababu gënanga önanga aha yamake omal̄eke. 10Parahaja yodiai o dulada yao ui-uihi deʼ yahuba hokä o gikiri! 11I goungu, mata-mata o nyawa yahö huba-huba o dulada yamake o mal̄eke. O nyawa yododiai o dulada gënanga o nyawa biaha. Nahuloko önanga yotagi manga himangika imakinïki; maraioka ahayohawana deʼ yämal̄eke.
12O behi wotututuku wal̄e o behi madobiki daha watuku o uku magoronaka deʼ watutuku de o tataka. Unanga wokarajanga de hagala aikuata naga unangoka. Wokarajanga magogiriaoka, ünanga idadi iwihahini, aikiriti madudungu, deʼ iwibole.
13O tau wododiai watuga o gota. Unanga watulada maduku de o kapuru, wagarade de aipakakaha deʼ wohidadi o nyawa madulada marorahai, dahawohigogere ai tau magoronaka. 14Mudukua o gota wapö pake-pake ma ahali o liwewuru mautuino, o eru mautu ekola o terpentin mautu watö tola-tolanga o honganoka. Mudukua o ünanga wodatomo o Salam mautu daha wodama hiädono o awana yadiai iwango. 15-17O hidoku moi o gotaino gënanga ihidadi o gota ihi dofo-dofo mangale imahirauku deʼ imahiharongo o roti deʼ imahi nofo o hiode maakeme, daha ünanga iwiwedonoka? Unanga womarauku deʼ wotemo, ”Uwe, itiai kaharahai deʼ hatoli mahauku! Igoungu yasanangi o uku nënanga!” O gota gënanga mahou wapake mangale wadiai o dulada. Unanga womaponu wahuba deʼ womäniata, ”Ngona ahigikiri, nohihihalamati ngohi!”
18Igoungu yobodo hagala o nyawa hoko gënanga! Onanga yatamunu manga lako deʼ toönanga mangahininga hiädono okia-kiaua imangarati. 19Wododiai o dulada gënanga wapikiri wadonikaua, ”O gota gënanga o hidoku moi tatuhuku, deʼ makuru tapake mangale tohiharongo o roti deʼ tohil̄ofo o hiode ma akeme mangale ahi inomo. Daha mahou o gota gënanga tohidadi o dulada. Ho öraha nënanga ngohi tahuba o gota madobiki!”
20O manarama gënanga kaimatero dika de yaol̄omo o kafo. O nyawa gënanga iwihirehene mangale aipikiringa ibodo-bodo, hiädono ünanga iwiriwo yakunokauaoli. Unanga wakunua wohigoungu o dulada naga aigiamoka gënanga o tipu mata-mata.
Ma Jou, wohidä Dadi deʼ wohi Hohalamati
21Ma Jou wotemo,
”Nohininga mata-mata nënanga, hei Israel,
hababu ngona Ahigilaongo.
Ngohi tonitüku ngona, deʼ ngona Ahigilaongo,
Israel, Ngohi aha toniwohangua ngonaika!
22Anihowono Taduhu hokä o lobi,
ani baradoha Tabirï hokä o lobi itaro-taromo.
Noma idulu Ngohino,
hababu Ngohi tonihi bebasoka ngona!”
23Nohi ulili o morene, hei o dihanga,
noma uli-ulili, hei o dunia magoronaka mahidoku!
Nohi ulili o morene, hei hagala ol̄oku!
o honganö deʼ o gota yogetongo magoronaka!
Hababu ma Jou wohi dumutoka Ai mulia
de wätuhuku o Israeloka Ai umati.
24Hoko nënanga wotemo ma Jou wo nihihohalamati
wonituku ngona maöraha ngoni ayo ami mamata magoronaokahi,
”Ngohi o Jou tohidadi hagala moi-moi,
toma tengo-tengo tohihohe o dihanga,
deʼ koiwa ahi roriwo tohidadi o dunia.
25Ngohi aha taiki yomai-maihi mangamaihi,
deʼ tomahi gogule yogögogumatere.
O nyawa yososawaro mangademo-demo talawani,
toönanga mangasawaro tohidadi mangabodo.
26Ngohi tohikuata Ahigilaongo ai demo,
deʼ tadiai o datoro wohinyö nyata-nyata Ahihuhuloko,
Ngohi totemo o Yerusalem aha yogogeroli,
deʼ o Yehuda makota-kota aha Tohigokokali;
itotoropahuku aha tohidiai.
27Ngohitotemo o ngöto mabuku ukuika: Noowaha!
Ngohi tomau tadudungu aningai-ngairi.
28 #
2Taw. 36:23; Ezr. 1:2 Ngohi totemo o Koresika,
’Ngona ahanapareta Ahiumati,
deʼ nadiai hagala Ahimau.
Napareta hupaya o Yerusalem ihigokoli,
deʼ ma Jou Ai Tau no gelenga mahohol̄e.’ ”
