O PENGKHOTBAH 3
3
Hagala moi-moi naga demaöraha
1Hagala moi-moi o duniaka nënanga idadi
de maöraha ma Jou Madutu wohi tötatantu.
2Ma Jou Madutu wohitantu maöraha mangale
yahingohaka deʼ maöraha mangale yohonenge,
maöraha mangale yodatomo deʼ maöraha mangale yärahuku,
3maöraha mangale yätoma deʼ maöraha mangale yahitogumu,
maöraha mangale yakilianga deʼ maöraha mangale ihigoko.
4Ma Jou Madutu wohitantu maöraha mangale yoari deʼ maöraha mangale yoiete,
maöraha mangale yododora deʼ maöraha mangale yoselo,
5maöraha mangale imakoröehe moi deʼ maöraha mabohono imakoröehe moi,
maöraha mangale yakololo deʼ maöraha mangale yatumungu manga diri.
6Ma Jou Madutu wohitantu maöraha mangale yamake deʼ maöraha mangale ihihanga,
maöraha mangale yagogono deʼ maöraha mangale ihikabarihi,
7maöraha mangale yakakihi deʼ maöraha mangale yauriti,
maöraha mangale imarirïdi deʼ maöraha mangale yotemo-temo.
8Ma Jou Madutu wohitantu maöraha mangale yähininga deʼ maöraha mangale yädohata,
maöraha mangale imateke parangi deʼ maöraha mangale imaka dame.
9Okia mahasili hagala tongone nanga huha de nanga kangela? 10Ngohi tohiöriki ma Jou Madutu wonahidöaka o gina i totubuho ngoneino. 11Unanga wohitantu o öraha yakokorona mangale hagala moi-moi. Unanga wonahidöaka ngone o ngigo mangale hohiöriki o wange nangahimangika, mä ngone hakunua homangarati ma Jou Madutu ai manarama mamuläenge de yaino hiädono mabaha. 12Ngohi tohiöriki mangale ngone koiwa iholoi yaoa mahomoa de homorene deʼ hajame o ngango tongone nanga umuru magurutu. 13Kayaoa ngone mata-mata hol̄omo deʼ hokere ikali hajame tongone nanga karajanga mahasili. Genanga ganga ma Jou Madutu ai ngongike.
14Ngohi tohiöriki hagala ma Jou Madutu Ai gao-gao aha kahirahi naga kahiado-adonika. O nyawa hakunua hodogo ekola ha kuranga. Deʼ ma Jou Madutu wodiai hoko gënanga hupaya ngone himodongo Unangika. 15Oraha nënanga idadadi, kowahi de gënanga idadioka. Aha naga, madekanoka naga. Ma Jou Madutu wohitantu idödadadioka, idadioli.
I adi-adilua o duniaka
16Nagali tamake o duniaka nënanga: kiaka kokiani naga o adili deʼ o oa-oa, genangoka naga o dorou. 17Tomapikiri, ma Jou Madutu aha wä adili o nyawa maoa yaoa o nyawa madorou, hababu o hali magetongo deʼ o manarama magetongo aha idadi maöraha ma Jou Madutu wohitä tantuoka. 18Tatoomu taino enagënanga: Ma Jou Madutu wonä uji ngone mangale wohi dumutu okia idadi dede ngone imahowonua de okia i dadi deo aiwani. 19Sarakiaö dika, okia idadi o nyawa deʼ o aiwani ganga kao rupa moi. Moi aha ihonenge, hoko genangö mahomoa. Hinoto ganga kao dodadi mata-mata. Ho, o nyawa iholoiua youtumu deo aiwani, hababu mangale hinoto i wango gënanga kaparahaja. 20Onanga yameta mangï kaimatero. Onanga manga ahali o kafoino aha yolio o kafoika. 21Ngone hohiorikua, boteka o nyawa mawomaha idoa yakail̄e deʼ o aiwani mawomaha iuti o tonaka magoronauku. 22Hababu gënanga ngohi tamao koiwa iholoi yao mangale o nyawa wajame ai karajanga mahasili. Mahomoa gënanga koiwa wakunu wadiai. Koidadiua ünanga wohiöriki okia aha idadi ünanga wohonenge ibotino.
