O SAMUEL MAHINOTOKA 4
4
O Isyboset iwi toma
1-4 #
2Sam. 9:3
O Saul ai gutiuku mahomoa enagënanga o Mefiboset, o Yonatan aingoha-ngohaka. Unanga wosuga mamulaenge ai umuru o taongo motoa, enagënanga maöraha o Saul deʼ o Yonatan yohonenge. Hababu maöraha o abari mangale toönanga manga honenge iboa o Yizreel makotaino, o Mefiboset mihidö danu-danu mitai daha yoara; mä karana o ngoheka gënanga duru moma tai-taiti, o ngohaka gënanga iwi otaka hiädono idadi wosuga.
Maöraha Isyboset o Saul aingohaka woihene o Abner iwi tomaka o Hebronoka, ihihangoka ai hininga makuata, deʼ o Israeloka manga hoana yongodumu idadi yohaharoka. O Isyboset to ünanga ai kapita yahinoto yodadi yopoparangi manga duduono ihi baluhu; womatengo ai romanga o Baana, woma tengoli ai romanga o Rekhab. Onanga o Rimon aingohaka, o Beerotino o Benyamin ai hoanino. (O Beerot ietongo o Benyamin madaera. Maberera madutu ihi oaroka manga diri o Gitaimika deʼ öraha gënanga yogogere dokengoka.)
5O kapita yahinoto gënanga, enagënanga o Rekhab deʼ o Baana ima jobo o Isyboset ai tauika deʼ ima hiädono genangoka maöraha o wange ikorona, mä o öraha o Isyboset magogiria womahi batongino o wangeoka. 6O ngoheka o tau magogoana mo kadu-kadunu maöraha mago giria matebini o gandum, daha moma iduoka. Karana gënanga o Rekhab deʼ o Baana yakunu imahibilatu yowohama. 7”Onanga gila-gila yowohama o kamari woma idu-iduika kiaka o Isyboset magogiria woma iduoka ai nihu-nihuku, daha iwi tuduku ünanga hiädono wohonenge. Onanga yatobiki ai tomara de yoiki yao. O hutu moi yahaiwatiki önanga ima dagi yanonu o Yordan ma Wai. 8Ipaha önanga ihi lapahi o Isyboset ai haeke gënanga o Daudika o Hebronoka deʼ yotemo, ”Nenanga o Isyboset ai haeke o Saul aingohaka, ani haturu Jou Koano wohi dailako womau woni toma Jou Koano. O wange nënanga ma Jou wabalahoka o Saul ai manarama deʼ aidifauku ngonaika Jou Koano.”
9Mä o Daud wohaluhu, ”Ma Jou wowango-wango, wohï hihalamatoka ngohi hagala o bahayaino, nihi öriki aha totemo nënanga itiai. 10#2Sam. 1:1-16 Maöraha o Ziklagoka naga o nyawa ihihi ngahu ngohino mangale o Saul ai honenge, wato bote ünanga woao o abari maoa. Mä ünanga titagokoka deʼ titoma. Genanga mahewa tihi döaka unangika hokä mabalahi mangale o abari woö ao-ao gënanga. 11Hoko kiaoli iholoi itubuho o hukumanga aha tigelenga itotorouika iwi tomaka o nyawa wahö howo-howonua deʼ mago giria womaidu ai tauoka mahirete. O öraha nënanga ngohi talingiri mabalahi nginika mangale o doma gënanga, ikali ini hohihanga ngini o dunia mal̄okuoka nënanga!” 12Iböto gënanga o Daud wapareta ai nyawaika mangale yätoma o Rekhab de o Baana. Yatomaka iböto, toönanga manga giama deʼ manga l̄ou yatobiki deʼ yanuneuku o lupungu madatekoka. Mä o Isyboset kai haëke gënanga ya l̄ë de yajere o kotakaö gënanga o Abner ai jerer magoronaka.
