O SAMUEL MAHINOTOKA 3
3
1O parangi o Saul ai tau manyawa iwi hibö böa-böa ma hidogoronaka deʼ o Daud iwibö boa-boa gila-gila ima togumua. O Daud i dogo wokuata, mä ai lawani idogo yobole.
O Daud aingoha-ngohaka o nauru
2O Daud aingoha-ngohaka ima kil̄au o Hebronoka ganga yanïki nënanga imamoteke ima kokadadu imakil̄au.
O Amon. Ngoi ayo enagënanga o ngo Ahinoam o Yizreelino.
3O Kileab. Ngoi ayo enagënanga o ngo Abigail, o Nabal ngoi fao o Karmelino.
O Absalom. Ngoi ayo enagënanga o ngo Maakha, ma Koano Talmai ngoi ora o Gesurino.
4O Adonai. Ngoi ayo enagënanga o ngo Hagit.
O Safaca. Ngoi ayo enagënanga o ngo Abital.
5O Yitram. Ngoi ayo enagënanga o ngo Egla.
Aingohaka o nauru yabutanga gënanga ima kil̄au o Hebronoka.
O Abner womahi dogo deʼ o Daud
6Oraha utu o parangi itagi gila-gila o Daud iwihi bö böa-böa manga hidogoronaka deʼ o Saul ai tau manyawa iwihibö böa-böa, o Abner wohidailako hupaya ai kuaha iholoi ilamoko o Saul iwihibö böa-böa manga hidogoronaka.
7O wange moiuku Isyboset, o Saul aingohaka, wikalaki o Abner womi hidu o Saul ngoi hekata paliara moma tengo ami romanga o ngo Rizpa o Aya ngoi ora. 8Daha o Abner idadi duru wongamo deʼ ünanga wotemo, ”Boteka ahi Tuanga nato bote ngohi nënanga titipu o Saul deʼ tahi böa o Yehudaokaino? O öraha kamulaengohi ngohi tosetia o Saulika Tuanga ani ama, deʼ ai roriadodotika ikali ai dodiawoika. Ngohi toni riwoka ahi Tuanga hiädono o Daud wakunua wini hihanga. Ngaro hoko gënanga ahi Tuanga nohihi kauku ngohi duga-duga karana mahali o ngoheka! 9-10#1Sam. 15:28 Iholoi yaoa ngohi tiriwo o Daud, okiali ma Jou wojajioka unangika aha wal̄ë o pareta nënanga o Sauloka de ai gutiukuoka, daha wigoraka o Daud wodadi o koano o Israel manyawaika yongodumu deʼ Yehuda. Tanu ma Jou Madutu wohi toma, nako ta diaiua ma Jou Ai jaji o Daudika gënanga!” 11O Isyboset wakunua wohaluhu kao demo moiö, karana ünanga wimodongo o Abnerika.
12Daha o Abner wahidingoto ai huhuloko o Daud ika öraha gënanga naga o Hebronoka, deʼ yoao o behehongo, ”Onagona aha yakuaha o tonaka nënanga? Nodiai o jaji dede ngohi, done ngohi aha tonï riwo ahi Tuanga hupaya o Israel manga hoana yongodumu inihiböa ahi Tuangino!”
13O Daud wohaluhu, ”Kayaoa! Nihiadono o behehongo nënanga o Abnerika: Ngohi tomau todiai o jaji dede ngona, mä deʼ moi madodagi: o ngo Mikhal, o Saul ngoi ora, kiani nomiao ngohino nako ngona noböa nohihimanga ngohi.” 14#1Sam. 18:27 Iböto gënanga o Daudö wahidingoto ai huhuloko o Isybosetika, deʼ yoao o behehongo, ”Kokiani Tuanga nomihi gilio o ngo Mikhal, ngohi hekata, ngohino. Munanga tomi ijaka deʼ o Filistinoka manyawa tonauru makai o ratuhu moi.” 15Daha o Isyboset wä hüloko ai huhüloko imi l̄ë o ngo Mikhal ami rokatoka, enagënanga o Paltiel o Lais aingohaka. 16Mä o Paltiel gila-gila womi nïki o ngo Mikhal wo ari-ari monga. Maöraha önanga ima hiädono o Bahurim makotaka, o Abner witemo unangika. ”Iböto, nolio dika!” Daha o Paltiel wolio.
17O öraha mahuhutulu gënanga o Abner ima katatoro deʼ o Israeloka manga balu-baluhu deʼ wätemo, ”Madekanoka ngini nio mau o Daud wodadi nia koano. 18Aa, nënanga nia öraha nginika. Niohininga, ma Jou wojajioka o Daudika, ünanga aha wipake o Daud mangale wahi halamati Ai umati o Israeloka o Filistin ma nyawaino deʼ mata-mata manga haturu mahomoaino.” 19O Abnerö ima katatoro deʼ o Benyamin manyawa, deʼ ipahaino wöiki o Hebronika mangale wohi ngahu o Daudika okia ihi goungoka o Benyamin manyawa deʼ o Israeloka manyawa gënanga.
20Maöraha o Abner imakinïki deʼ ainyawa yamonaoko iwi himanga o Daud o Hebronoka, o Daud wodiai o rameanga mangale önanga. 21Iböto gënanga o Abner womahilooa deʼ wotemo, ”Nohi higumal̄a ngohi toma jobo mangale tahimomiki o Israeloka yongodumu hupaya imahi dogo deʼ ahi Tuanga. Onanga aha ini tarima ahi Tuanga hokä o koano, deʼ hoko gënanga ahi Tuanga aha napareta o berera ingodumu, ima daene deʼ ani mau ahi Tuanga.” Ipaha o Daud wihigumal̄a o Abner womajobo ikali witagongo ai halamati.
O Abner iwi toma
22O Abner wasoboka, o Yoab ima kinïki o Daud ainyawa mahomoa yolio o parangioka deʼ yaino deʼ yao ihigilio okia honanga yaora-oraino koha ngöe. 23O Yoabika iwihi ngahu o Abner woböaka wihimanga ma koano Daud deʼ wihi gumal̄aka wöiki ikali witagongo ai halamati. 24Daha o Yoab wihimanga ma koanoika de wato, ”Sarakia Koano ani manarama gënanga? O Abner woböaka woni himanga Koano. Yadodoa Koano nihi gumal̄a ünanga wöiki hoko gënanga dika? 25Maraioka Koano nohi öriki o Abner ai böa gënanga duga-duga mangale woni tipu Koano, deʼ mangale wohi öriki magogere ikali hagala Koano ani datoro.”
26Wimal̄a iböto o Daud, o Yoab wahidingoto ai huhuloko-huhuloko mangale iwi ahoko o Abner. ”Onanga iwihi doduruino o Abner hiädono o Sira mahumu itigioka, daha önanga iwi ao iwi higilio. Mata-mata gënanga idadi o Daud wohi orikua. 27Deʼ mada taitoka o Abner woma hiädono o Hebronoka, o Yoab wi ahoko ünanga ai datekika, itigika o ngorana ma amo-amoko, matero-tero womau wiade-ade moi irö rahasia. Itodokanino o Yoab witopoko o Abner ai mamataoko hiädono wohonenge. Hoko gënanga o Abner wohonenge o Yoab witoma mangale wabalahi o hininga wigogonika mangale witoma o Asaelika ai dodoto. 28Maöraha o Daud woihene o hali gënanga, ünanga wotemo, ”Ma Jou wohi öriki ngohi deʼ ahi kawaha kamamoi mia howonua o hali magoronaka iwi toma o Abnerika gënanga. 29Mal̄aika o Yoab deʼ ai tau manyawa yongodumu yahukumu karana ai manarama gënanga. Tanu o Yoab ai tau manyawa magoronaka manga gutiuku hoko genangika naga o nyawa yadaene o panyake manga kai ika hobo borohono, ekola o nau-nauru yokuatua, ekola yohonenge o parangi magoronaka ekola manga inomo ikuranga!”
30Hoko gënanga o Yoab deʼ ai dodoto o Abisai, yabalahi o hininga iwi gogonika o Abnerika karana o Abner witomaka toönanga manga dodoto o Asael o parangi magoronaka o Gibeonoka.
O Abner iwilungunu
31Ipaha o Daud wahi pareta o Yoabika deʼ ainyawa hupaya yakakihi toönanga manga pakeanga, deʼ imahi noa duka mapakeanga ikali iwi gari o Abner. Deʼ maöraha ai mayeti yangotaka, ma Koano Daud mahirete woma dagi o mayeti malungunu maporetino. 32O Abner iwi jëre o Hebronoka, deʼ ma koano ikali o kawaha yongodumu yoari deʼ makuatil̄e o jëre gënanga ma himangoka. 33Iböto gënanga o Daud widodora mangale o Abner, wato,
”Kokiani o Abner wohonenge hokä o nyawa bodo?
34Ai giama ilikoua, deʼ ai l̄ou ialaraua.
Unanga wohonenge iwi tuduku deʼ koö iwa-iwa manga dora.”
Daha o kawaha yongodumu iwi gari o Abner iholoioli ikuatil̄e.
35O wange moi iahumu hagala o nyawa ihi dailako iwi baja o Daud hupaya wol̄omo mahuhutulu, mä ünanga wokoboto, ”Tanu ma Jou Madutu wohi toma ngohi, nako o wange itumunuahi deʼ ngohi tol̄omo!” 36O kawaha yoihene o hali gënanga yamao yosanangi. Igoungu, okia dika ma Koano Daud wadiai, toönanga manga hininga yadiai yasanangi. 37O wange gënanga o Daud ai kawaha yongodumu deʼ o Israeloka manga hoana yongodumu imangarati, ma koano woigoua iwi toma o Abnerika gënanga. 38Ma koano watemo iwinö ninïki, ”Nihi orikua ngini o wange nënanga o Israeloka manga tutuda woma tengo wolö amo-amoko wotihaka? 39Ngaroka ngohiö nënanga o koano ma Jou madutu wohi iri-irikoka, mä o öraha nënanga ngohi tamao tobole. O ngo Zeruya ai ngoha-ngohaka gënanga ikiriaholi koiwa manga dora. Ngohi takunua takuaha önanga. Tanu ma Jou wahukumu yatotorou gënanga, ima moteke deʼ toönanga manga manarama!”
