AMatiyu 6 Popüler Kutsal Kitap Ayetleri

Paylaş

Tun tsɛsɛk yin igwɔm Adakunom ni itek de ni inyen. Ama anɔng, ngma nkyɔrɔk e nang da sot nfiin bà.

Nek anɔng, i bi daam yin na katson awo, nek katson bi bɛ́ ni kudaam ka. Kaakyi kunom bi kudaam ko.

“Nek anɔng, i mi tsin fɛ̀ ni iyin, i bi sak yin kudaam yin naton, ikyɛng iya, ke ifi sɔ, ke ikyɛng fi i da te yin ni irɔm awo. Kutset yin wat nayak awɛ? Kurɔm yin wat ares ite awɛ?

Awɛt i sɛ gyat, ngma izen fi i shim i ra yin awon, nɔ yin ayɛt itu yin, fam yin katitu, ra yin awon sak na Ada yin yɔng fɛ́ a se ni nɛt. Awɛt Ada yin yɔng fɛ́ a yɛrɛ ikyɛng fɛ́ ba ras ni nɛt, da ki nɔk yin izang yin.

“Ane wu fi i da ras yin awon, ‘Ada yit fɛ́ a se azanɛn, won iyerek ngɔn ni isot jɛrɛ, won igwɔm ngɔn ni ibɛ́, won na ba ras ikyɛng fi ngɔn shim azatse, kyɔn tɛ ba di ras naton aza.

Ki nɔk yit kuyak iwoso.

Ki fuut yit anɛn yit, kyɔn ti iyit di fuut yit bayɔng fɛ ba ki ras yit anɛn.

Ngɔn bi ki won yit, ni in nɔ yit, ni imara awo, awɛt ki tun yit ni bɔk aShetan.’

“Nek ki iyin fuut yin banet fɛ́ ba ki ra yin inɛn, anɛn ba, Ada yin fɛ́ a se azanɛn, da ki fuut yin anɛn yin bà.

Yɛrɛ yin nanon aton aza, da na tuus kuyak ke na na tusung nayak ni ikɔ awo, da na bi imyɛ awo, ngma na anɔng, Ada yin fɛ́ a se naton aza ya, ni ina. Iyin wat yin nanon ni ízɔk awɛ?

“I bi tusung yin ace yin kurúm azeng azatse awo, narɔ fi ize ni ibush beseng iko, ke na bakpatang tsɛ ba fo na ba yi ayi. Kaduk ni itusung yin ace yin kurúm azanɛn, karɔ fɛ́ vit ize ni ibush fi i da tsi ibeseng, ke fɛ bakpatang da tsɛ ba fo na ba di yi awo. Nek karɔ fi kurúm anet di se, azɔng wu fi kuyiring wu di nak bà.

“Vit anet fɛ́ a da kyem a ra batek ari bafaa isam. Tit na rawu azining, na a shim azining e, ke na te nhwyɛ wu na azining, na byɛs azining ayi. I da kyem ira yin Adakunom isam ni tsin di ra yin itsɔm isam ni izen izining awo.

Iyin fi i bɛ̀ yin inɔɔk atsak hyihyit, ke Adakunom kyem a zem agam ayit yɔng fɛ́ a se ni kutset atut natson na ba te ni irong, a da ki te yin ares fɛ́ a wat ayɔng awɛ?

I se gyat, ngma izen fi i shim i nye kunang, i bi won kubɔk imen ngɔn ni ku rēn ikyɛng fi kubɔk iyak ngɔn shim ku nye awo, nɔng kunang ngɔn bin se ni nɛt. Na anɔng wu fɛ́ Ada ngɔn fɛ́ a yɛrɛ ngma ikyɛng fɛ́ ba ras ni nɛt, da ka nɔk izang ngɔn.

“Nye yin yɛɛt kɔn kutomong kutek yin, bi sot kufi iyɛrɛ ayisi, nek ki i nye yin anɔng, vit iyin ni i sɛ izang narɔ Ada yin fɛ́ a se naton azanɛn.

“Izen fi i se yin ni itemak kanu, i bi sot yin mu tɛ bafɛ́ nanu nafifaa di nye awo, Nek ba tsip ayisi bá nɔng banet da bin rēn fok ba tsin ra itemak kanu. Won in ki tak yin atsak, ba mi tsang shan nkum izang bá yɔng. Awɛt ki i se yin ni itemak kanu, kusu yin ayisi, ni kon yin name ni ice, kɔn itemak kanu yin bi sot ikyɛng iyɛrɛ banet, nek Ada yin fɛ́ se ni nɛt kyɛk. Iwu Ada yin fɛ́ a tsin yɛrɛ ni nɛt da ki nɔɔk yin izang yin.