Matiu 14
14
Ekpịkke Yọọn Aduọkmmọọñ Iwuod
1Ke ini ado, Herọd andikara amaakop etob abaña Yisọs. 2Anye amaabo nditọufọk amọ, “Ana ado Yọọn Aduọkmmọọñ ado ami; anye a-aset ke ñkpa! Ntak ado anam mme adudu utịppeñkpọ eba anye ke idem.”
3Herọd amaamʌm Yọọn, abọp ñkpaha ukwak, anyʌñ asịn anye ke ñkpakọb ke ntak Herọdias, anwaan ayịneka amọ Filib, 4sia Yọọn amaasibo anye, “Mbed a-akpan afo adiben anwaan ayịneka mfo ndọ.” 5Herọd amaayem adiwot Yọọn, ado anye akebaak mbon awo anyen, sia ammọ ekedat Yọọn nte prọfed.
6Ke ini usọrọ usen emana Herọd, ayịn awonwaan Herọdias amaanek unek ke iso mme isenawo, ndin ado amaanem Herọd esịd eti-eti. 7Ado amaanam Herọd anwọñọ ke imọ iyainọ anye ñkpọ akeedodo a-anye abeeñeke. 8Ke eka amọ amaakedọọñ anye, anye amaabo, “Nnọ miin iwuod Yọọn Aduọkmmọọñ ke usan.” 9Adidem amaafʌhọ, ado ke ntak mme enwọñọ a-anye akenamma ke iso isenawo amọ, anye amaanọ uyio ate enọ ayịn awonwaan Herọdias se anye akebeeñe. 10Ndin anye amaadọñ ekekpịkke Yọọn iwuod ke ufọk ñkpakọb. 11Emaeben iwuod ami ke usan ekenọ abọikpa ado; ndin anye amaaben akenọ eka amọ. 12Mme mbed Yọọn emaediben akpo Yọọn ekebuuk. Ndin ammọ emaekaa ekedọkkọ Yisọs.
Yisọs Anọ Tọsịn Awo Ition Ndidia
13Ke ini Yisọs amaakebọ etob ami, anye amaadakka, asaña ke ubom akaa ndobo-ndobo itie a-anye akekanna akeba ke idem amọ ikpọọñ. Ado mme atu awo ekekop ami, ammọ emaekpọñ mme abio, esaña ke ukod ekeene anye. 14Ke anye amaakedibeghe ke isọñ anyʌñ akịt atu awo, mbọm amaanam anye; anye amaanyʌñ akọk mbon awo udọñọ ammọ.
15Ndubiayio akedi, mme mbed emaekaa ekebo anye, “Itie ami anyọọñ usʌñ akpọñ nte mme awo edʌñọ, ñko ayio asọñ. Bo mme atu awo ami enyọñọ nọ ammọ eka mme esịdidʌñ ekedep ndidia se ediidia.”
16Ado Yisọs amaabọọrọ ammọ ate, “Ufọn ammọ adinyọñọ ibaaha, ndufo ke idem ndufo inọ ammọ ñkpọ edia.”
17Mme mbed emaebọọrọ anye ete, “Ñnyịn inie uyo ition ye iyak iba kpọd.”
18Anye amaabo, “Ikoono ammọ insọk miin.” 19Anye amaanọ uyio ate mbon awo esuuk etie ke mbid, ndin anye amaaben mme uyo ition ye iyak iba ado, abenne anyen ase hefịn anyʌñ anọ ekọọm, ndin abuuñ mme uyo ami anọ mme mbed ate ammọ enọ atu awo. 20Afịd awo emaeta enyʌñ ekop uyʌkkọ, ndin mme mbed emaetañ mbeñe se ikiyọhọ isʌhọ ñyọọhọ-ñyọọhọ akpasa duob mme iba. 21Ñkpọ nte ideen tọsịn ition ekedia ñkpọ ado, ke esioho ibaan ye ntəkayịn efep.
Yisọs Asaña ke Anyọñ Mmọọñ
22Idaha-idaha ado, Yisọs amaanam mme mbed edọñọ ubom ebem anye iso eka ke edem inyañ uko, ke ini anye akenamma mme atu awo ado enyọñọ. 23Ke Yisọs amaakenam mme atu awo enyọñọ, anye amaadọọk anyọñ abod ke idem amọ ikpọọñ adikibọñ akam. Anye akesʌk aba do ikpọọñ tutu ayio akịm, 24ado ubom akeba ke ufọọd akpa, anyọọñ usʌñ akpọñ esʌk, ndin akpọsọñ afịm ye inua akpa emaedakka etəkko ubom eti-eti.
25Ke ñkpọ nte ñkanika inaañ usiere, Yisọs amaawuọ asaña ke anyọñ ibiok abịne mme mbed amọ. 26Ke ini mme mbed ekekịtte anye nte asaña ke anyọñ ibiok, ndịk amaanam ammọ. Ammọ emaesio ñkpo ato akpọsọñ ndịk ete, “Ekpo ke ado!”
27Ado idaha-idaha ado Yisọs amaabo ammọ ate, “Isọñ esịd! Ami ke ado, ikiifeghe ndịk.”
28Pita amaabọọrọ anye ate, “Abọọñ, akpedo afo ke ado, bo nọ ami nsaña ke anyọñ mmọọñ ubịne fiin.”
29Yisọs amaabo anye, “Di.”
Ndin Pita amaawuọ ke ubom anyʌñ atọọñọ adisaña ke anyọñ mmọọñ mbịne Yisọs. 30Ado anye akekịt ndufuud akpa, ndịk amaanam anye, anye anyʌñ atọọñọ adideñ, ndin anye amaabọñ ke akpọsọñ uyio ate, “Abọọñ, ñnyaaña miin.”
31Ke ndo-ndo ado, Yisọs amaasio ubọk amọ anyan anyʌñ amʌm anye, anyʌñ abo anye ate: “Afo awo etək mbuọdidem, nsoo ikinam nọ afo anie eyịghe?”
32Ammọ ekedọọk edʌk ubom, afịm amaadobo. 33Mbon se ikidọñọ ke ubom emaenyuuk iwuod ke iso amọ ke ukpono enyʌñ ebo, “Ke akpanikọ afo ado Ayịn Abasi.”
34Ke ammọ emaekekaaña inyañ, ammọ emaebeghe ke esʌk Yenesaded. 35Ndin ke ini ideen idʌñ ado emaekedidiọọñọ ke Yisọs ke ado, ammọ emaesuan etob enọ afịd ñkanñkʌk abio ado. Mme awo emaenyʌñ ekoono afịd mbon udọñọ ammọ esọk anye, 36enyʌñ ekpeiye anye ete akap asʌk ayak mbon udọñọ ado etuuk mben afọñ amọ. Ndin afịd awo se ikituuk mben afọñ amọ emaekop nsọñidem.
Айни замон обунашуда:
Matiu 14: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.