Matiu 15
15
Ñkpọ se Isappa Awo
1Ndin usʌk mme Farisi ye mme akpeeb mbed emaeto Yeruselem edi ebịne Yisọs enyʌñ ekebịp anye ete, 2“Nsoo ido nọ mme mbed mfo ebiat edu unamñkpọ mme ñkpisọñ esed? Ammọ isiyieghe ubọk mbemiso edia ñkpọ!”
3Yisọs amaabọọrọ ammọ ate, “Nsoo ido nọ ndufo ñko ebiat ewʌhọ Abasi ke edu unamñkpọ ndufo? 4Sia Abasi akebo, ‘Kpono ete ye eka mfo’; ndin ‘Ana ewot awo akeedodo a-asuuñọke ete me eka amọ.’ 5Ado ndufo ebo ke adieke awo abooho ke se ikpikikama inọọ ete me eka amọ unwam ado, ‘asaña-asaña enọ a-anieghe Abasi,’ 6ammọ inaaha edat ekpono ete me eka ammọ. Ke ntom, ndufo emebiat ikọ Abasi ke edu unamñkpọ ndufo. 7Ndufo mbon mbubịk! Aisaiya amaanen ke ini anye aketañña prọfesi ibaña ndufo ate:
8 “ ‘Mbon ami eñkpono miin ke ñkpọkinua ammọ,
ado esịd ammọ amaañkpọñ miin anyọọñ usʌñ.
9 Ammọ eñkpono miin ke ikpu-ikpu usʌñ,
mme ukpeebñkpọ ammọ akọñọ ke mme mbed awo.’ ”
10Yisọs amaakoot atu awo anyʌñ abo ammọ ate, “Ikpañ utọñ nọ inwaña. 11Se idʌk awo inua isappake awo, ado se iwuọ awo ke inua asappa awo.”
12Ndin mme mbed emaedi ebịne anye enyʌñ edibịp anye ete, “Afo amediọọñọ ke mme Farisi emaekop idiọọkesịd ke ikọ a-afo aketañña do?”
13Anye amaabọọrọ ate, “Eto akeedodo ake Ete mmi ke hefịn imiitọọhọ eyaewịppe ke adʌñ esio. 14Ikpọñ ammọ, ammọ edo mme adadusʌñ ado edoñño nnan.#15:14 Usʌk mme ikpañwed ebo nnan e-edatta nnan usʌñ Adieke nnan adatta nnan usʌñ ammọ awo iba eyaeduọññọ edọñọ ube.”
15Ndin Pita amaabo, “Nam ñke ami inwaña ñnyịn.”
16Yisọs amaabọọrọ ate, “Inyʌññọ inwaña ndufo ñko? 17Nte ndufo ikanna ikịt ke se idʌk awo inua aboiyo adʌk idịb, ndin etọrọ anye esio? 18Ado mme ñkpọ ewuọhọ awo ke inua eto esịd, ndin ado anam ammọ edeghe. 19Sia afịd ndiọi akikere eto esịd awo ewuọñọ: uwodawo, efịbe, use, inọ, utie ntiense nsu, adidọk. 20Mme ñkpọ ami enam awo adeghe. Ado adidia ñkpọ ke mbad ubọk inamma awo adeghe. ”
Mbuọdidem Awonwaan Kenan
21Yisọs akekpọñ itie ado, anye amaakaa ñkanñkʌk Tai ye Sidọn. 22Ndin ke ebe ado, awonwaan Kenan keed ke ñkanñkʌk ado amaadi abịne anye, aditua abo anye ate, “Abọọñ, Ayịn Defid, ntua miin mbọm. Dimọn a-atʌkkọ ayịn mmi awonwaan ndin anye abọ ufen eti-eti.”
23Ado Yisọs ikiibọọrọke anye ikọ ndomokeed. Ndin mme mbed amọ emaekpeiye anye ete, “Nam mma ami adakka, mbaak anye adika iso abọọñ ñkpo ikeene ñnyịn.”
24Anye amaabọọrọ ate, “Ekendọñ miin enọ edọñ ufọk Isrel e-emaekesop kpọd.”
25Ado awonwaan ado amaasaña adisịm anye anyʌñ atọọñọ edọñ ke iso amọ, ate, “Abọọñ, ñnyaaña miin.”
26Anye amaabọọrọ ate, “Inenne adiben ndidia ntəkayịn ntop nnọọ mme ewa.”
27Ado mma ado amaasọsọp abọọrọ ate, “Ii, Abọọñ, ado idem mme ewa esitañ mbeñe e-eduọññọke eto akpokoro eteufọk ammọ edia.”
28Ndin Yisọs amaabọọrọ anye ate, “Mma, afo amenie ekamba mbuọdidem. Eyaak ebeeñe mfo unọ.” Ndin kpa ke ebe ado idem amaamaana asọñ ayịn amọ.
Yisọs Anọ Awo Tọsịn Inaañ Ndidia
29Yisọs amaato do akaa akesịm mben Inyañ Kalili, ndin anye amaadọọk anyọñ abod akesuuk atie. 30Ndin uwak atu awo emaebịne anye, eben mme mbʌñọ, mme nnan, mme imuum ye uwak mbon udọñọ mfen ebịne anye, ediyaak ammọ ebonno anye ke iso, ndin anye amaanyʌñ akọk ammọ udọñọ. 31Idem amaakpa atu awo adikịt naña mme imuum etañ ikọ, mme mbʌñọ esaña isañ, mme nnan enyʌñ ekịt usʌñ, ndin ammọ emaetooro Abasi Isrel.
32Ndin Yisọs amaakoot mme mbed amọ anyʌñ abo ammọ ate, “Ami mmekop udʌk mbaña ibon ami; ammọ ebaba ye ami usen ita idiaha ñkpọ ndomokeed. Ñyemme adibo ammọ enyọñ abiọọñ, mbaak edikisʌkkọ ke usʌñ.”
33Mme mbed amọ emaebọọrọ anye ete, “Ke mmọọ ke ñnyịn idiikịt uyo ke esịd idʌñ ami nọ akem utọ atu awo ami?”
34Yisọs amaabịp ammọ ate, “Ndufo enie uyo ifañ?”
Ammọ emaebọọrọ, “Itiaba, ye ibad-ibad ñkeñe iyak.”
35Anye amaabo atu awo esuuk etie ke isọñ. 36Ndin anye amaaben uyo itiaba ye iyak ifañ ado, ndin ke anye amaakenọ Abasi ekọm, amaabuuñ ammọ, anyʌñ akappa anọ mme mbed amọ, ndin ammọ emaedeeme enọ atu awo. 37Afịd ammọ emaedia enyʌñ ekop uyʌkkọ. Ke emaekedia ema, mme mbed emaekoono mbeñe se ikisʌhọ eyọhọ akpasa itiaba. 38Ibad mbon e-ekediaha ñkpọ ekedo tọsịn inaañ, ke esioho ibaan ye ntəkayịn efep. 39Ke ini Yisọs amaakesio atu awo unyọñ, anye amaadakka akedʌk ubom akaa ñkanñkʌk Makadan.
Айни замон обунашуда:
Matiu 15: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.