Matiu 13
13
Ñke Atọinwañ
1Kpa ke usen ado Yisọs amaawuọ ke ufọk akaa aketie ke mben ibiok. 2Mme atu awo emaedibono ekanna anye ekʌk. Atu awo emaewak tutu adido se anye adakka aketie ke esịd ubom ke ini afịd awo ekedudakka ke mben mmọọñ. 3Ndin anye amaatañ uwak ñkpọ anọ ammọ ke ñke ate, “Atọinwañ akekaa aditọ ñkpasi. 4Naña anye akesʌkkọ asuan ñkpasi, usʌk emaeduọññọ ke akpọusʌñ, ndin mme inuen emaedikoono ammọ eta. 5Usʌk emaeduọññọ ke isọñ itiad, isọñ a-mmiifọnnọ ñkpọ. Ammọ emaetịppe usọp-usọp, sia isọñ ikitʌñọke; 6ado ke ini utịn amaakesakka amia ammọ, ammọ emaeyeeme sia ammọ ikinieghe adʌñ. 7Mme ñkpasi mfen ekeduọññọ ke ikọd ñkukịm ndin ikọd amaakọt afʌk ammọ. 8Kpayeado mme ñkpasi mfen emaeduọññọ ke eti isọñ enyʌñ enwuum mfịd; usʌk enwịm mfịd ikie, usʌk enwịm mfịd ata, usʌk enwịm mfịd edịb mme duob ekan se eketọ. 9Awo akeedodo a-anieghe utọñ, yak anye akop.”
10Mme mbed amọ emaedi ebịne anye enyʌñ edibịp anye ebo, “Ntak a-afo akamake ñke atañ ikọ anọọ mme awo-o?”
11Anye amaabọọrọ ammọ, “Sia inọ ndufo ikpọọñ unen adinie ifiọk mbaña mme ndedịbe ñkpọ abioubọọñ hefịn, ado awo inọhọ mbon mfen. 12Awo akeedodo a-anieghe ñkpọ eyaenọ anye awak akan, ndin anye ayaanie akan naña anye ayem. Ado awo i-imiinieghe, kpa etək a-anye anieghe, eyaebọ anye. 13Ntak ami anam nọ ntañ ikọ nnọ mme awo ke ñke nọ ato do:
“Akpesʌkado a-ammọ ekịtte, ado imọọnọke,
akpesʌkado a-ammọ ekpañña utọñ, ado ikoppo, inyʌññọ inwaña ammọ.
14 Ke ntom ke brọfesi Aisaiya adiisu ammọ ke idem:
“ ‘Ndufo ediisʌk ikokop, ado idiinwañake;
ndufo ediisʌk ikekịt ado idiimọọnọke.
15 Sia esịd ibon ami a-adoro ufiọn;
a-asọñ ammọ adikop ñkpọ ke utọñ ammọ,
ñkọ enyʌñ ebọọp anyen ammọ.
Imiidooho ntoro ammọ ekpaemọọnọ ñkpọ,
utọñ ammọ ekpaenyʌñ ekop ñkpọ,
ñkpọ anyʌñ anwaña ke esịd ammọ,
ammọ ekpaenyʌñ ekappa esịd, ndin ami ñkpaakọk ammọ.’
16 Ado afọfọn anọ anyen ndufo sia ammọ ekịt, ye utọñ ndufo, sia ammọ ekop. 17Sia ke akpanikọ ke ami ntañ inọọ ndufo, uwak mme prọfed ye ndinen awo emaeyem adikịt mme ñkpọ se ndufo ekịt, ado ikikịtte, emaenyʌñ eyem adikop mme ñkpọ se ndufo ekop, ado ikikoppo.
18 “Ikpañ utọñ ndin ikop se ñke atọinwañ awuọñọ. 19Awo amaakop ikọ abioubọọñ, ado ikọ ado inwañake anye, andidiọọk adi adiwịppe se eketọ ke esịd ammọ. Anye ami ado ñkpasi a-akeduọhọ ke akpọusʌñ. 20Ñkpasi a-akeduọhọ ke isọñ itiad ada anọ awo a-abọọhọ ikọ Abasi ke inemesịd idaha anye akoppo do. 21Ado sia ikọ ami imiinieghe adʌñ anye aba ke ataa ibio-ibio ini. Ukuud ye ndutʌhọ emaedi ke ntak ikọ Abasi ado, ammọ esọsọp ekpañña ewuọñọ. 22Ñkpasi a-akeduọhọ ke ikọd ñkukịm ada anọ awo a-akoppo ikọ Abasi, ado mfịna uwem ami ye abiaña inie ederimbod edikọt efʌk ikọ ado, iyakka nọ anye anwịm mfịd. 23Ado ñkpasi a-aduọhọ ke eti isọñ ada anọ awo a-akoppo ikọ Abasi; ikọ ami anyʌñ anwaña anye. Anye ami ado anye a-anwịmme mfịd, usʌk akañ ikie, usʌk akañ ata, usʌk akañ edịb mme duob ekan se eketọ.”
Ñke A-abañake Mbid
24Yisọs amaamaana atañ ñke mfen anọ ammọ ate: “Abioubọọñ hefịn atie nte awo a-atọọhọ eti ñkpasi ke inwañ amọ. 25Ado akonayio keed, ke ini afịd awo ekesʌkkọ edaiya idab, asua amọ amaaditọ mbid adọñ ke ufọọd abakpa anyʌñ adakka anyọñ. 26Ke ini abakpa amaaketịppe anyʌñ awuọñọ mfañ, mbid ñko amaanyʌñ atịppe.
27 “Nditọufọk anie inwañ emaedi ebịne anye edibo, ‘Ete, nte afo ukuutọọhọ nti ñkpasi ke inwañ mfo? Mbid aketo uke ndin aditịppe?’
28 “Anye amaabọọrọ ate, ‘Asua akenam ami.’
“Nditọufọk emaebịp anye, ‘Nte afo ameyem nọ ñnyịn ikiwịp ammọ isịññe?’
29 “Anye amaabọọrọ ate, ‘Iyoo, sia idaha a-ndufo ewịppeke mme mbid ami, emekeme ediwịppe abakpa ñko ye mbid. 30Yak naña ammọ iba ekọt itie keed tutu akem ini idọk. Ke ini ado ami ñyaadọkkọ mme adọkidọk nte: Ibem iso iwịppe mbid inyʌñ ibọp ke abek ke abek inịm nọ edifọp, ndin ikpịkke abakpa ikibon ke ise mmi.’ ”
Mme Ñke Ñkpasi Mọstad ye Yiis
31Yisọs amaamaana atop ñke mfen anọ ammọ: “Abioubọọñ hefịn atie nte ñkpasi mọstad a-awo akebenne atọ ke inwañ amọ. 32Akpesʌkado a-anye asịppe akan ke atu afịd mme ñkpasi, ado amaakpon anye akappa ado eto inwañ andikpon ñkan, adido se mme inuen anyọñ edisọrọ ke mme ñkọk amọ.”
33Anye amaamaana atop ñke mfen anọ ammọ ate: “Abioubọọñ hefịn atie nte yiis a-awonwaan abenne awuak ye udomo ndomuyo ata#13:33 Ñkpọ nte kilokram 27 tutu anye akappa atịt akem afịd efiak uyo.”
34Yisọs aketañ afịd ñkpọ ami anọ atu awo ke ñke; anye ikitañña ñkpọ ndomokeed inọ ammọ ke imiidooho ke ñke. 35Ntoro ke se prọfed aketañ akewuọ asu:
“Ami ndiitañ ikọ ke ñke,
ñnyʌñ ntañ mme ñkpọ se ikidịbe tọọñọ ke aditọọñọ ederimbod.”
Enam nọ Ñke Mbid Anwaña
36Ndin anye amaakpọñ atu awo akedʌk ufọk. Mme mbed amọ emaedibo anye ete, “Nam nọ ñke mbid ke inwañ inwaña ñnyịn.”
37Anye amaabọọrọ ammọ ate, “Andikitọ eti ñkpasi ado Ayịn Awo. 38Inwañ ado ederimbod, ndin eti ñkpasi ada anọ nditọ abioubọọñ. Mme mbid eda enọ nditọ andidiọọk, 39ndin awo usua a-aketọọhọ mme mbid ado andidiọọk. Ini idọk ado utịd ederimbod, ndin mme adọkidọk edoñño mme enyere.
40 “Naña ewịppe mbid esịññe efọp ke ikañ, ntoro ke adiido ke utịd ederimbod. 41Ayịn Awo ayaadọñ mme enyere amọ, ndin ammọ eyaewaak afịd ñkpọ iduọ se ido ntak idiọọkñkpọ ye mbon se inam ndiọi esịññe ke abioubọọñ amọ. 42Eyaetoomo ammọ edọñ ke ñkpọdiọhọ edemeikañ ake ntuaña ye ntaeded ediikpon. 43Ndin ndinen awo eyaeyamma nte utịn ke abioubọọñ Ete ammọ. Awo akeedodo a-anieghe utọñ, yak anye akop.
Mme Ñke Ñkpọuto e-Edịppedịp ye Nsọñudua Mme
44 “Abioubọọñ hefịn atie nte ñkpọuto e-edịppedịp ke isọñ. Ke ini awo akekịtte ñkpọuto ado, anye amaana adịp anye, ndin ke inemesịd anye akenyam afịd ñkpọ se anye akenie akedep isọñ ado.
45 “Ke adimaana ntañ, abioubọọñ hefịn atie nte anyamudua a-ayemme ataa uyaiya nsọñudua mme. 46Ke ini anye akekịtte ataa eti amọ, anye atịmme anyọñ akenyam afịd ñkpọ se anye akenie anyʌñ akedep nsọñudua mme ado.
Ñke A-abañake Iyịre
47 “Ke adimaana ntañ, abioubọọñ hefịn atie nte iyịre e-eketoppo esịn ke ibiok ndin anye amʌm afịd utọ iyak. 48Ke ini iyịre ado amaakeyọhọ ye iyak, mme akọiyak edʌt anye edisịm abod. Ndin ammọ emaesuuk etie esat nti iyak esịññe edọñ ke akpasa, ado etoomo mbon se imiifọnnọ eduọọñọ. 49Adiiba ntom ke utịd ini. Mme enyere eyaedi edibakka mbon ibak ediañña ekpọñ ndinen awo, 50enyʌñ etoomo mbon ibak edọñ ke ñkpọdiọhọ ekamba edemeikañ, ke itie nte ntuaña ye ntaeded ediiba.”
51Yisọs amaabịp ammọ ate, “Nte afịd ñkpọ ami inwaña ndufo?”
Ammọ emaebọọrọ, “Ii.”
52Anye amaabo ammọ, “Ke ntoro, andikpeeb mbed akeedodo e-emaekekpeep anye ñkpọ abioubọọñ hefịn atie nte anieufọk a-asịññeke mme ufa ye ñkaan ñkpọuto amọ ke ufọk ubonoñkpọ amọ.”
Prọfed Ammiinieghe Ukpono
53Ke ini Yisọs amaakekama mme ñke ami akpeep ñkpọ ima, anye amaakpọñ itie ado. 54Anye akediwuọ idʌñ ammọ, amaatọọñọ adikpeep mme awo ñkpọ ke sinakọk ammọ, ndin idem amaakpa mbon se ikikop se anye akekpeep. Ammọ emaebịp ete, “Anye akebọọ utọ aniọñ ami ye adudu unam utịppeñkpọ ami ato uke? 55Idooho ayịn akabinta ado ami? Idooho Mmeri ado anyịñ eka amọ? Yems, Yosef, Saimọn ye Yudas inyʌññọ ido nditọeka amọ? 56Nte afịd nditọeka amọ ibaan ibaññake ye ñnyịn mi? Ndin awo ami akebọọ afịd ñkpọ ami ato mọọ?” 57Ammọ emaenyʌñ eyat esịd ebaña anye.
Ado Yisọs amaabo ammọ, “Ado ke idʌñ amọ ye ke ufọk amọ ke prọfed imiinieghe ukpono.”
58Anye ikinamma uwak utịppeñkpọ do ato unana mbuọdidem ammọ.
Айни замон обунашуда:
Matiu 13: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.