PAIMBA 24
24
1Sangkani seʼi naincanimo i Bila pepokono i mPue Ala, mantinako ndaya siʼa da mangadonco banca Isaraeli. Inceʼe painaka bareʼemo malai siʼa mampepali waʼa mpetondoni, ewa anu nawianakamo riunya. Metango i Bila ri papa bone, 2yosa pangkitanya pokema nto Isaraeli satobu-satobu seʼe malulu lembanya sambaʼa seʼe. Nakuasaimo Inosa mPue Ala i Bila, 3natoʼomo wati seʼi,
“Seʼimo patada i Bila, ana i Beori,
ewa pau ntau anu marata pekita ndaya
4anu madongemo waʼa mpau i mPue Ala
anu mangkitamo pepatongawa ungka ri Anu Makuasa,
seʼi madungka, paikanya matanya loto-loto.
5Ara meawasa waʼa ngkemamu ee Yako,
pai waʼa ngkareʼe mpearimu ee Isaraeli!
6Ewa rato bangke anu tetale,
bara ewa bonde ri wingke ngkoronya;
ewa mpuʼu ngkaju lana wongi anu ndapomuya i mPue,
bara ewa puʼu ngkaju limu ri wingke ue.
7Tau seʼe marata ue uja anu gaga-gana,
wuku mpinamuya marata ua anu sondo.
Mokolenya bangke katetoʼonya, meruu ungka ri Agangi,
pai poparentanya da ndabangkei.
8I mPue Ala anu mangkeni mpesuwu tau seʼe ungka ri tana Masiri,
ewa pangasi japi bali lampu mangantawi tau seʼe,
Waʼa banca iwali da pura naomo,
waʼa mbuku ntau seʼe pura nalesaki,
pai waʼa mpana ntau seʼe da napuʼasi.
9 #
Pal. 12:3, 49:9 Banca setu ewa singa laki pai singa tina,
anu mokepe pai moyuku,
Isema anu makoje mangalike siʼa?
Tuarapa tau anu madonco siko ndadonco,
pai tauanu mantadeasi siko ndatadeasi.”
10Nakeni ngkasengke ndaya i Bala nalemo janggurunya nepa natoʼoka i Bila, “Siko kupeboo da mantadeasi waʼa iwaliku, ntanoka tau seʼe janudonco tatogo ngkanimo. 11Seʼi-seʼi palaimo, pewalili ri banuanu! Kujanjika siko saromu, paikanya bareʼe ndawai i mPue da nutarima saromu setu.”
12Mesono i Bila natoʼo, “Ara banya roomo kutoʼoka waʼa ntau anu ndipokau setu, 13mau pura-pura salaka pai wuyawa anu reʼe ri langkanaemi ndiwaika yaku, bareʼe kukoto da mangalewa songka i mPue pai da mawainaka nunjaa pepokono ndayaku? Yaku podo kukoto mangantoʼo nunjaa anu ndapokau i mPue da kutoʼo.”
Waʼa wati anu kapusanya
24:14-25
14Natoʼo i Bila ri Bala, “Seʼi-seʼi yaku da mewalilimo ri bancaku. Paikanya ri kabareʼepanya kumalai, aginya da kutoʼoka komi nunjaa anu da napowia nto Isaraeli ri bancami ri reme anu darata.” 15Nepa natoʼo i Bila wati seʼi,
“Seʼi patada i Bila ana i Beori;
ewa pau ntau anu marata pekita ndaya
16anu madongemo waʼa mpau i mPue Ala,
pai maya maincani Anu Ndate ri Peawanya,
anu mangkita pepatongawa ungka ri Anu Makuasa
seʼi madungka, paikanya mata loto-loto.
17Kukita sira, paikanya banyapa wawaseʼi;
kupeole sira, paikanya ungka ri kalawanya.
Sambaʼa mokole anu ungka ri Isaraeli kamaʼinya,
da rata ewa betuʼe anu merara mengkaa.
Waʼa ntadulako Moabi da nalesaki
banca Seti da nagero.
18Tana Edomi da potundasi iwalinya,
paikanya Isaraeli mawianaka powia anu makoje.
19Ungka ri Yako mebete sambaʼa tau topoparenta,
anu mangagero waʼa iwalinya.”
20Ungka lairia ri pepatongawa setu nakita i Bila waʼa nto Amale. Inceʼe painaka napasowa i Bila wati seʼi,
“Ungka ri waʼa banca ri dunia,
Amalemo anu maʼai ngkakuasa.
Paikanya ripurinya banca setu,
da posa rantani masae-sae.”
21Ri pepatongawa setu nakita i Bila muli i Kai, nepa napasowa wati seʼi,
“Kareʼe mpearimu lawi maroso,
ewa sea ri wawo roka mbatu.
22Paikanya komi, to Keni, da ndaʼopisaka,
bareʼemo masae Asuri a maungkulaka komi ewa tawani.”
23Ungka lairia napasowa woʼu i Bila wati seʼi,
“Marugi! isema anu tuwu,
ri tempo mpawianaka i mPue inceʼe?
24Paikanya ungka ri Kiperi da rata santibura kapala mpoʼiwali,
tau seʼe da mampapeʼuru Asuri pai Heberi,
ri purinya tibura ngkapala mpoʼiwali setu seʼe da magero.
25Ungka lairia i Bila mompakoroka da mewalili ri kareʼe mpearinya pai i Bala woʼu malaimo.
