PAIMBA 23
23
1Natoʼo i Bila ri Bala, “Wangu kaku papitu lampaʼani ireʼi, pai patokamo papitu japi laki pai papitu bimba laki.”
2Nawianaka i Bala pura-pura anu natoʼo i Bila. Ri Sambaʼa-sambaʼa lampaʼani setu naʼombasi ntau seʼe sambaʼa japi laki pai sambaʼa bimba laki. 3Natoʼo i Bila ri Bala, “Pekakoremo mosu ri panyombami anu ndaʼombasi. Sindara setu yaku da malai mampeole bara ndapokono i mPue da mampomberataka yaku bara bareʼe. Nepa da kutoʼoka siko wuwunya anu ndatoʼoka yaku.” Malai kojo i Bila ngkalionya mandake sawi ri lolo buyu, 4ndatiriamo karata i mPue mampomberataka siʼa. Natoʼo i Bila ri Pue Ala, “Roomo kuwangu papitu lampaʼani pai ri sambaʼa-sambaʼa lampaʼani kupanyombaka sambaʼa japi laki pai sambaʼa bimba laki.”
5Roo setu ndapapaincanika i mPue ri Bila pura-pura anu da natoʼo, nepa ndapokau i Bila da mewalili ri Bala mamparataka pau i mPue rata ri siʼa. 6Mewalilimo i Bila, narata i Bala ntongo njaupa mekakore mosu ri panyombanya anu ndaʼombasi pai waʼa ntadulako nto Moabi njau sangkani-ngkani pai siʼa.
7Ungka lairia mowatimo i Bila natoʼo,
“Ungka ri Arami, ri buyu mongkodo tondo pebetea,
i Bala mokole nto Moabi mampeboo yaku natoʼo,
‘Maʼimo da nupasowaka yaku pau.
Tadeasimo to Isaraeli setu!’
8Ewambeʼi da pantadeasi tau anu bareʼe ndatadeasi i mPue?
Ewambeʼi da kupampetijaʼa tau anu bareʼe ndapetijaʼa i mPue?
9Ungka ri wawo buyu kupampetiro tau seʼe;
ungka ri wawo buyu kupampeole tau seʼe.
Peole, sambaʼa banca anu tepatani bereʼe galonya.
10Muli i Yako ewa awu bareʼe ndakoto maimba;
to Isaraeli manoto maʼai kasondonya.
Tuarapa yaku mate ewa kapate ntau anu mayoa raya.
Mbolimo janjiku da ewa tau setu.”
11Natoʼo i Bala ri Bila, “Ara nunjaa anu nupowiaka yaku? Pai kupampeboo siko da maʼi mantadeasi kaku waʼa iwaliku. Paikanya siko ja maʼi madonco tau seʼe.”
12Mesono i Bila, “Anu maya kupasowa podo anu ndapokauka i mPue ri yaku.”
Wati i Bila anu karadua
23:13-26
13Ungka lairia natoʼo i Bala ri Bila, “Maʼimo tapalai sangkani-ngkani ri buyu ntaninya, ungka njairia podo santilaja to Isaraeli anu da nukita. Tadeasimo tau seʼe ungka njairia.” 14Napoyunumo i Bala i Bila di pada Sofi ri wawo buyu mPesiga. Njairia seʼe nawangu papitu lampaʼani pai napanyombaka woʼu sambaʼa japi laki pai sambaʼa bimba laki ri sambaʼa-sambaʼa lampaʼani setu.
15Natoʼo i Bila ri Bala, “Karoo-roomo ireʼi, ri sori mpanyombamu anu ndaʼombasi, sindara yaku njoʼu mampomberataka i mPue ri njau.”
16Ndapomberataka i mPue i Bila ndatoʼoka siʼa pau anu da natoʼo nepa ndapokau siʼa mewalili ri Bala mamparataka pau i mPue setu. 17Mewalilimo i Bila mampomberataka i Bala anu ntongo njaupa mekakore mosu ri lampaʼani mpanyombanya, sangkani-ngkani pai waʼa ntadulako nto Moabi. Napeoasi i Bala bara nunjaa anu roo ndatoʼo i mPue, 18liu-liu mowatimo i Bila,
“Ee Bala ana i Ncipori, pakamosuka ireʼi,
pedongeka nunjaa anu da kutoʼo.
19I Pue banya ewa tolino,
anu saru-saru tebalisaka rayanya pai mampokono mombamba
Ane i Pue Ala mojanji,
manoto da ndabangani!
Ane sira mompau,
manoto da mewali.
20Yaku ndapokau mangadonco;
pai ane i Pue Ala mangadonco,
bareʼemo maya da kubalisaka.
21Bereʼe ndakita anu majaʼa ri muli i Yako,
ri to Isaraeli bereʼe ndakita kapari.
I Pue Ala, Pue ntau seʼe anu mangayunuki tau seʼe.
Tau seʼe meboo-boo mantoʼo Siramo mokole!
22I Pue Ala anu mampoyunu tau seʼe mesuwu ungka ri tana Masiri;
ewa petondu baula lampu mangantawi tau seʼe.
23Bereʼe doʼa-doʼa anu da mekoni ri muli i Yako,
bereʼe doti anu datinja ri to Isaraeli.
Kono banca setu da natoʼo ntau,
‘Peolemo powia i mPue Ala anu ndapojingki!
24Peole, banca setu mekakore ewa singa tina,
tigori mekakore ewa singa laki.
Bareʼepa da moyuku siʼa ane bareʼepa nakoni sinokonya,
pai bareʼepa nainu daa anu napepate.”
25Natoʼo i Bala ri Bila, “Ganamo ane bareʼe nupokono mantadeasi to Isaraeli; paikanya neʼe woʼu nudonco tau seʼe!”
26Mesono i Bila, “Ara banya roo kutoʼoka komi bareʼe da kupowia wuwunya anu bareʼe ndapesongkaka i mPue ri yaku?”
Wati i Bila anu katatogo
23:27–24:13
27Natoʼo i Bala, “Maʼimo tapalai ri sambakanya. Boi da ndawaimo i mPue Ala da mantadeasi kaku ti Isaraeli njairia.” 28Malaimo napoyunumo i Bila ri wawo buyu Peori anu mancuara pada bone. 29Natoʼo i Bila ri Bala, “Wangumo papitu lampaʼani ireʼi pai patokamo papitu japi laki pai papitu bimba laki.” 30Nawianaka i Bala pura-pura anu natoʼo i Bila. Ri sambaʼa-sambaʼa lampaʼani setu naʼombasi sambaʼa japi laki pai sambaʼa bimba laki.
